ޒުވާނުންގެ ޤައުމީ އެވޯޑަށް ކުރިމަތިލުމުގެ ފުރުސަތު ހުޅުވާލައިފި
މިއަހަރުގެ ޒުވާނުންގެ ގައުމީ އެވޯޑަށް ކުރިމަތިލުމުގެ ފުރުސަތު އަންނަ މަހުގެ ނިޔަލަށް ޔޫތު މިނިސްޓްރީން ހުޅުވާލައިފިއެވެ.

ޤައުމުގެ ތަރައްގީގައި ޒުވާނުން އަދާކުރާ މުހިންމު ދައުރު ފާހަގަކޮށް، ހިތްވަރު ދިނުމުގެ ގޮތުން ދޭ "ޒުވާނުންގެ ޤައުމީ އެވޯޑު" އަށް ކުރިމަތިލުމުގެ ފުރުސަތު ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާއިން މިހާރު ވަނީ ހުޅުވާލާފައެވެ.
މި އެވޯޑަށް ކުރިމަތިލުމުގެ ފުރުސަތު އަންނަ އޯގަސްޓް މަހުގެ 31ވަނަ ދުވަހުގެ މެންދުރު 13:00އާ ހަމައަށް އޮންނާނެ ކަމަށް އެ މިނިސްޓްރީން ބުނެއެވެ. މި އަހަރު ވެސް ޖުމްލަ 22 ދާއިރާއަކުން މި އެވޯޑު ދިނުމަށް ވަނީ ހަމަޖެހިފައެވެ.
މިނިސްޓްރީން ބުނީ އެވޯޑަށް ކުރިމަތިލާ ފޯމު ވެލާނާގޭގެ ތިންވަނަ ފަންގިފިލާގައި ހުންނަ އެ މިނިސްޓްރީގެ ރިސެޕްޝަނުންނާއި އޮންލައިންކޮށް ވެސް ލިބޭނެ ކަމަށެވެ. ފޯމު ބަލައިގަންނާނީ ސަރުކާރު ބަންދު ނޫން ކޮންމެ ދުވަހަކު ހެނދުނު 08:30 އިން މެންދުރުފަހު 14:00 އަށެވެ. މީގެ އިތުރުން [email protected] އީމެއިލް މެދުވެރިކޮށް ވެސް އެޕްލިކޭޝަން ހުށަހެޅޭނެ ކަމަށް ބުނެފައިވެއެވެ.
ޒުވާނުންނަކީ މުޖުތަމައަށް ފައިދާހުރި، ޒިންމާދާރު ބަޔަކަށް ހެދުމަށް ބާރުއެޅުމުގެ ގޮތުން ދޭ މި އެވޯޑު ލިބޭ ފަރާތްތަކަށް ހާއްސަ އެވޯޑަކާއި ސެޓުފިކެޓެއް ދިނުމަށް ވަނީ ނިންމާފައެވެ. މިއީ 2016ވަނަ އަހަރުން ފެށިގެން ދެމުން އަންނަ އެވޯޑެކެވެ.




ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.