ބީއެމްއެލްއިން އިތުރު 182 ފްލެޓެއްގެ ކޮންކްރީޓް މަސައްކަތް ފަށައިފި

ބޯހިޔާވަހިކަން އެންމެންނަށް ސިޔާސަތުގެ ދަށުން، ބޭންކް އޮފް މޯލްޑިވްސް (ބީއެމްއެލް)އިން ކުރިއަށް ގެންދާ އެފޯޑަބަލް ހައުސިން މަޝްރޫއުގެ ދަށުން ބީއެމްއެލްއިން އިތުރު 182 ފްލެޓެއްގެ ކޮންކްރީޓް މަސައްކަތް ފަށައިފިއެވެ.
އަމީން ކޮންސްޓްރަކްޝަންއާ ހަވާލުކޮށްގެން 182 ޔުނިޓްގެ ފައުންޑޭޝަން ތައްޔާރުކޮށް ކޮންކްރީޓް އެޅުމުގެ މަސައްކަތް މި މަސް ފެށުނުތަނާ ފެށިއިރު އެފްޑަބްލިއު ކޮންސްޓްރަކްޝަންއާ ހަވާލުކޮށްގެން ތަރައްޤީ ކުރާ 182 ހައުސިންގ ޔުނިޓްގެފައުންޑޭޝަން ތައްޔާރުކޮށް ކޮންކްރީޓް އެޅުމުގެ މަސައްކަތް އިއްޔެ ފަށާފައިވާ ކަމަށް އެ ބޭންކުން ބުންޏެވެ.
"މާލެ ސިޓީގައި މިވަގުތު 3200 އަށް ވުރެ ގިނަ ހައުސިންގ ޔުނިޓް ގާއިމްކުރުމުގެ އަމަލީ މަސައްކަތް ހިނގަމުންދޭ." ބީއެމްއެލްއިން އިތުރަށް ބުންޏެވެ.
ބީއެމްއެލްއިން ބުނީ ހައުސިން ޔުނިޓްތައް އިމާރާތްކުރުމުގެ މަސައްކަތް 2028ވަނަ އަހަރުގެ މެދުތެރޭ ނިންމައިލެވޭނެ ކަމަށެވެ.
"އެފޯޑަބަލް ހައުސިން" މަޝްރޫއަކީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން، "ބީއެމްއެލް އެފޯޑަބަލް ހޯމް ލީސިންގ" މެދުވެރިކޮށް ހުޅުމާލެއާއި ވިލިމާލޭގައި ފްލެޓް އެޅުމަށް ހިންގާ މަޝްރޫޢެކެވެ. މިއީ "ލީސް-ޓު-އޯން" މޮޑެލް، ނުވަތަ ކުއްޔަށް ހިފުމަށް ފަހު މިލްކުކުރެވޭ ގޮތަށް ފަހިކޮށްދީފައިވާ ފުރުސަތެކެވެ.
ބީއެމްއެލްއިން ވަނީ އަގު ހެޔޮކޮށް ވިއްކާ ފްލެޓްތައް އަޅަން ސަބްސިޑަރީ ކުންފުންޏެއް ވެސް އުފައްދައިފައެވެ.
އެ ސަބްސިޑަރީ ކުންފުނިން ހައުސިން ޔުނިޓްތައް އަޅަން ހަވާލުކުރީ ޗައިނާގެ ދެ ކުންފުންޏެއް ކަމަަށްވާ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އާއި ޗައިނާ މެޝިނަރީ އިންޖީނިއަރިން ކޯޕަރޭޝަން (ސީއެމްއީސީ) އާއެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.