ރާއްޖޭގައި ބަރުލަމާނީ ނިޒާމެއް އޮންނަންޖެހޭނެ ކަމަށް ގަބޫލެއްނުކުރަން: ރައީސް މައުމޫން
ރާއްޖޭގައި ބަރުލަމާނީ ނިޒާމެއް އޮންނަން ޖެހޭނެ ކަމަށް ގަބޫލުފުޅު ނުކުރައްވާ ކަމަށާއި ރާއްޖޭގައި ބޮޑު ވަޒީރަކު ހުންނަން ޖެހޭނެކަމަށް ވެސްގަބޫލުފުޅު ނުކުރައްވާކަމަށް ކުރީގެ ރައީސް ، ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ކުރިން ބަރުލަމާނީ ނިޒާމު މިގައުމަށް ރަނގަޅު ކަމަށް ވިދާޅުވި ނަމަވެސް މިހާރު އެކަން އޮތީ އެހެން ނޫން ކަމަށެވެ.
"އޭރު އެމައްސަލައަށް ބަހުސްކުރީ އާ ގާނޫނު އަސާސީ ހެދި އިރު ރާއްޖޭގައި އޮންނަން ޖެހޭނީ ކޮންކަހަލަ ނިޒާމެއްތޯ. ރިޔާސީ ނިޒާމުތޯ ބަރުލަމާނީ ނިޒާމުތޯ ދެން ވަޒީރުންގެ މަޖިލީހުގައި ވެސް އަޅުގަނޑު ހަމަ ވާހަކަ ދައްކައިގެން ވަރަށް ބޮޑަށް ބައިބައިވެފަ އޮތީ ހުރިހާ ބޭފުޅުންނަކަށް އެއް ގޮތަކަށް ވާހަކައެއް ނުދެއްކުނު. އެހެންވީމަ އަޅުގަނޑު ހިތަށް އެރި އެ ޑިބޭޓުގައި ބައިވެރިވާން އަޅުގަނޑު ވެސް ފުރަތަމަ ވާހަކަ ދައްކާނަމޭ. އެހެންވީމަ އޮންނާނެ އެ ވާހަކަ ދައްކާފަ މިއީއޭ ރާއްޖެއަށް ރަނގަޅު ގޮތަކީ. އެއީކީ ކޮންމެހެން ދާއިމަށް ރަނގަޅުގޮތެއްކަމުގައި ވާތީއެއް ނޫން އެއީ އެ ޑިބޭޓުގައި ބައިވެރިވުމަށް ޓަކައި." ރައީސް މައުމޫން ވިދާޅުވިއެވެ.
ރައީސް މައުމޫން ވިދާޅުވީ ރާއްޖޭގައި އޮންނަން ފެންނަ ނިޒާމު ވަނީ ރައްޔިތުން ވަރަށް ފުރިހަމައަށް ނިންމައިފައި ކަމަށާއި އެހެންކަމުން އެނިޒާމު ބަދަލުވެދާނެކަމަށް ގަބޫލުފުޅު ނުކުރައްވާކަމަށެވެ.
"ރައްޔިތުން ވަރަށް ފުރިހަމަކޮށް ނިންމައިފައި ވަނީ ރާއްޖޭގައި އޮންނާނީ ރިޔާސީ ނިޒާމުކަމަށް. އެހެންވީމަ ރާއްޖޭގައި މިހާރު މިއޮތީ ރައްޔިތުން ނިންމިގޮތަށް . ރައްޔިތުން ނިންމީ ރާއްޖޭގައި އޮންނާނީ ރިޔާސީ ނިޒާމުކަމަށް އެހެންވީމަ އަޅުގަނޑު ގަބޫލެއް ނުކުރަން ރާއްޖޭގެ މި ނިޒާމު ބަދަލުވެދާނެކަމަކަށް." މައުމޫން ވިދާޅުވިއެވެ.
އެއާ އެކު ރާއްޖޭގައި ބޮޑު ވަޒީރެއް ހުންނަން ޖެހޭކަމަށް ގަބޫލުފުޅު ނުކުރައްވަންތޯ ޕްރެޒެންޓަރ ކުރެއްވި ސުވާލަށް އެ މަނިކުފާނު ވިދާޅުވީ ގަބޫލުފުޅު ނުކުރައްވާކަމަށެވެ.
އިތުރަށް ވާހަކަފުޅު ދައްކަވަމުން އެ މަނިކުފާނު ވިދާޅުވީ ރާއްޖޭގެ ޖަލުތަކުގައި ލާއިންސާނީ އަނިިޔާތައް ދެމުންދާ ވާހަކައަކީ އެމަނިކުފާނުގެ ދައުރުގައި ވެސް އިވޭ ވާހަކައެއް ކަމަށާއި އެހެން ނަމަވެސް ޖަލުތަކުގައި ލާއިންސާނީ އަނިޔާ ދިނުމަކީ ގަބޫލުުކުރައްވާ ކަމެއް ނޫން ކަމަށެވެ. އަދި ޖަލުގައި ބަޑި ޖެހީ އެ މަނިކުފާނުގެ އޯޑަރަށް ނޫންކަމަށް ވެސް މި ފްރޮގްރާމްގައި އެމަނިކުފާނު ވިދާޅުވިއެވެ.
އެހެންނަމަވެސް ރައީސް މައުމޫންގެ ޒައާމަތުގައި ރާއްޖޭގެ ޖަލުތަކުގައި ލާއިންސާނީ އަނިޔާ ދިން ވާހަކައަކީ ގިނަބަޔަކު އަދިވެސް ދައްކާ ވާހަކައެކެވެ. އަދި އެއީ އެ މަނިކުފާނުގެ 30 އަހަރުވީ ދިގު ވެރިކަމާ ދެކޮޅަށް ގިނަ ބަޔަކު ނުކުންނަން ޖެހުނު އެއް ސަބަބުކަމުގައި ރާއްޖޭގެ ސިޔާސީ މަޝްރަހު ދިރާސާ ކުރައްވާ ފަރާތްތަކުން ބުނެއެވެ.
