"ވަކިވީ ނުހަނު ހިތްޕުޅު ހެޔޮ އެދުރެއް"
ރާއްޖޭގެ މަޝްހޫރު ދީނީ ޢިލްމުވެރިޔާ އައްޑޫ ސިޓީ މީދޫ ދެކުނުގެ، ޝެއިޚް ޖައުފަރު ފާއިޒް ރޭ މެންދަމު އަވަހާރަވެއްޖެއެވެ.
އެނގިފައިވާ ގޮތުގައި ޝެއިޚް ޖައުފަރު އާލާސްކަންފުޅާ އުޅުއްވާތީ ފަރުވާ ދެމުން ގެންދިޔަތާ މަހަކަށް ވުރެ ގިނަ ދުވަސް ވެއްޖެއެވެ. ކޮވިޑް-19އަށް ފައްސި ވުމުގެ ސަބަބުން ހުޅުމާލޭ މެޑިކަލް ފެސިލިޓީގައި މީގެ ކުރިން ވެސް ޝައިޚަށް ފަރުވާދީފައި ވެއެވެ. އޭގެ ފަހުން ދަރުމަވަންތަ ހޮސްޕިޓަލްގެ 11 ވަނަ ފަންގިފިލާގައި ވެސް ޝެއިޚް އެޑްމިޓު ކުރިއެވެ.
ދީނީ ޢިލްމުވެރިޔާ ޝެއިޚް ޖައުފަރު އަވަހާރަވުމުން އެކަމާ އެތައް ބަޔަކު ދަނީ ހިތާމަފާޅު ކުރަމުންނެވެ.
އޭގެ ތެރެއިން ހިމެނޭ އެކަކީ، ދިވެހިބަހުގެ އެކެޑެމީގެ ރައީސް ޢަޝްރަފް އަލީ (އަޝްރަފް ސަރ)އެވެ.
ޝެއިޚް އަވަހާރަވުމާ ގުޅިގެން އަޝްރަފް ސަރ ފޭސްބުކްގައި ކުރެއްވި ޕޯސްޓެއްގައި ވިދާޅުވީ، ލޯބިވާ މުދައްރިސް، އައްޝައިޚް ޖައުފަރު ފާއިޒް(ޖައުފަރު ސަރ) އަވަހާރަވި ޚަބަރު އެއްސެވީ ފުން ހިތާމަޔާ އެކުގައި ކަމަށެވެ.
"ޖައުފަރުސަރއަކީ މަދަރުސަތުލް ޢާލިޔާގައި 1990ގެ އަހަރުތަކުގައި، އަޅުގަނޑު ފަދަ އެތައް ދަރިވަރަކަށް އުނގަންނަވައިދެއްވި މުދައްރިސެކެވެ. ހިތްޕުޅު ހެޔޮ އެދުރެކެވެ. ހިނިތުންވެވަޑައިގަންނަވަމުން މެނުވީ ބަސްފުޅެއް ވިދާޅުވި ތަނެއް ދުވަހަކު ވެސް އަޅުގަނޑެއް ނުދެކެމެވެ. އަބަދުވެސް ފެންނަނީ ހުދު ސާފު ހެދުންކޮޅުގައި ހުންނަވަނިކޮށެވެ. ޖައުފަރު ސަރގެ ހިތްޕުޅު ވެސް ހަމަ އެހައި ސާފުކޮށް ފެންނަ ފަދައެވެ." އަޝްރަފް ސަރ ލިޔުއްވައިފައި ވެއެވެ.
"ހަނދާންވާ ގޮތުން މުދައްރިސް ކިޔަވައި ދެއްވީ އިޖުތިމާޢީ ޢިލްމެވެ. އާދެ! ސޯޝަލް ސްޓަރޑީޒެވެ. އެހެނެއްކަމަކު މުދައްރިސްގެ ގަޑި ވެފައިވަނީ އިލްމުގެ ކަނޑެއްގައި އުޅެވޭ ފަދަ ވަގުތުތަކަކަށެވެ. އަބަދުވެސް ނަސޭހަތް ދެއްވައެވެ. އިސްލާމީ ރިވެތި އަޚްލާޤީ ސިފަތައް މަތީ އުޅެން ކުދިންނަށް ނަސޭހަތް ދެއްވައެވެ. ދުނިޔެ މިއީ ދާއިމް ތަނެއް ނޫންކަމާއި ވަގުތީ މަންޒިލެއްކަން މުދައްރިސް އަބަދުވެސް ވިދާޅުވެ ދެއްވައެވެ.
ޒަމާންތަކެއް ވާންދެން މުދައްރިސް ނުފެނި ދެން ޝެއިޚް ޖައުފަރާ ދިމާވީ ބަހުގެ އެކެޑަމީން ކަމަށް އަޝްރަފް ސަރ ވިދާޅުވިއެވެ. އަދި އެ ދުވަހު ޝެއިޚް ވަޑައިގެންނެވީ ވެސް އަޝްރަފް ސަރއާ ބައްދަލު ކުރައްވަން ކަމަށް ވެސް ވިދާޅުވިއެވެ.
އަޝްރަފް ސަރ ވިދާޅުވީ އޭރު ޝެއިޚް ޖައުފަރު ބައްދަލު ކުރެއްވީ، އަރަބިބަހުން ދިވެހިބަހަށް ތަރުޖަމާ ކުރައްވަމުން ގެންދެވި ލިޔުންތަކެއްގެ ދިވެހިބަހުގެ ހަމަތައް އަޅުގަނޑަށް ބަލައިލަދެވިދާނެތޯ ސާފުކޮށްލެއްވުމުގެ ބޭނުންފުޅުގައެވެ. ހަނދާންވާ ގޮތުން އެއީ ކީރިތި ޤުރުއާނުގެ ކަހްފް ސޫރަތުގެ ތަފްސީރުކަމަށް އަޝްރަފް ސަރ ވިދާޅުވިއެވެ. ޝެއިޚް ގެނެސްދެއްވި ތަރުޖަމާ ލިޔުންތައް ބަލައި ދެއްވި ކަމަށާއި އެކަމާ ގުޅޭގޮތުން ފެންނަ އެއްޗެއް ދެންނެވުމުން "އަޅުގަނޑަށް ހިތަށް ވެސް ނުގެނެވިފައި ހުރި ވަރަށް ގިނަ ކަންކަން އަޝްރަފް ތިޔަ ހުރީ ފާހަގަ ކުރައްވައިފައި" މިހެން ވިދާޅުވެ ޝުކުރު އަދާ ކުރެއްވި ކަމަަށް ވެސް އަޝްރަފް ސަރ ވިދާޅުވިއެވެ.
ލޯބިވާ މުދައްރިސެވެ! ތިބާ ތިޔަ ވަޑައިގަތީ އެތައް ހިތެއް ރޮއްވައިފައެވެ. ދުނިޔެ މިއީ ވަގުތީ މަންޒިލެއްކަން ތަކުރާރުކޮށް ހަނދާން އައުކޮށް ދެއްވައިފައެވެ. ހެޔޮ ދުޢާ ކުރަމެވެ. ޖަންނަތުލް ފިރުދައުސްގެ މަތިވެރި ނިއުމަތުގައި ލޯބިވާ މުދައްރިސް ލައްވާށިއެވެ.