ނަޝީދަށް ހަމަލާދޭން ހަރުކަށި ފިކުރުގެ މީހުން އެތައް ފަހަރެއްގެ މަތިން ރޭވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ހަމަލާ ދިނުމަށް ، ދީނީ ގޮތުން ހަރުކަށި ފިކުރުގެ މީހުން އެތައް ފަހަރަކު ރާވަމުން ދިޔަކަން, ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ކުރިއަށް ގެންދިޔަ އިންކުއަރީގެ ރިޕޯޓުގައި ބުނެފިއެވެ.
ރައްޔިތުންގެ މަޖިލީހުގެ ރައީސަށް ދެމުން ގެންދާ ސަލާމަތާއި ރައްކާތެރިކަން ބްރީޗްވިގޮތް ހޯދުމަށް މަޖިލީހުގެ 241 ކޮމިޓީން ކުރިއަށް ގެންދިޔަ ޕާލަމެންޓަރީ އިންކުއަރީ އިއްޔެ އާންމުކުރިއިރު އެ ރިޕޯޓުގައި ރައީސް ނަޝީދަށް ޙަމަލާދިން ގޮތް ހިމެނުމުގެ ގޮތުން އެމަނިކުފާނުގެ ޕްރޮފައިލަކާއި، ތްރެޓް ލެވަލް އޮތް މިންވަރުގެ އިތުރުން ތްރެޓް ހިސްޓްރީއާއި، އިންކުއަރީން ބެލި ކަންކަން ވަނީ ހިމަނައިފައެވެ.
އިންކުއަރީއަށް ރިޕޯޓުގައި ބުނެފައިވާ ގޮތުން ހަރުކަށި ފިކުރާ ދެކޮޅަށް ރައީސް މުހައްމަދު ނަޝީދު ވަކާލާތުކުރައްވަމުން ގެންދަވާތީ, އެ ފިކުރަށް ތާއީދުކުރާ ފަރާތްތަކުން ރައީސް މުހައްމަދު ނަޝީދަކީ ލާދީނީ މީހެއްގެ ގޮތުގައާއި އިސްލާމްދީނުގެ އަދުއްވެއްގެ ގޮތުގައި ސިފަކޮށްފައި ވެއެވެ. އަދި އެމީހުން ރައީސް މުހައްމަދު ނަޝީދަކީ މަރާލަން ޖެހޭ މީހެއްގެ ގޮތުގައި އެކި ގޮތްގޮތުން ހާމަކުރަމުން ދިޔަ ކަމަށެވެ.
މީގެ އިތުރުން ރިޕޯޓުގައި ބުނެފައިވާ ގޮތުގައި މަޖިލީހުގެ މެމްބަރުންނާއި މަޖިލީހުގެ އިދާރާއަށް އަމާޒުކޮށް, ހަރުކަށި ފިކުރު ގަބޫލުކުރާ ބަޔަކު ޓެރަރިޒަމްގެ އަމަލެއް ހިންގުމުގެ ވިސްނުން ގެންގުޅޭކަމުުގެ މައުލޫމާތު މި އަހަރުގެ ޖެނުއަރީ މަހުގެ ތެރޭގައި ފުލުހުންގެ އިންޓެލިޖެންސް ކޮމާންޑަށް ލިބިފައިވެއެވެ.
ރައީސް ނަޝީދުގެ ސެކިއުރިޓީ ބްރީޗްވި ގޮތާ ގުޅޭ ގޮތުން ހެދި އިންކުއަރީއަށް ޑިފެންސް މިނިސްޓަރާއި، ހޯމް މިނިސްޓަރުގެ އިތުރުން، ސިފައިންގެ އިސްވެރިންނާއި ރައީސް ނަޝީދުގެ ސެކިއުރިޓީ ބަލަހައްޓާ އެސްޕީޖީގެ ސިފައިންނާއި ކައުންޓަރ ޓެރަރިޒަމް ސެންޓަރުގެ ޑިރެކްޓަރ ޖެނެރަލް ވެސް ހާޒިރުކޮށް ސުވާލުކުރިއެވެ. އަދި ކޮމިޝަނަރ އޮފް ޕޮލިސް މުޙައްމަދު ޙަމީދާއި ފުލުހުންގެ މުއައްސަސާގެ އިސްވެރިން ވެސް ކޮމިޓީއަށް ޙާޒިރުކޮށްފައި ވެއެވެ. މީގެ އިތުރުން ޕްލޭނިން މިނިސްޓަރ މުޙައްމަދު އަސްލަމާއި މާލެސިޓީގެ ކުރީގެ މޭޔަރު ޝިފާ މުޙައްމަދު ވެސް ކޮމިޓީއަށް ޙާޟިރުކޮށްފައި ވެއެވެ.
