ވައްޑެ ރައީސް ޞާލިހަށް: ހިތްވަރު ނެތިއްޔާ ކަންކަން ނުކުރައްވާ!
ނަފުރަތު އުފެއްދުމަކީ ކުށަކަށް ހަދާ ގާނޫނުލްއުގޫބާތަށް އިސްލާހު ގެނައުމުގެ ބިލް އަނބުރާ ކޮމިޓީއަށް ފޮނުވައިލާން ނިންމި ނިންމުމާ ގުޅިގެން އުނގޫފާރު ދާއިރާގެ އެމްޑީޕީގެ މެންބަރު މުހައްމަދު ވަހީދު (ވައްޑެ)ގެ ފާޑު ކިޔުން ރައީސް ޞާލިޙަށް އަމާޒުވެއްޖެއެވެ.
މުސްލިމަކާ ދިމާއަށް ކާފަރެކޭ ބުނުން ކުށަކަށް ހަދަން ސަރުކާރުގެ ފަރާތުން ތުޅާދޫ ދާއިރާގެ މެމްބަރު ހިސާން ހުސައިން ގާނޫނުލްއުގޫބާތަށް އިސްލާހު ގެނައުމަށް ހުށަހަޅައިފައިވާ ބިލަށް މިއަދު މަޖިލީހުގެ ޖަލްސާގައި ބަހުސްގައި ވައްޑެ ވިދާޅުވީ ހިތްވަރެއް ނެތިއްޔާ ކަންކަން ނުކުރައްވަން ރައީސް ޞާލިޙް އަރިހުން އެދޭ ކަމަށެވެ.
"އަޅުގަނޑު ވަރަށް ބޮޑަށް ކުށްވެރި ކުރަން ސަރުކާރުން މި ބިލު ފޮނުވާފަ، ތުޅާދޫ ދާއިރާގެ މެންބަރު ހިސާން ހުސެއިން ހަވަރަށް ދޭ އުސޫލުން ކަންތައް ކުރީމަ. ރައީސަށް ދަންނަވައިލަން ހިތްވަރު ނެތިއްޔާ ނުކުރާނީ މިކަހަލަ ކަންކަން." ވައްޑެ ވިދާޅުވިއެވެ.
ވައްޑެ ވިދާޅުވީ ނަފްރަތުގެ ބިލަކީ ސިޔާސީ މައްސަލައެއް ކަމަށާއި މިއީ ދީނީ މައްސަލައެއް ނޫން ކަމަށެވެ. އަދި ކޮންމެ ކަމަކުން ވެސް ސިޔާސީ ފައިދާ ހޯދަން މަސައްކަތް ކުރާ ބަޔަކު އުޅޭ ކަމަށާއި އެފަދަ މީހުން ކޮންމެ ކަމެއް ޤުރުބާންކޮށްގެން ވެސް ސިޔާސީ ފައިދާ ހޯދަން މަސައްކަތް ކުރާނެ ކަމަށެވެ.
"އަބަދުވެސް އަޅުގަނޑުމެންގެ ތެރޭގައި އެބަ އުޅޭ ކޮންމެ ގޮތަކުން ވެސް ސިޔާސީ މޮޅު ހޯދަން. ކޮންމެ ފަދަ ކަމެއް ޤުރުބާން ކުރައްވައިގެން ކަމަށް ވިޔަސް. ކޮންމެ ފަދަ މީހެއް ޤުރުބާން ކުރައްވައިގެން ކަމަށް ވިޔަސް، ކޮންމެ ފަދަ މުނާފިގު ކަމެއް، ނިފާގު ކަމެއް އިސްކޮށްގެން ނަމަވެސް ކޮންމެ ކަމަކުން ސިޔާސީ އެޑްވާންޓޭޖް ނަގާލަން" ވައްޑެ ވިދާޅުވިއެވެ.
ނަފުރަތުގެ ބިލުގެ ސަބަބުން ހެޔޮ ކަންތަކަށް އަމުރު ކުރުމާއި ނުބައިކަންތައް ނަހީ ކުރުމަށް އިސްލާމް ދީނުގައި އޮންނަ އަމުރު ތަންފީޒް ނުވާނެ ކަމަށް ދައްކާ ވާހަކަތަކަށް ރައްދު ދެއްވަމުން ވައްޑެ ވިދާޅުވީ އިސްލާމް ދީނަކީ ނަސޭހަތް ދިނުމުގެ ދީން ކަމަށާއި ކާފަރޭ ގޮވާ މީހަކަށް ހެޔޮ ކަމަކަށް އަމުރު ނުކުރެވޭނެ ކަމަށެވެ.
މި ބިލާ ބެހޭ ގޮތުން ދީނީ އިލްމުވެރިންގެ ބަސް އެމަނިކުފާނު އެއްސެވި ކަމަށާއި އިތުބާރު ކުރެވޭ މޮޅެތި އިލްމުވެރިން މީހުންނަށް ކާފަރަށް ނުގޮވޭނެ ކަމަށް ބުނި ކަމަށް ވައްޑެ ވިދާޅުވިއެވެ. އަދި ސިޔާސީ ޖޯޝުގައި ވާހަކަ ދައްކާ މީހުންގެ ލެވެލްއަށް އިލްމުވެރިން ވެއްޓެން ނުޖެހޭ ކަމަށާއި އިލްމުވެރިންގެ ދައުރަކީ ސާފުކޮށް ކަންއޮތް ގޮތް ބުނެދިނުން ކަމަށް ވައްޑެ ވިދާޅުވިއެވެ.
"އިލްމުވެރިން ނުޖެހޭ ކޮންމެހެން ސިޔާސީ ޖޯޝުގައި ވާހަކަ ދައްކަވާ މީހުންގެ ލެވެލްއަކަށް ދާކަށް. އިލްމުވެރިންގެ ދައުރަކީ ސީދާކޮށް، ސާފުކޮށް ކަން އޮތް ގޮތް ބުނެދިނުން" ވައްޑެ ވިދާޅުވިއެވެ.
މަޖިލީހުން މި ބިލް އަނބުރާ ކޮމިޓީއަށް ފޮނުވައިލުމާ ގުޅިގެން އެމްޑީޕީގެ ބައެއް މެންބަރުން ވަނީ މަޖިލީހުގައި ރައީސް ޞާލިޙަށް ވަރަށް ބޮޑަށް ފާޑު ވިދާޅުވެފައެވެ.
Ads by STO
