ހިިޔާ ފުލެޓް އެއްބަސްވުމުގައި ސޮއިކުރަން ފަށައިފި
ރައީސް އަބްދުﷲ ޔާމީންގެ ވެރިކަމުގައި ހުޅުމާލޭ ދެވަނަ ފޭސްގައި އިމާރާތްކުރި ހިޔާ ފުލެޓް ލިބުނު ފަރާތްތަކާ އެކު ފުލެޓް އެއްބަސް ވުމުގައި ސޮއިކުރަން ފަށައިފިއެވެ.
ހިޔާ މަޝްރޫއުގެ ދަށުން ހުޅުމާލޭގައި އިމާރާތް ކުރީ 25 ބުރީގެ 16 ޓަވަރެވެ. މުޅި ޖުމްލަ 6،720 ފުލެޓް ދޫކޮށްފައިވާ މި މަޝްރޫއުގެ އެއްބަސްވުން ތަކުގައި މިއަދު ސޮއިކުރާނީ ޓަވަރު އެޗް9އިން ފްލެޓް ލިބުނު 118 މީހަކާ އެކުގައި ކަމަށް ހައުސިން ޑިވެލޮޕްމަންޓް ކޯޕަރޭޝަނުން މައުލޫމާތުދެއެވެ.
ފްލެޓް އެއްބަސްވުމުގައި މިއަދު ސޮއިކުރާ މީހުންގެ ލިސްޓު އެޗްޑީސީން އެ ކުންފުނީގެ ވެބްސައިޓުގައި އާންމުކޮށްފައިވާއިރު އޭގައިވާ ގޮތުން އެއްބަސްވުމުގައި ސޮއިކުރާނީ އެއްބަސްވުމުގައި ސޮއިކުރުމަށް ކޮންމެހެން ބޭނުންވާ މައުލޫމާތުގައި ހިމެނޭ ފްލެޓް ލިބިފައިވާ ފަރާތުގެ މައުލޫމާތު ފޯމާއި ފްލެޓްގެ ވެރިފަރާތުގެ ބަދަލުގައި އެއްބަސްވުމުގެ ޒިންމާ އަދާކުރާނެ ފަރާތް ހަމަޖެއްސުމާ ބެހޭ ފޯމު ފުރައި، އެޗްޑީސީއަށް ހުށަހަޅައިފައިވާ ފަރާތްތަކާއެކުގައެވެ.
އެއްބަސްވުމުގައި ސޮއިކުރުމަށް ހާޒިރުވާ ފަރާތްތަކުން ފުލެޓުގެ އެއްބަސްވުމުގައި ސޮއި ކުރާ ފަރާތުގެ އިތުރުން ހެކިވެރިއަކު ގެންނަންވާނެ ކަމަށާއި އަދި ހެކިވެރިއެއްގެ ގޮތުގައި ސޮއިކުރާ ފަރާތުގެ އައި.ޑީ.ކާޑުގެ ދެފުށް ފެންނަ ސާފުކޮޕީއެއް ގެންދަންވާނެކަމަށް އެޗްޑީސީން ވިދާޅުވެއެވެ. އަދި ވެރިފަރާތުގެ ބަދަލުގައި ސޮއިކުރަން "ޕަވަރ އޮފް އެޓަރނީ" އެހެން ފަރާތަކަށް ދެވިފައިވާ ނަމަ، "ޕަވަރ އޮފް އެޓަރނީ" ދިން ފަރާތުގެ އިތުރުން އަދި ހެކިވެރިއަކު ވެސް އެއްބަސްވުމުގައި ސޮއިކުރާއިރު ހާޒިރު ކުރަންވާނެކަމަށް ވެސް އެޗްޑީީސީން ވިދާޅުވެއެވެ.
އެޗްޑީސީން ވިދާޅުވީ އެއްބަސްވުމުގައި ސޮއިކުރުމަށް ހާޒިރުވާއިރު، ކޯވިޑް-19ގެ ޙާލަތާއި ގުޅިގެން ރައްކާތެރިކަމުގެ ފިޔަވަޅެއްގެ ގޮތުން، ގަލަން (ދެލި ނުފޭދޭ، ނޫކުލައިގެ) އަދި އިނގިލީގެ ނިޝާން ޖަހަން ބޭނުން ކުރާ "އިންކްޕެޑް" އަމިއްލައަށް ގެނައުމަކީ އެދެވިގެންވާ ކަމެއް ކަމަށެވެ. މީގެ އިތުރުން އެއްބަސްވުން ސޮއިކުރުމަށް ހަމަޖެހިފައިވާ ހޯލަށް ވަނުމަށާއި ފުލެޓާ ހަވާލުވުމަށް ފުރުޞަތު ދެވޭނީ ފުލެޓުގެ އެއްބަސްވުމުގައި ސޮއިކުރާ ފަރާތްތަކުގެ އިތުރުން ހެކިވެރިއެއްގެ ގޮތުގައި ސޮއި ކުރާ ފަރާތަށް އެކަނިކަމަށް ވެސް އެޗްޑީސީން ވިދާޅުވެއެވެ.
ހިޔާ މަޝްރޫއުގެ ދަށުން އެޅި ފްލެޓްތަކުގެ އެއްބަސްވުމުގަައި ސޮއި ކުރުމުގެ މަސައްކަތް ފަސޭހަކަމާ އެކު ކުރުމަށް "ހިޔާ 7000 ޕޯޓަލް"ގައި ޕާރސަނަލް އެކައުންޓު ހުޅުވުމަށް އެޗްޑީސީން ހިޔާ ފުލެޓު ލިބުނު ފަރާތްތަކުގެ ކިބައިން ވަނީ އެދިފައެވެ. އެޗްޑީސީން ކުރިން ނެރުނު ބަޔާނެއްގައި ވިދާޅުވީ ހިޔާ ފުލެޓު އެއްބަސްވުމުގައި ސޮއި ކުރުމުގައި ހިޔާ 7000 ޕޯޓަލްގެ ބޭނުން ކުރުމުން ފުލެޓު ލިބުނު ފަރާތްތަކަށް ލިޔެކިޔުންތައް ހުށައަޅަށް ފަސޭހަވާނެ ކަމަށާއި ކޮވިޑް19 ސަބަބުން ކުރިމަތިވާ ހުރަސްތަކާ އެކު ވެސް ހުއްޓުމެއް ނެތި އެއްބަސްވުން ތަކުގައި ސޮއިކުރުން ކުރިއަށް ގެންދެވޭނެ ކަމަށެވެ.
