ގިނަ އަހަރު ތަކަކަށް ފަހު "ހުވަދޫ ނިއުސް” އޮންލައިން ނޫހެއްގެ ގޮތުގައި ވުޖޫދަށް
“ހުވަދޫ” ނޫސް އަހަރުތަކަކަށް ފަހު މިރޭ ޑިޖިޓަލް ކޮށްފިއެވެ.
ހުވަދޫ ނޫހުގެ ސީ.އީ.އޯ ހުސެއިން ޝިނާން “ދެން” އަށް މަޢުލޫމާތު ދެއްވަމުން ވިދާޅުވީ ހުވަދޫ ނޫހަކީ ހުވަދު އަތޮޅަށް ޚާއްސަކޮށް އަދި ޖުމްލަކޮށް މުޅި ރާއްޖޭގެ ޚަބަރުތައް ގެނެސް ދިނުމުގެ ބޭނުމުގައި ނެރުނު ނޫހެއް ކަމަށާއި އެ ނޫހުގެ އެންމެ ބޮޑު އަމާޒަކީ ވަކި ފަރާތަކަށް ބުރަ ނުވެ ސައްހަ ޚަބަރު ރައްޔިތުންނާ ހަމަޔަށް ގެނެސް ދިނުން ކަމަށެވެ. މީގެ އިތުރުން ޝިނާން ވިދާޅުވީ ކުޅަދާނަ ލިޔުންތެރިންގެ މަޒްމޫނުތަކާއި ވާހަކަތަކުގެ އިތުރުން ތާރީޚީ ލިޔުންތައް ވެސް އެ ނޫސް މެދުވެރިކޮށް ކިޔުންތެރިންނާ ހަމަޔަށް ގެނެސްދޭނެކަމަށެވެ.
"ހުވަދޫ ވީކްލީ" ގެ ނަމުގައި 2008 ވަނަ އަހަރު ރަޖިސްޓްރީކޮށްގެން ހިންގަން ފެއްޓުނު އެ ނޫހަކީ ހުވަދޫ އަތޮޅަށް ނިސްބަތްވެގެން ފުރަތަމަ ފެށުނު ނޫހެވެ. ތިނަދޫގެ ޒުވާނުންތަކެއްގެ އިސްނެގުމުގެ މަތިން ގިނަ އަހަރުތަކަކަށް ޗާޕްކޮށްގެން މިނޫސް ނެރުމުގެ މަސައްކަތް ކުރިޔަށް ގެންދިޔުމަށް ފަހު އެކި ސަބަބުތަކާ ހުރެ ނޫސް ، ކަރުދާހުގައި ޕްރިންޓު ކުރުމަށް މެދުކެނޑުމެއް ވަނީ އައިސްފައެވެ.
ނޫސްވެރިކަމަށް ހުންނަ ޝައުޤުވެރިކަމުގެ ސަބަބުން، ޚަބަރާއި މައުލޫމާތު ފެތުރުމުގެ މަސައްކަތް ހުއްޓުމަކަށް ނުގެނެއުމަށް، ސޯޝަލް މީޑިޔާގައި، ފޭސްބުކް ޕޭޖެއްގެ ގޮތުގައި "ހުވަދޫ ވީކްލީ" ގެ މަސައްކަތް ކުރިޔަށް ގެންދެވުނެވެ. ނޫސްވެރިކަމުގެ މިމަސައްކަތް މެދުކެނޑުމެއް ނެތި މިއަދާ ހަމަޔަށް ކުރިޔަށް ގެންގޮސްފައި ވަނީ އެނޫހުގެ އެއް ފައުންޑަރ އަލްފާޟިލް މުޙައްމަދު އަޚްތަރެވެ.
“ދެން”އަށް މަޢުލޫމާތު ދެމުން އަޚްތަރު ވިދާޅުވީ ހުވަދޫ ވީކްލީއަކީ އެ އަތޮޅުގެ އެންމެ ފުރަތަމަ ރަޖިސްޓްރީކޮށްގެން ހިންގަން ފެށުނު ފުރަތަމަ ނޫސް ކަމަށެވެ. އަދި އެއީ ވަރަށް ގިނަ ދުވަހުގެ މިންނެތް މަސައްކަތް ކަމަށާއި ހަފްތާ އެކު އެއްފަހަރު ޗާޕް ކޮށް، ނޫސް ކިޔަން ބޭނުންވާ ކޮންމެ މީހަކަށް ނޫސް ލިބޭނެހެން ހިލޭ ނޫސް ބަހައިފައިވާނެ ކަމަށެވެ.
ހުވަދޫ ހޭޝްޓެގް (ހުވަދޫ#) ގެ ނަމުގައި ކާމިޔާބު ސޯޝަލް މީޑިޔާ ކެމްޕެއިނަކަށް ފަހު، "ހުވަދޫ ނޫސް" އޮންލައިން ނޫހެއްގެ ގޮތުގައި މިރޭ މި ވަނީ ފަށައިފައެވެ. ރާއްޖޭގެ އިތުރުން ބޭރު ދުނިޔޭގެ ޚަބަރުތަކާ މަޢުލޫމާތު ގެނެސްދޭ ގޮތަށް ހިންގަން ފެށި އެ ނޫހުގައި ހުވަދު އަތޮޅުގެ ޚަބަރާއި މަޢުލޫމާތު ކަވަރ ކުރުމަށް ޚާއްސަ ސަމާލުކަމެއް ދޭނެ ކަމަށް އެ ނޫހުން މައުލޫމާތު ދެއެވެ. އޭގެ އިތުރުން އެހެން ނޫސްތަކުގައި އަދި މިހާތަނަށް ކުރިޔަށް ގެންގޮސްފައި ނުވާ ގިނަ ކަންތައްތަކެއް ވަރަށް އަވަހަށް ފަށާނެކަމަށް ހުވަދޫ ނިއުސް އިންވަނީ ބުނެފައެވެ.
Ads by STO
