އިންކުއަރީގެ ރިޕޯޓު ރަސްމީކޮށް އަދި ރައީސުލްޖުމްހޫރިއްޔާއާ ހިއްސާކޮށްފައެއް ނުވޭ: މަބްރޫކް

ކުރީގެ ރައީސް އަދި މިހާރު ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް ދިން ނިރުބަވެރި ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ހިންގައިފައިވާ އިންކުއަރީގެ "އަންސެންސޯޑް" ރިޕޯޓު ރަސްމީކޮށް އަދި ރައީސް އިބްރާހިމް މުޙައްމަދު ޞާލިޙަށް ލިބިވަޑައިގެންފައި ނުވާ ކަމަށް ރައީސް އޮފީހުގެ ތަރުޖަމާނު މަބްރޫކް ޢަބްދުލްޢަޒީޒް ވިދާޅުވެއްޖެއެވެ.

Ads by MWSC

ނޫސްވެރިން ކުރި ސުވާލަކަށް ޖަވާބު ދެއްވަމުން މަބްރޫކް ވިދާޅުވީ ރައީސް ނަޝީދަށް އަމާޒުކޮށް ދިން ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ހިންގައިފައިވާ އިންކުއަރީގެ ރިޕޯޓު ރަސްމީކޮށް އަދި ރައީސް ޞާލިޙަށް ލިބިވަޑައިގެންފައި ނުވާ ކަމަށެވެ.

"ރިޕޯޓު ފާސް ކުރީ ހުކުރު ދުވަހަށް ފަތިސްވެފައި ވަނިކޮށް ކަމުން، މަޖިލިސް ރިޕޯޓު ރައީސްއަށް ހުށަހެޅުން ލަސްވެފައި ވަނީ ކަމަށް ނުދެކެން" މަބްރޫކް ވިދާޅުވިއެވެ.

ރައީސް އޮފީހުގެ ތަރުޖަމާނު އިތުރަށް ވިދާޅުވީ، ނަމަވެސް މަޖިލީހުން އާންމުކޮށްފައިވާ ރިޕޯޓު ކަމާގުޅޭ އިދާރާތަކުން މިހާރު ދަނީ ދިރާސާ ކުރަމުން ކަމަށެވެ.

މަޖިލީހުގެ އިންކުއަރީ ރިޕޯޓްގައި ރައީސް ނަޝީދަށް ހަމަލާ ދިނުމުގެ ކުރިން އެމަނިކުފާނާ މެދު ކަންތައްތައް ދިމާވަމުން ދިޔަ ގޮތާއި، ހަމަލާ ދިން ދުވަހު ކަންކަން ހިނގާދިޔަ ގޮތާއި، ހަމަލާގެ ފަހުން ކަންކަންވީ ގޮތް ވަރަށް ތަފްސީލުކޮށް ހިމަނާފައިވެއެވެ. އަދި ރައީސް ނަޝީދަށް ހަމަލާދިނުމަށް މަގުފަހިވުމުގައި ދައުލަތުގެ ކަމާ ގުޅުންހުރި އިސްވެރިންނާއި އިދާރާތަކުގެ އިހްމާލު އޮތް މިންވަރު ވެސް 271 ޞަފްޙާގެ އެ ރިޕޯޓުގައި ފާހަގަކޮށްފައިވެއެވެ.