ނާޒިމް ޕާޓީއެއް އުފައްދަނީ ރައީސް ޞާލިޙް ވެރިކަމަށް ގެންނަށް: އެމްޕީ ޝިޔާމް
ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު ކާނަލް މުހައްމަދު ނާޒިމް ސިޔާސީ ޕާޓީއެއް އުފައްދަވަން އުޅުއްވަނީ ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހް ރައީސް ކަމުގެ އިތުރު ދައުރަކަށް ކުރިމަތިލައްވަން އެމްޑީޕީގެ ޓިކެޓް ލިބުމުގެ ޔަގީންކަން ނެތުމުން އެމަނިކުފާނު އެދިވަޑައިގެން ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޗެނަލް 13ގެ "އެންމެ ފުރަތަމަ ގައުމު" ޕްރޮގްރާމްގައި ވާހަކަދައްކަވަމުން ޝިޔާމް ވިދާޅުވީ ރައީސް ޞާލިހް ވެރިކަމަށް ވަޑައިގަތުމާ ހަމައިން ގަައުމު މިއޮތީ ގަދަ ކަނޑެއްގައި ކަމަށާއި އެ ކަނޑުގައި ދުއްވަމުން މިދަނީ ދިވެހި ރައްޔިތުން ކަމަށެވެ. އަދި ސަރުކާރަށް ތިން އަހަރު ވަމުން ދާއިރު ގާސިމް އިބްރާހިމް ވެސް އެއްޗެއް ވިދާޅުނުވަނީ ސަރުކާރުންވާ ފައިދާއެއް ނުވަތަ ސަރުކާރުން އަޅާ ބައެއް ބޮޑުވެގެން ކަމަށް ގަބޫލު ކުރެވޭ ކަމަށް ވެސް މެމްބަރު ޝިޔާމް ވިދާޅުވިއެވެ.
ޝިޔާމް ވިދާޅުވީ ގާސިމްގެ ޕާޓީގެ މެމްބަރުން ކަމުގައިވާ ދަނގެތީ ދާއިރާގެ މެމްބަރު ކާނަލް ނާޒިމްމެން ތިއްބެވީ ސަރުކާރާ އެއްކޮޅަށް ކަމަށާއި އެބޭފުޅުން އެ ގެންދަވާނީ ސަރުކާރާއެކީގައި ވިޔަފާރި ކުރައްވަމުން ކަމަށެވެ.
"ކާނަލް ނާޒިމް ޕާޓީއެއް އުފައްދަވަން އުޅެނީ ރައީސް ޞާލިޙް ދެވަނަ ދައުރަކަށް ކުރިމަތި ލެއްވުމުގެ ވިސްނުންފުޅު އޮތީތީވެ، ދެވަނަ ދައުރަކަށް ކުރިމަތި ލައްވާއިރު އެމަނިކުފާނުގެ އަމިއްލަ ޕާޓީގައި ހުރި މައްސަަލަތަކެއްހުރީތީވެ. ރައީސް ޞާލިހަށް އެމްޑީޕީގެ ޓިކެޓް ލިބިދާނެކަމުގެ ޔަގީންކަން ނެތުމުން ކާނަލް ނާޒިމް ލައްވާ ޕާޓީއެއް ހައްދުވަނީ" މެމްބަރު ޝިޔާމް ވިދާޅުވިއެވެ.
ރައްޔިތުން މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް އިސްވެ ހުންނަވައިގެން އައު ސިޔާސީ ޕާޓީއެއް އުފައްދަވަން ނިންމަވައި މިއަދު ވަނީ ޖުމްހޫރީ ޕާޓީއިން ވަކިވެވަޑައިގަންނަވައިފައެވެ.
