އަވަސް ފިޔަވަޅުތަކެއް ނާޅައިފިނަމަ ބޮޑެތި ގެއްލުންތަކާ ކުރިމަތިލާން ޖެހިދާނެ: ރައީސް ނަޝީދު

މިދިޔަ މެއި މަހުގެ 6 ވަނަ ދުވަހުގެ ހަމަލާއާ ގުޅިގެން ރައްޔިތުންގެ މަޖިލީހުން ތައްޔާރުކުރި އިންކުއަރީ ރިޕޯޓުގައިވާ ކަންކަމަށް ބަލައި އަވަސް ފިޔަވަޅު ނާޅައިފިނަމަ ދިވެހި ރައްޔިތުންނަށް ބޮޑު ގެއްލުމަކާ ކުރިމަތިލާން ޖެހިދާނެކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.

Ads by STELCO

ރައީސް ނަޝިދު އަވާހާރަކޮށްލަން ދިން ޓެރަރިސްޓު ޙަމަލާއާ ގުޅޭ ޕާލަމެންޓަރީ އިންކުއަރީ ރިޕޯޓު ރައްޔިތުންގެ މަޖިލީހުގެ 241 ކޮމިޓީން އެމަނިކުފާނަށް އެރުވުމަށް އޮންލައިންކޮށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ނަޝީދު ވިދާޅުވީ ދިވެހިރާއްޖެއަށް ދިމާވެފައި މިވަނީ ވަރަށް ބޮޑު މައްސަލައެއް ކަމަށާއި ނަޝީދު މަރައިލުމަށް ބަޔަކު ރޭވި ރޭވުމެއް ނާކާމިޔާބުވެގެން ދިޔައީ ކަމަށެވެ. އެހެން ނަމަވެސް އެރޭވުން ކާމިޔާބުގެ ތުންފަތްމައްޗަށް އެމީހުން ގެނައި ކަމަށް ވެސް ރައީސް ނަޝީދު ވިދާޅުވިއެވެ.

މީގެ އިތުރުން ރައީސް ނަޝީދު ވިދާޅުވީ ދިވެހިރާއްޖެއަކީ ބޮންގޮއްވާ ތަނެއްގެ ގޮތުގައްޔާއި ޤައުމުގެ އެކިއެކި ވެރިންނަށް ފަސޭހަކަމާއެކުގައި ޙަމަލާދެވޭ ތަނެއްގެ ގޮތުގައި ދުނިޔެއަށް ފާހަގަވާން ފަށައިފި ނަމަ އޭގެ ސަބަބުން ރާއްޖޭގެ ރައްޔިތުންނަށް ބޮޑެތި ގެއްލުންތައް ލިބޭނެ ކަމަށެވެ. އަދި އިޤްތިސާދާ ގުޅިފައިވާ އެތައްކަމަކަށް ބޮޑު ގެއްލުމެއް ލިބިގެން ހިނގައިދާނެކަން ފާހަގަ ކުރައްވައި ނަޝީދު ވަނީ ހަމަލާއާ ގުޅިގެން ރައްޔިތުންގެ މަޖިލީހުން ތައްޔާރުކުރި އިންކުއަރީ ރިޕޯޓުގައިވާ ކަންކަމަށް ބަލައި އަވަސް ފިޔަވަޅު އެޅުމަށް ގޮވައިލައްވައިފައެވެ.