ރައީސް ޔާމީނަށް ދިން ހަމަލާއަށް ޖޯކު ޖެހި އެމްޑީޕީ މެންބަރުން މިއަދު މަޢާފަށް އެދެން ޖެހޭ: ސެންބެ
ކުރީގެ ރައީސް ޔާމީން އަބްދުލްޤައްޔޫމަށާއި އެމަނިކުފާނުގެ އަނބިކަބަލުންނަށް އަމާޒުކޮށްގެން ފިނިފެންމާ ލޯންޗްކޮޅުގައި އެއްޗެއް ގޮއްވައިލުމުން އެވަގުތު އެކަމަށް ޖޯކު ޖެހި އެމްޑީޕީގެ މެންބަރުން މިއަދު ރައީސް ޔާމީންގެ ކިބައިން މަޢާފަށް އެދިވަޑައިގަންނަވަން ޖެހޭނެ ކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ޙުސައިން މުޙައްމަދު ލަޠީފު (ސެންބެ) ވިދާޅުވެއްޖެއެވެ.
ސެންބެ މިހެން ވިދާޅުވީ، މޭ 6 ،2021 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލުމަށް ދިން ނުރައްކާތެރި ޓެރަރިސްޓް ހަމަލާއާ ގުޅިގެން ސަލާމަތީ ޚިދުމަތްތަކާ ބެހޭ ކޮމިޓީން ހިންގައިފައިވާ ޕާލިމަންޓަރީ އިންކުއަރީގެ މަސައްކަތް ނިންމިގޮތުގެ ރިޕޯޓް ހުށަހެޅުމަށް ބޭއްވި މަޖިލީހުގެ ޖަލްސާގައި ވާހަކަފުޅު ދައްކަވަމުންނެވެ.
ސެންބެ ވާހަކަފުޅުގައި ވިދާޅުވީ، ރައީސް ނަޝީދަށް އަމާޒުކޮށް ދިންފަދަ ހަމަލާއެއް މީގެ ކުރިން ވެސް ރާއްޖޭގެ ރައީސަކަށް އަމާޒުކޮށް ދެވިގެން ދިޔަ ކަމަށާއި އެހެން ނަމަވެސް އެ ދުވަހު ކަމުގެ ސީރިޔަސް ކަމަށް ނުބަލައި އެމްޑީޕީގެ މެންބަރުން ޖޯކު ޖެހި ކަމަށެވެ. އަދި މިމޭރުމުން ކަންތައް ކުރި ފަރާތްތައް މިއަދު ރައީސް ޔާމީން އަރިހުން މަޢާފަށް އެެދެން ޖެހޭ ކަމަށް ސެންބެ ވިދާޅުވިއެވެ.
"މިއަދު އެމްޑީޕީގެ މެންބަރުންނާއި އެމްޑީޕީ ސަރުކާރުން ރައީސް ޔާމީންގެ ކިބައިން މަޢާފަށް އެދެން ޖެހޭ. އޭރުވެސް ހިނގަމުން އައީ މިކަންތަކޭ، މިހާރު ވެސް ހިނގަނީ މިކަންތަކޭ. އެހެންނަމަވެސް އެކަންތައް ބޮޑު ޖޯކަކަށް ހަދައި ބޮޑު މަޖާ ގަނޑަކަށް ހަދައި އެކަން ފާހަގަ ކުރީމަ. ޤައުމު ސިޔާސީ ގޮތުން ބައިބައި ކުރީމަ" ސެންބެ ވިދާޅުވިއެވެ.
ސެންބެ ވިދާޅުވީ އެދުވަހުގެ ބިރުވެރި ހާލަތާއި ބިރުވެރި ވަގުތެއްގައި އެމްޑީޕީގެ މެންބަރުން އެކަން މަޖާގަނޑަކަށް ހެދި ނަމަވެސް ޕީޕީއެމްއަކީ އެއަށް ވުރެ ޤައުމީ ކަންކަމުގައި ކެރޭ ބައެއްކަން މިއަދު ދައްކުވައިދީފި ކަމަށެވެ. މިގޮތުން މަޖިލީހުގެ އިންކްއަރީ ރިޕޯޓް ހެދުމުގައި ޕީޕީއެމް އަދި ޕީއެންސީގެ ފުރިހަމަ އެއްބާރުލުން ލިބުނުކަން ފާހަގަ ކުރައްވައި ސެންބެ ވިދާޅުވީ ޕީޕީއެމްއަކީ އަބަދުވެސް ޤައުމީ ކަންކަމުގައި ޤައުމު އިސްކުރާނެ ޕާޓީއެއް ކަމަށާއި ސިޔާސީ މަންފާއަށް މަސައްކަތް ނުކުރައްވާނެ ކަމަށެވެ.
2015 ވަނަ އަހަރުގެ ސެޕްޓެމްބަރު 28 ގައި ރައީސް ޔާމީންގެ ދެކަނބަލުން ހައްޖުގެ އަޅުކަން ފުރިހަމަ ކުރުމަށް ފަހު ހުޅުލޭ އެއާޕޯޓުން މާލެއަށް ދަތުރުކުރެއްވި "ފިނިފެންމާ" ލޯންޗުކޮޅު މާލޭ ފަޅަށް ވަދެ، ރަސްމީ ފާލަމާ ކައިރި ކުރަނިކޮށް، އޭގައި އެއްޗެއް ގޮއްވައިލިއެވެ. މި ގޮއްވައިލުމުގައި ރައީސް ޔާމީނަށް އަނިޔާއެއް ލިބިވަޑައިގެންފައެއް ނުވެއެވެ.ނަމަވެސް އެ މަނިކުފާނުގެ އަނބިކަނބަލުންނަށް ޒަޚަމްވެ ފަރުވާ ހޯއްދަވައިފައި ވެއެވެ.
ލޯންޗްކޮޅުގައި އެއްޗެއް ގޮއްވައިލީ އަމިއްލަފުޅަށް ކަމަށް ދޭހަވާ ގޮތަކަށް އެމްޑީޕީގެ މެންބަރުން އޭރު ވާހަކަ ދައްކަވައި ޓްވީޓް ކުރައްވައިފައި ވެއެވެ.
ސެންބެގެ ވާހަކަފުޅުގައި ރައީސް ޞާލިޙަށް ވެސް ވަނީ ވަރަށް ބޮޑަށް ފާޑު ވިދާޅުވެފައެވެ. މިގޮތުން އެމަނިކުފާނުގެ އިސްތިޢުފާއަށް ގޮވާލައްވައި، ރައީސް ނަޝީދު މަގުމައްޗަށް ދޫކޮށްލީ މަރާލަން ކަމަށް ރިޕޯޓުން ދޭހަވާ ކަމަށް ވެސް ސެންބެ ވަނީ ތުހުމަތު ކުރައްވައިފައެވެ.
"ރައީސް ނަޝީދު މަގުމައްޗަށް ދޫކޮށްލީ މަރައިލާން. އެމަނިކުފާނު މަގުމައްޗަށް ދޫކޮށްލީ ކަނޑައެޅިގެން އެނގި ތިބެ މަރައިލާން." ސެންބެ ވިދާޅުވިއެވެ.
