ޑިސެމްބަރު މަހުން ފެށިގެން ހިޔާ ފުލެޓުތަކުގެ ކުލި ނަގަން ފަށަނީ
އަންނަ ޑިސެމްބަރު މަހުން ފެށިގެން ހިޔާ ފުލެޓުތަކުން ކުލި ނަގަން ފަށާނެ ކަމަށް ހަައުސިން ޑިވެލޮޕްމަންޓް ކޯޕަރޭޝަނުން ވިދާޅުވެއްޖެއެވެ.
ރޭ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަޙުމަދު ވިދާޅުވީ ހިޔާ ފުލެޓުތަކަށް ކުލި ދައްކަން ނުޖެހޭ މުއްދަތު ގުނަން ފަށާނީ އަންނަ ސެޕްޓެމްބަރު މަހުގެ 1 ވަނަ ދުވަހުން ފެށިގެން ކަމަށާއި ފުލެޓުތަކަށް ކުލި ދައްކަން ޖެހޭނީ ޑިސެމްބަރު މަހުން ފެށިގެން ކަމަށެވެ.
ހިޔާ މަޝްރޫގެ ފުލެޓުތައް ދިނުމުގެ އެއްބަސްވުންތަކުގަައި ސޮއިކުރަމުން ދާއިރު ބައެއް ފަރާތްތަކަށް މިހާރު ވަނީ ފުލެޓްގެ ތަޅުދަނޑިތައް ވެސް ހަވާލުކޮށްފައެވެ. މި ފުލެޓުތަކުގެ ފިނިޝިންއަށް 3 މަސްދުވަހުގެ މުހުލަތެއް ދީފައިވެއެވެ. މި މުއްދަތުގައި ކުލި ނުނަގާނެކަމަށް ވެސް އެޗްޑީސީން މީގެ ކުރިން ވިދާޅުވެފައި ވެއެވެ.
ރައީސް ޔާމީނުގެ ސަރުކާރުގައި އަޅައި ނިންމައިފައިވާ ހިޔާ ފުލެޓުތައް ނުދެވި ލަސްވެފައި ވުމުގެ ޝަކުވާ ބޮޑުވެފައިވާއިރު ފުލެޓުގެ ތަޅުދަނޑި ލިބުނު ނަމަވެސް އަދިވެސް އެ ތަނަށް ނުވަދެވޭކަމުގެ ޝަކުވާތައް ވެސް ދަނީ ކުރަމުންނެވެ.
މީގެ އިތުރުން ފުލެޓުތަކުގެ ކުލި ބޮޑުކަމުގެ ޝަކުވާތަކާ އެކު ހިޔާ ފްލެޓްތަކުގެ މަހު ކުލި ކުޑަކޮށްދޭން މަޖިލީހަށް ހުށަހެޅުމަށް ޓަކައި ރައްޔިތުންގެ މަޖިލީހުގެ މެޖޯރިޓީ ލީޑަރު އަލީ އާޒިމްއަށް ޕެޓިޝަނެއް ވެސް ވަނީ ހަވާލުކޮށްފައެވެ،
ފްލެޓްތަކުގެ ކުއްޔަށް 7،500 ރުފިޔާ ނަގާ ގޮތަށް ވަނީ ހަމަޖެހިގައެވެ. މީގެ އިތުރުން މެއިންޓެނެންސް ފީއަށް ނަގާ 1،000 ރުފިޔާއާ އެކު ޖުމްލަ 8،500 ރުފިޔާ މަހަކު ދައްކަން ޖެހޭނެއެވެ.
