ފުލުހުންގެ ގިނަ ޕްރޮޖެކްޓްތަކެއް ހިންގުމަށް އިންޑިއާ ކުންފުންޏަކާ އެކު ސޮއިކޮށްފި
ދިވެހި ފުލުހުންގެ މުއައްސަސާއަށް ބޭނުންވާ އުމްރާނީ ތަރައްގީގެ ގިނަ ޕްރޮޖެކްޓްތަކެއް ހިންގުމަށް އިންޑިއާގެ ކުންފުންޏަކާއެކު 48 މިލިއަން ޑޮލަރުގެ އެއްބަސްވުމެއްގައި ސޮއިކޮށްފިއެވެ.
އޭބީއެލް އިންދިރާ ޕްރޮޖެކްޓްސް ޖޭވީއާ އެކު މިއަދު ވެވުނު އެއްބަސްވުމުގައި އެ ކުންފުނީގެ ފަރާތުން ސޮއިކުރެއްވީ އެ ކުންފުނީގެ ފައުންޑާ އަދި ޗެއާމަން ބުޕޭޝް ނާގަރާޖަން ކަމަށް ފުލުހުން ބުނެއެވެ. އަދި ދިވެހި ފުލުހުންގެ ފަރާތުން ސޮއިކުރެއްވީ ފުލުހުންގެ ކޮމިޝަނަރ މުހައްމަދު ހަމީދުކަމަށް ވެސް ފުލުހުން މައުލޫމާތުދެއެވެ.
މިއެއްބަސްވުމުގެ ދަށުން ހިންގާ ޕްރޮޖެކްޓްތަކުގެ ތެރޭގައި ކ. ދޫނިދޫގައި އިމާރާތްކުރާ ކަސްޓޯޑިއަލް ފެސިލިޓީއާއި މިހާރު ވެސް ބޭނުންކުރަމުންދާ ދެ އިމާރާތެއް އުމްރާނީގޮތުން އިތުރަށް ތަރައްގީ ކުރުމާއި އަތޮޅު ތެރޭގެ ރަށްރަށުގައި އިމާރާތްކުރާ 23 ޕޮލިސް ސްޓޭޝަނާއި 21 ޕޮލިސް ޕޯސްޓްގެ އިތުރުން 8 އަތޮޅު ޕޮލިސް ސްޓޭޝަނާއި މާލޭގައި އިމާރާތްކުރާ ޕޮލިސް ސްޓޭޝަނަކާއި ހުޅުމާލެ ފޭސް ދޭއްގައި އިމާރާތްކުރާ ޕޮލިސް ސްޓޭޝަނަކާއި ހަތަރު އެކޮމޮޑޭޝަން އިމާރާތާ އެކު ޖުމްލަ 61 ޕޮލިސް ފެސިލިޓީ އިމާރާތް ކުރުމަށް ވަނީ ހަމަޖެހިފައެވެ.
މި ޕްރޮޖެކްޓްތައް ނިންމައިލާން ދެ އަހަރުގެ މުއްދަތެއް ދީފައިވާއިރު މި އެއްބަސްވުމުގެ ދަށުން ބައިނަލްއަގުވާމީ މިންގަނޑުތަކާ އެއްގޮތަށް މީހުން ބަންދުކުރެވޭނެ ވަސީލަތްތައް ގާއިމުވެ، އަސާސީ ގޮތުން ފުލުހުންގެ މަރުކަޒުތަކުގައި ހުންނަންޖެހޭ ކަންކަން ފުރިހަމަވެގެން ދާނެ ކަމަށްވެސް ފުލުހުން ބުނެއެވެ.
