ކުށުގެ ރިކޯޑް ބަލާ މުއްދަތު 3 އަހަރަށް ކުޑަ ކޮށްފި
ކުށުގެ ރިކޯޑް ބެލުމާއި ދޫކުރާ މުއްދަތު ފަސް އަހަރުން ތިން އަހަރަށް ކުޑަ ކޮށްފިއެވެ.
މިދިޔަ ހޮނިހިރު ދުވަހު ހޯމް މިނިސްޓްރީން ގެޒެޓްކުރި "ޕޮލިސް ރިކޯޑު ބެލެހެއްޓުމާއި ދޫކުރުމުގެ ގަވާއިދު" އާންމުކޮށްފައި ވަނީ ކުރިން އަމަލު ކުރަމުން އައި ގަވާއިދަށް ވުރެ މާ ބޮޑަށް ތަފްސީލުކޮށްފައެވެ. އެ ގޮތުން މިފަހަރުގެ ޤަވާއިދުގައި ރިކޯޑް ބެލެހެއްޓުމާއި ފޯރުކޮށްދެވޭނެ ގޮތްތަކާއި ހިމަނަން ޖެހޭ މައުލޫމާތު ލިޔެފައިވެއެވެ.
ހޯމް މިނިސްޓްރީން ގެޒެޓްކުރި މި ޤަވާއިދުގައި ބުނެފައިވާ ގޮތުގައި ކުށުގެ ރިކޯޑު ބެލުމާއި ދޫކުރުމުގެ މުއްދަތު ތިން އަހަރަށް ކުޑަ ކުރި ނަމަވެސް، ބޭނުން ވެއްޖެ ހާލަތެއްގަައި އެއަށް ވުރެ ދިގު މުއްދަތެއްގެ ރިކޯޑް ވެސް ބެލޭނެއެވެ. އެގޮތުން ޕޮލިސް ރިކޯޑު ދޫކުރުމުގައި ގެންގުޅޭ ކެޓަގަރީތަކެއް ވެސް އެ ގަވާއިދުގައި ވަނީ ތައާރަފްކޮށްފައެވެ. އަދި ވަޒީފާގެ ބޭނުމަށް ޕޮލިސް ރިކޯޑް ދޫކުރުމާއި ގާނޫނީ ޝަހްސެއް ބޭނުންވެގެން ރިކޯޑް ދޫކުރުމާއި ދައުލަތުގެ އިދާރާއަކުން ބޭނުންވެގެން ރިކޯޑް ދޫކުރުން ވަނީ އެ ގަވާއިދުގައި ހިމަނައިފައެވެ.
ޕޮލިސް ރިކޯޑު ދޫކުރުމާ ބެހޭ ގަވާއިދު ބުނާ ގޮތުން ޖިނާއީ އެއްވެސް ކުށެއްގެ ތަހުގީގު ހިނގާ ނަމަ، "އާންމު އުސޫލުން" އެއީ ޕޮލިސް ރިކޯޑެއް އޮތް މީހެއް ކަމަށް ބަލަން ޖެހެއެވެ. އަދި މައްސަލައެއްގައި ދައުވާ ކުރަން ފޮނުވައިފައިވާ ނަމަވެސް އެއީ ރިކޯޑެއްގެ ގޮތުގައި ބަލަންޖެހެއެވެ.
