ކުޑަކުދިންނާ ގުޅޭ މައްސަލަތައް މީސްމީޑިއާއަށް ދޫކޮށްލުމަކީ ތަހުގީގަށް އެޅޭ ހުރަހެއް: ފުލުހުން
ކުޑަކުދިންނާ ގުޅޭ މައްސަލަތައް މީސްމީޑިއާއަށް ދޫކޮށްލުމަކީ ތަހުގީގަށް އެޅޭ ހުރަހެއް ކަމުގައި ފުލުހުން ވިދާޅުވެއްޖެއެވެ.
ޕީއެސްއެމްނިއުސްގެ ޕްރޮގްރާމެއްގައި މިއަދު ވާހަކަ ދައްކަވަމުން ޗީފް އިންސްޕެކްޓަރ އޮފް ޕޮލިސް ރިފްޢާން އަޙްމަދު ވިދާޅުވީ، ކުޑަކުދިންނާ ގުޅުން ހުރި އެކި މައްސަލަތައް ބައެއް ފަހަރު ވަރަށް ފަސޭހައިން މީސް މީޑިއާގައި އާއްމުކޮށްލާކަން ފާހަގަކުރެވޭ ކަމަށެވެ.
ނަމަވެސް އެފަދަ މައްސަލަތައް މީސްމީޑިއަށް އެގޮތަށް ދޫކޮށްލުމަކީ ފުލުހުންގެ ތަޙްޤީޤަށް ހުރަސްއެޅި، އެ މައްސަލައެއް ކުރިއަށް ގެންދިއުމުގައި ގިނަ ގޮންޖެހުންތަކަކާ ކުރިމަތިވާކަމެއް ކަމަށާއި އެގޮތަށް އެފަދަ މަޢުލޫމާތުތައް މީސް މީޑިއާގެ އެކި މަންސަތަކުގައި އާއްމުކުރުމުން، އެ މައްސަލައެއްގައި ޝާމިލުވާ ކުށްކުރި ފަރާތަކަށް، ހެކި ނައްތައިލުމަށާއި، ހެއްކަށް ނުފޫޒު ފޯރުވުމުގެ ފުރުޞަތު ލިބިގެންދާކަމަށް ވެސް ރިފްޢާން ވިދާޅުވިއެވެ.
"ކުޑަކުދިންނާއި ގުޅުންހުރި މައްސަލަތަކުގައި އަނިޔާ ލިބޭ ކުއްޖާ ނުވަތަ އެ މައްސަލައިގައި ހިމެނޭ އިތުރު ވިކްޓިމެއްގެ ޒާތީ މަޢުލޫމާތުތައް ވެސް ބައެއް ފަހަރު މީސް މީޑިއާއަށް ވަރަށް ފަސޭހައިން އާއްމުކޮށްލާ. މިހެން މިކަން ކުރުމަކީ އެ މައްސަލައެއްގައި ހިމެނޭ ވިކްޓިމަށާއި އެ ކުއްޖާގެ އާއިލާއަށް ވެސް އިތުރު އިޖުތިމާޢީ މައްސަލަތަކަކާ ކުރިމަތިލާން ޖެހި، ނިޒާމާ މެދު އޮންނަ އިތުބާރު ވަރަށް ބޮޑަށް ގެއްލިގެންދާކަމެއް" ޗީފް އިންސްޕެކްޓަރ އޮފް ޕޮލިސް ވިދާޅުވެއެވެ.
މީގެ އިތުރުން އެ ޕްރޮގްރާމްގައި ވާހަކަ ދައްކަވަމުން އިންސްޕެކްޓަރ އޮފް ޕޮލިސް އަޙްމަދު ޞަފްވަތު ރައޫފް ވިދާޅުވީ، މާކުރިން ހިނގާފައިވާ ބައެއް ޙާދިސާތައް ވެސް މީސް މީޑިއާގައި ފަހަކަށް އައިސް ހިއްސާކުރާ މިންވަރު އިތުރުވެފައިވާ ކަމަށެވެ. އަދި ހިއްސާކޮށްފައިވާ ކަންކަން ވެސް ފުލުހުންގެ ސަމާލުކަމަށް އަންނަ ހިސާބުން، އެ މައްސަލައެއްގެ ތަޙްޤީޤު ފުރިހަމަކުރުމަށް ކުރަންޖެހޭ މަސައްކަތްތައް ފުލުހުން ކުރަމުންދާ ކަމަށް ވެސް އޭނާ ވިދާޅުވިއެވެ.
