އެމްޑީޕީގެ ސުޕަރ މެޖޯރިޓީން ކުރަން ބޭނުންވި ކަމެއް ކުރާނެ: ސައުދު
ވެރިކަންކުރާ އެމްޑީޕީއަށް ރައްޔިތުންގެ މަޖިލީހުގައި ލިބިފައި އޮތް ސުޕަރ މެޖޯރިޓީއަކީ ކުޅަދާނަ ވަރުހުރި ސުޕަރ މެޖޯރިޓީއެއް ކަމަށާއި އެ ސުޕަރ މެޖޯރިޓީން ކުރަން ބޭނުންވާ ކަމެއް ކުރާނެ ކަމަށް ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.
ސައުދު މިހެން ވިދާޅުވީ އެމްޑިޕީގައި އޮތީ ފިނޑި ސުޕަރ މެޖޯރިޓީއެއްކަމަށް ގަލޮޅު ދެކުނު ދާއިރާގެ މެމްބަރު މީކާއިން ނަސީމް ވިދާޅުވެފައިވާތީ އެކަމަށް ރައްދު ދެއްވައި ވާހަކަދައްކަވަމުންނެވެ. ސައުދު ވިދާޅުވީ އެމްޑީޕީގައި އޮތް ސުޕަރ މެޖޯރިޓީއަކީ ގަޓުހުރި ކުޅަދާނަ ސުޕަރ މެޖޯރިޓީއެއް ކަމަށެވެ.
"އެމްޑީޕީގެ ސުޕަރ މެޖޯރިޓީއަކީ ގަޓު ހުރި ކުޅަދާނަ ވަރުހުރި ސުޕަރ މެޖޯރިޓީއެއް. މި މެޖޯރިޓީން ކުރަން ބޭނުންވާ ކަމެއް ކުރާނެ، ކުރަން ނުޖެހޭ ކަމެއް ވެއްޖެއްޔާ މި މެޖޯރިޓީ ތެރެއިން ނުކުރާނެ" ސައުދު ވިދާޅުވިއެވެ.
ރައީސް ނަޝީދަށް އަމާޒުކޮށްދިން ނުރައްކާތެރި ޓެރަރިސްޓް ހަމަލާއާއި ގުޅިގެން މަޖިލީހުގެ 241 ކޮމިޓީން ކުރިއަށް ގެންދިޔަ އިންކުއަރީއާ ބެހޭ ގޮތުން ވާހަކަދައްކަވަމުން ސައުދު ވިދާޅުވީ ރައީސް ޔާމީން އަވަހާރަކޮށްލަން ރިޔާސީ ލޯންޗްކޮޅަށް ދިން ހަމަލައާ ގުޅިގެން އޭރު އޮތް މެޖޯރިޓީއަށް މިފަދަ އިންކުއަރީއެއް ނުހިންގުނު ކަމަށާއި އެކަމުގެ ނަތީޖާއެއްގެ ގޮތުން ދެވަނަ ޓެރަރިސްޓް ހަމަލާއެއް ދައުލަތުގެ އެއްބާރުގެ ވެރިޔާއަށް އަމާޒުވީ ކަމަށެވެ. އަދި ރައީސް ނަޝީދަށް އަމާޒުކޮށްދިން ޓެރަރިސްޓް ހަމަލާއާ ގުޅިގެން ކުރިއަށް ގެންދިޔަ އިންކުއަރީގެ ސަބަބުން ވެސް އެމްޑީޕީގެ ސުޕަ މެޖޯރިޓީގެ ތަފާތުކަމާއި ގަދަކަން އެނގިގެން ދިޔަކަމަށް ސައުދު ވިދާޅުވިއެވެ.
މޭ 6 ،2021 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު އަވަހާރަކޮށްލަން ދިން ނުރައްކާތެރި ޓެރަރިސްޓް ހަމަލާއާ ގުޅިގެން ސަލާމަތީ ޚިދުމަތްތަކާ ބެހޭ ކޮމިޓީން ހިންގައިފައިވާ ޕާލިމަންޓަރީ އިންކުއަރީގެ މަސައްކަތް ނިންމިގޮތުގެ ރިޕޯޓް ހުށަހެޅުމަށް ބޭއްވި މަޖިލީހުގެ ޖަލްސާގައި 214 ކޮމިޓީން ކުރިއަށް ގެންދިޔަ އިންކުއަރީއަށް ގިނަ މެމްބަރުން ވަނީ ތައުރީފުކޮށް ވާހަކަދައްކަވައިފައެވެ.
