ދިރުވާލައިގެން ރާއްޖެއަށް ރަން އެތެރެކުރި އިންޑިއާ މީހަކު ދޮޅު އަހަރަށް ޖަލަށް
ދިރުވައިލައިގެން ގިނަ އަދަދެއްގެ ރަން ރާއްޖެ އެތެރެކުރި އިންޑިއާ މީހަކު ދޮޅު އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މިދިޔަ 2020 ވަނަ އަހަރުގެ ފެބްރުއަރީ މަހު ރާއްޖެއައި މި މީހާ ރާއްޖެ އައިއިރު އޭނާގެ ހަށިގަނޑުގައި އެއްޗެއް ފޮރުވާފައިވާ ކަމަށް ޝައްކުވެގެން ކަސްޓަމްސްއިން ޗެކް ކުރިއިރު ދިރުވައިލައިފައިވާ 763 ގްރާމް ރަނާއި އެހެނިހެން މާއްދާތަކެއް ހުރި ބުލެޓްތަކެއް އޭނާގެ ބަނޑު ތެރޭގައި ހުއްޓެވެ.
ކްރިމިނަލް ކޯޓުން އިއްޔެ ކުރި ހުކުމުގައި ވަނީ އޭނާ އެ ދައުވާއަށް އިންކާރު ކުރިޔަސް، ހެކިންގެ ހެކިބަހުން އެ ކުށް އޭނާގެ މައްޗަށް ސާބިތުވާ ކަމަށެވެ. އެހެންވެ، ކަސްޓަމްސްގެ ގާނޫނުގެ ދަށުން އޭނާ އެއް އަހަރާއި ހަ މަހަށް ޖަލަށްލާން ހުކުމްކުރީ ކަމަށް އެ ހުކުމުގައިވެއެވެ. އަދި އޭނާ އެތެރެކުރި ތަކެތި ދައުލަތަށް ނެގުމަށް ވެސް އެ ހުކުމުގައި އަމުރު ކޮށްފައި ވެއެވެ.
ދިރުވައިލައިގެން ރާއްޖެއަށް އެތެރެ ކުރާ އެއްޗެހީގެ ތެރޭގައި އާއްމުކޮށް ހިމެނެނީ މަސްތުވާ ތަކެއްޗެވެ. އެހެން ނަމަވެސް އެ ނޫން ވެސް އެއްޗެހި ދިރުވައިލައިގެން ނުވަތަ އެހެން ގޮތްގޮތުން ހަށިގަނޑު ތެރޭގައި ފޮރުވައިގެން ރާއްޖެ އެތެރެކުރުމުގެ މައްސަލަތައް ފެންމަތި ވެއެވެ.
