ރައީސް ނަޝީދުގެ ހާލުކޮޅު ބައްލަވަން ރައީސް ޞާލިޙް ނުގުޅުއްވާ!
މެއި ހަވަނަ ދުވަހު ރައީސް ނަޝީދަށް އަމާޒުކޮށް ދިން ނިރުބަވެރި ހަމަލާގައި ލިބުނު ޒަޚަމްތަކަށް ފަރުވާ ހޯއްދަވަން ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ޖަރުމަނަށް ވަޑައިގެންނެވި ފަހުން ރައީސް ނަޝީދުގެ ހާލުކޮޅު ބައްލަވަން ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް ނުގުޅުއްވާ ކަމަށް ބިލެތްދޫ ދާއިރާގެ މެންބަރު އަޙްމަދު ޙަލީމް (ދޮންބިލެތް) ވިދާޅުވެއްޖެއެވެ.
މިރޭ ކުރެއްވި ޓްވީޓެއްގައި ދޮންބިލަތް ވިދާޅުވީ، ރައީސް ނަޝީދު ޖަރުމަނަށް ވަޑައިގެންފަހުން ރައީސް ޞާލިޙް ރައީސް ނަޝީދުގެ ހާލު ބައްލަވައިލައްވަން އެއްވެސް ގޮތަކަށް ގުޅުއްވައިފައި ނުވާކަން ރައީސް ނަޝީދު މިއަދު ވިދާޅުވި ކަމަށެވެ، އަދި އެކަމާ ވަރަށް ދެރަފުޅުވެ ވަޑައިގެންނެވި ކަމަށާއި ހައިރާންވެ ވަޑައިގެންނެވި ކަމަށް ވެސް ވިދާޅުވިއެވެ.
މިގޮތަށް ވިދާޅުވެ ދޮންބިލަތް ކުރެއްވި ޓްވީޓް، ރައީސް ނަޝީދު ގެންގުޅުއްވާ ފޭކް އެކައުންޓް "އެލެކްސް އަހްމަދު" ހޭންޑަލްއިން ވަނީ ރީޓްވީޓް ކުރައްވައިފައެވެ. އަދި އެމްޑީޕީގެ ބައެއް މެންބަރުން ވެސް މި ޓްވީޓް ރީޓްވީޓްކޮށް ކަންބޮޑުވުން ފާޅު ކުރަމުންދެއެވެ.
ދޮންބިލަތްގެ ޓްވީޓަށް ރިޕްލައި ކުރައްވަމުން ރައީސް ނަޝީދުގެ ވެރިކަމުގައި ޓްރާންސްޕޯޓް މިނިސްޓަރުކަން ކުރެއްވި އާދިލް ސަލީމް ވިދާޅުވީ، ރައީސް ވަހީދުއަށް ބާޣީއަށް ގޮވުމުން ވެސް ރައީސް ޞާލިޙް ރައީސް ވަހީދަށް ވެސް ގުޅުއްވިކަމަށެވެ. އެމްޑީޕީއަށް ނިސްބަތްވާ ރާއްޖޭގެ އެންމެ އިސް ދެ ބޭފުޅުން ނުގުޅުއްވާ ވާހަކަ އަޑު އެހީ ހިތާމައާއެކު ކަމަށް ވިދާޅުވެ، އާދިލް ވިދާޅުވީ، ޒޫމް ނުވަތަ ގޫގްލް ކޯލަކުން ދެ ބޭފުޅުން ގުޅުއްވާ މަންޒަރު ދެކެން ބޭނުންވާ ކަމަށެވެ.
ރައީސް ނަޝީދަށް ނުގުޅުއްވާ ކަމަށް ވިދާޅުވެ ދޮންބިލަތް ޓްވީޓް ކުރައްވާފައިވާއިރު، ސިޔާސީ ގޮތުން ރައީސް ޞާލިޙާއެކު މަސައްކަތް ކުރެވެން ނެތް ކަމަށް ދާދިފަހުން ނަޝީދު ވަނީ ވިދާޅުވެފައެވެ. އަދި އޭގެފަހުން ރައީސް ނަޝީދަށް ތާޢީދު ކުރައްވާ އެމްޑީޕީގެ ބޭފުޅުން ދަނީ ސަރުކާރަށް ފާޑު ވިދާޅުވަމުންނެވެ.
ކަނބުލޯ ޙާލެއެް ނެތޭ ހަމަ ބުނެލުމުންދޯ! ރަތް ހާލެއް ހިފައިގެން ގޮވާލަން ދިޔާޔޯ! ހާލު ބަލަން ޖެހޭ ވަރަށްވުރެ ރަގަޅު ކަމަށް ފެންނާތީވެ، ރައީސް ނުގުޅުއްވަނީ. މިހާރު ހުރީވެސް ހާރޑިންގހަމްގެ ފައްޅީގައި އިގިރޭސި ވިލާތުގައި ވިއްޔާ! ދޮން ބިލެތް ލައި ދުފާ ރަތް ކޮއްލައިގެން ވިއްޔާ! ދެން ބަލަން އޮތީ ކޮން ހާލެއްތަ؟