އިންކުއަރީގެ މައުލޫމާތު ހިއްސާކޮށްފި
ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދަށް ދެމުން ގެންދާ ސަލާމަތާއި ރައްކާތެރިކަން ބްރީޗްވި ގޮތް ހޯދުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއިން ކުރިއަށް ގެންދިޔަ އިންކުއަރީގެ ފުރިހަމަ ރިޕޯޓާ ގުޅޭ މައުލޫމާތު މެންބަރުންނާ ހިއްސާކޮށްފިއެވެ.
މަޖިލީހުގެ 241 ކޮމިޓީން ކުރިއަށް ގެންދިޔަ އެންކުއަރީ ރިޕޯޓާ ގުޅޭ މައުލޫމާތު މެމްބަރުންނާ ހިއްސާކުރުމަށް މިއަދު ވަނީ މަޖިލީހުގައި ބައްދަލުވުމެއް ބާއްވައިފައެވެ. އަދި މި ބައްދަލުވުމުގައި ކޮމިޓީ ރިޕޯޓުގެ މައުލޫމާތު މެންބަރުންނާ ހިއްސާކޮށްފައި ވަނީ ކޮމިޓީގެ މުގައްރިރު، ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އާއި ކޮމިޓީގެ މެންބަރުން ކަމަށްވާ ގަލޮޅު އުތުރު ދާއިރާގެ މެންބަރު އީވާ އަބްދުﷲ އާއި ހެންވޭރު ހުޅަނގު ދާއިރާގެ މެމްބަރު ހަސަން ލަތީފްއެވެ.
އެ މައުލޫމާތު މެމްބަރުންނާ ހިއްސާކުރުމަށް މިއަދު ބޭއްވި ބައްދަލުވުމުގައި އެ ރިޕޯޓާ ބެހޭ ގޮތުން 241 ކޮމިޓީން ވިދާޅުވީ ރިޕޯޓުގައި ގައުމީ ސަލާމަތަށް ނުރައްކާވާ ފަދަ މައުލޫމާތެއް ހުރި ކަމަށް ފާހަގަވެއްޖެ ނަމަ، އެ ބައި ރިޕޯޓުން އުނިކުރަން ޖެހުނު ނަމަވެސް، އެބައި ވެސް ރައީސާއި މަޖިލީހުގެ ރައީސްގެ އިތުރުން އުއްތަމަފަނޑިޔާރާ ވެސް ހިއްސާކުރާނެ ކަމަށެވެ.
ރައީސް ނަޝީދަށް ދިން ހަމަލާއާ ގުޅިގެން 241 ކޮމިޓީން ކުރިއަށް ގެންދިޔަ އިންކުއަރީގައި ސުވާލު ކުރުމަށް ދައުލަތުގެ ވަޒީރުންނާއި ވަކިވަކި ފުލުހުންނާއި ސިފައިން ވެސް ވަނީ ހާޒިރުކޮށްފައެވެ. އެގޮތުން ރައީސް ނަޝީދުގެ ސެކިއުރިޓީ ބަލަހައްޓާ އެމްއެންޑީއެފުގެ އެސްޕީޖީގެ ސިފައިންގެ އިތުރުން ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލާއި ވައިސް ޗީފް އޮފް ޑިފެންސް ފޯސް ޖެނެރަލް ޢަބްދުއްރަހީމް ޢަބްދުއްލަތީފާއި ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ޒަކަރިއްޔާ މަންސޫރު ވެސް ވަނީ ކޮމިޓީއަށް ހާޒިރުކޮށްފައެވެ. އަދި ކޮމިޝަނަރ އޮފް ޕޮލިސް މުޙައްމަދު ޙަމީދާއި ފުލުހުންގެ މުއައްސަސާގެ އިސްވެރިން ވެސް ވަނީ ކޮމިޓީއަށް ހާޒިރުކޮށްފައެވެ. މީގެ އިތުރުން މަރުކަޒީ ބޭންކުގެ ގަވަރުނަރު އަލީ ހާޝިމްއާއި މާލެ ސިޓީގެ ކުރީގެ މޭޔަރު ސިފާ މުޙައްމަދު ވެސް ހާޒިރުކޮށްފައިވެއެވެ.
