އިއްޒުއްދީން ސުކޫލުގެ ޕްރިންސިޕަލް ޓީޗަރުންތަކަކަަށް ޖިންސީ ގޯނާ ކުރިކަމުގެ ތުހުމަތު
އިއްޒުއްދީން ސުކޫލުގެ ޕްރިންސިޕަލް އެސުކޫލުގެ 4 ޓީޗަރަކަށް ޖިންސީ ފުރައްސާރަ ކޮށްފައިވާކަމަށް ބުނެ އެ ޓީޗަރުންގެ ފަރާތުން މިނިސްޓްރީ އޮފް އެޑިއުކޭޝަންގެ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީއަށް މައްސަލަ ހުށަހެޅުމުން އެ ޓީޗަރުން އެހެން ސުކޫލަކަށް ބަދަލުކޮށް ތުހުމަތު ކުރެވުނު ޕްރިންސިޕަލް އިއްޒުއްދީން ސުކޫލަށް ވުރެ މާ ބޮޑު ސުކޫލަކަށް ބަދަލުކޮށްފައިވާކަމަށް ޓީޗާރސް އެސޯސިއޭޝަނުން ބުނެފިއެވެ.
އެ އެސޯޝިއޭޝަނުން ނެރުނު ބަޔާނެއްގައި ބުނީ އިއްޒުއްދީން ސްކޫލުގައި މަސައްކަތްކުރި ޕްރިންސިޕަލް އެ ސުކޫލުގައި މަސައްކަތްކުރާ 4 ޓީޗަރަކަށް ޖިންސީ ފުރައްސާރަ ކޮށްފައިވާތީ، އެ 4 ޓީޗަރުންގެ ފަރާތުން އެ މައްސަލަ މިނިސްޓްރީ އޮފް އެޑިއުކޭޝަންގެ ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ކޮމިޓީއަށް ހުށަހެޅިކަމަށާއި އެކޮމިޓީއިން މައްސަލަ ބައްލަވައި، އިއްޒުއްދީން ސުކޫލުގެ ޕްރިންސިޕަލް އިސްމާޢީލް ނަސީރުގެ ފުށުން ޖިންސީ ފުރައްސާރަ ކުރުމުގެ އަމަލެއް ހިންގިކަމުގައި ބުރަވެވެން އޮތްކަމަށް ނިންމަވައި، ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނުގެ 22 ވަނަ މާއްދާގެ ދަށުން ފިޔަވަޅު އަޅަން ފެންނަ ކަމަށް މައްސަލަ ބެލި ކޮމެޓީގެ އިއްތިފާޤުން ނިމިފައިވާކަމުގައި އަންގައިފައިވާ ކަމަށެވެ.
އެހެން ނަމަވެސް މައްސަލަ ރައްދުވި ފަރާތުގެ މައްޗަށް އެޅި ފިޔަވަޅަކީ ކޮބައިކަން މައްސަލަ ހުށަހެޅި ފަރާތަށް އަންގާފައެއް ނުވާ ކަމަށާއި އަދި އޭނާ މިހާރު އިއްޒުއްދީން ސުކޫލަށް ވުރެ މާ ބޮޑު ސުކޫލަކަށް ބަދަލުކޮށްފައިވާކަމުގެ މައުލޫމާތު ވަނީ ލިބިފައިވާކަމަށް އެ އެސޯސިއޭޝަނުން ބުނެއެވެ. އަދި މިކަމަކީ އޭގެ
ޒާތުގައި ފިޔަވަޅަކަށް ވުރެ ބޮޑަށް ޕްރޮމޯޝަނެއްކަމަށް ސިފަވާކަން ފާހަގަކުރާކަމަށް ވެސް އެބަޔާނުގައިވަ ނީ ބުނެފައެވެ.
"މައްސަލަ ހުށަހެޅި 4 ފަރާތް އެހެން ސުކޫލަކަށް ބަދަލުކުރަން އުޅޭކަމުގެ މައުލޫމާތު ލިބި އެކަން އެގޮތަށް ނުކުރުމަށް އިލްތިމާސްކޮށް މިނިސްޓްރީ އޮފް އެޑިއުކޭޝަން އަދި ސިވިލް ސަރވިސް ކޮމިޝަނަށް މިޖަމްޢިއްޔާއިން ސިޓީ ފޮނުވާފައިވަނިކޮށް، މައްސަލަ ހުށަހެޅި 4 ފަރާތް ވަނީ އެހެން ސުކޫލުތަކަށް ބަދަލުކޮށްފައެވެ." އެބަޔާނުގައި ބުނެފައިވެއެވެ.
ޓީޗާރސް އެސޯސިއޭޝަނުން ބުނީ ޖިންސީ ފުރައްސާރަކުރުމާ ގޯނާ ކުރުން ހުއްޓުވުމުގެ ޤާނޫނުގެ 6 ވަނަ މާއްދާގެ (ށ) ގައި ޖިންސީ ފުރައްސާރަކުރުމުގެ ޢަމަލަކާ ގުޅިގެން ޤާނޫނުގެ ދަށުން ބެލޭ މައްސަލައެއްގައި އެފަދަ މައްސަލައެއް ހުށަހަޅާ ފަރާތަކަށް ނުވަތަހެކިބަސްދޭ ފަރާތަކަށް ނުވަތަ އެފަދަ މައްސަލައެއް ހުށަހަޅާ ފަރާތަކަށް އެހީތެރިކަން ފޯރުކޮށްދޭ ފަރާތަކަށް އެސަބަބަށް ޓަކައި ވަޒީފާ ލިބުމުގެ ފުރުޞަތުން ނުވަތަ ވަޒީފާގައި ދެމިހުރުމުގެ ޙައްޤަށް ނުވަތަ ވަޒީފާގެ ކުރިއެރުން ލިބުމުގެ ފުރުޞަތުން ނުވަތަ ވަޒީފާއަދާކުރާ ފަރާތްތަކަށް ލިބިދޭންޖެހޭ އެ ނޫން ވެސް ޙައްޤަކުން އެއިން ފަރާތް މަހުރޫމްކޮށްގެން ނުވާނެކަމަށް ބަޔާންކޮށްފައިވާ ކަމަށާއި އަދި ހަމަ އެޤާނޫނުގެ 7 ވަނަ މާއްދާގެ ދަށުން ވަޒީފާދޭ ފަރާތުގެ ސަމާލުކަމަށް މިފަދަ ކަމެއް އަތުވެއްޖެނަމަ އެ ޢަމަލެއް އެމީހަކާމެދު ހިންގުނު ފަރާތަށް އިތުރު ގެއްލުމެއް ލިބުނަ ނުދީ އެފަދަ ކަންކަން ހުއްޓުވުމަށް ވަޒީފާދޭ ފަރާތުން ފިޔަވަޅު އަޅަންޖެހޭކަމަށް އޮންނަ އިރު މައްސަލަ ހުށަހެޅި ފަރާތްތައް އެހެން ސުކޫލުތަކަށް ބަދަލުކޮށްފައި ވަނީ މައްސަލަ ހުށަހެޅި ފަހުން އެފަރާތްތަކުގެ އެއްވެސް ބަހެއް ހޯދުމަކާ ނުލާ ކަމުގައެވެ. އަދި މިއީ އެފަރާތްތައް ޖިންސީ ފުރައްސާރައިގެ މައްސަލަ ހުށަހެޅުމުން އެފަރާތްތަކާމެދު ނުހައްގުން އެޅިފައިވާ ފިޔަވަޅެއްކަމަށް ބެލެވޭކަމަށް ވެސް އެ އެސޯސިއޭޝަނުން ބުނެއެވެ.
މީގެ އިތުރުން މިފަދަ ކަންކަން މިގޮތަށް ހިނގަމުން ދާނަމަ، މިކަމަކީ މައްސަލަ ހުށަހެޅުމުން ލިބުނު އަދަބެއް ކަމުގައި ބެލެވި، މިފަދަ އަމަލުތައް ތަހައްމަލްކުރަން ޖެހިފައިވާ އެހެނިހެން ފަރާތްތައް ވެސް މިފަދަ މައްސަލަތައްހުށަހެޅުމަށް ބިރުގަނެ، ޖެހިލުންވުމަކީ އެކަށީގެންވާ އަދި މިއީ ޖިންސީ ފުރައްސާރަކުރުމާ ގޯނާ ކުރުން ހުއްޓުވުމުގެ ޤާނޫނުގެ މަޤްސަދާވެސް ކަނޑައެޅިގެން ޚިލާފުކަމެއްކަމަށް ވެސް މިބަޔާނުގައި ވަނީ ބުނެފައެވެ.
