ގަތަރުގައި ބޭއްވި ބައިނަލްއަގުވާމީ ފުލުހުންގެ ކޮންފަރެންސްގައި ދިވެހި ތިން ފުލުހަކު ބައިވެރިވެއްޖެ

ގަތަރުގައި ބޭއްވި ބައިނަލްއަގުވާމީ ފުލުހުންގެ ކޮންފަރެންސްގައި ދިވެހި ތިން ފުލުހަކު ބައިވެރިވެއްޖެއެވެ.
ގަތަރުގެ ވެރިރަށް ދޯހާގައި މި މަހުގެ 16އިން 18އަށް ކުރިއަށްދިޔަ އިންޓަރނޭޝަނަލް އެސޯސިއޭޝަން އޮފް ޕޮލިސް އެކަޑަމީސް (އިންޓަރޕާ)ގެ 15ވަނަ ކޮންފަރެންސްގައި ދިވެހި ފުލުހުންގެ ހިދުމަތުން ބައިވެރިވެވަޑައިގެންނެވީ ސިސްޓެންޓް ކޮމިޝަނާ އޮފް ޕޮލިސް އަހުމަދު އަބްދުއްރަހުމާނާއި، ސުޕްރިންޓެންޑެންޓް އޮފް ޕޮލިސް ރަހުމާ ސަޢީދުގެ އިތުރުން ޑިރެކްޓާ ޖެނެރަލް އޮފް ޕޮލިސް ސާވިސް އެޑްމިނިސްޓްރޭޝަން އިސްމާއިލް ސަފްހަތެވެ.
ގަތަރުގެ މިނިސްޓްރީ އޮފް އިންޓީރިއާގެ ދަށުން ހިންގާ ގަތަރު ޕޮލިސް އެކަޑަމީން އިންތިޒާމުކޮށްގެން ތިން ދުވަހުގެ މުއްދަތަށް ކުރިއަށްގެންދިޔަ މި ކޮންފަރެންސްގައި، ދުނިޔޭގެ އެކި ގައުމުތަކުގެ ޕޮލިސް އެކަޑަމީތަކާއި ގާނޫނު ތަންފީޒުކުރާ އިދާރާތަކުގެ ތަމްރީނު މަރުކަޒުތަކުގެ މަންދޫބުން ބައިވެރިވެވަޑައިގެންނެވިއެވެ. މިއީ ފުލުހުންގެ ތައުލީމާއި ތަމްރީނުގެ ދާއިރާއިން ގުޅުން ބަދަހިކޮށް، ތަޖުރިބާ ބަދަލުކުރުމާއި އެންމެ ރަނގަޅު އުސޫލުތައް ހިއްސާކުރުމުގެ ބޭނުމުގައި ކުރިއަށް ގެންދިޔަ ކޮންފެރެންސެކެވެ.
މި ކޮންފަރެންސްގައި މަޝްވަރާކުރެވުނީ ފުލުހުންގެ ތައުލީމާއި ތަމްރީނު ނިޒާމުތައް ޒަމާނީކުރުމަށާއި، ތަމްރީނު މަންހަޖުތައް އިތުރަށް ހަރުދަނާކުރުމުގެ އިތުރުން، އަލަށް ކުރިމަތިވަމުންދާ ސަލާމަތީ ގޮންޖެހުންތަކާ ދެކޮޅަށް މަސައްކަތްކުރެވޭނެ ގާބިލު އޮފިސަރުން ބިނާކުރުމާ ގުޅޭގޮތުންނެވެ. މީގެއިތުރުން، މި ޕްރޮގްރާމުގެ ތެރެއިން އިންޓަރޕާގެ 15ވަނަ ޖެނެރަލް އެސެމްބްލީ ބައްދަލުވުމާއި 30ވަނަ އެގްޒެކެޓިވް ބޯޑު ބައްދަލުވުންވެސް ކުރިއަށްދިޔައެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.