ފުލުހުންގެ އިސްވެރިންތަކެއް މަގާމުން ވަކިކުރަނީ ކޮރަޕްޝަން ފަދަ އަމަލުތައް ބަލައިފާނެތީ އަދަބުދޭން: ޖަމީލް
ފުލުހުންގެ އިސްވެރިންތަކެއް މަގާމުން ވަކިކުރަނީ ކޮރަޕްޝަން ފަދަ އަމަލުތައް ބަލައިފާނެތީ އަދަބު ދޭންކަމަށް ކުރީގެ ނައިބުރައީސް ޑރ.އަހުމަދު ޖަމީލް މުހައްމަދު ވިދާޅުވެއްޖެއެވެ.
ޑރ. ޖަމީލް ވިދާޅުވީ ގިނަ ދުވަހު ޚިދުމަތުގައި ތިބި ފުލުހުން މަގާމުން ވަކިކުރަނީ އެމްޑީޕީގެ "އެކްޓިވިސްޓުން" ހިމެނޭ ބޯޑުން ބަދަލުހިފަން ކަމަށެވެ.
"ޤައުމުގެ އެންމެ އަގުބޮޑު އެއް ރައުސުލްމާލަކީ އިންސާނީ ވަޞީލަތް. އެމްޑިޕީގެ އެކްޓިވިސްޓުން ހިމެނޭ ބޯޑުން ބަދަލުހިފަން އުޅޭކަން ސާފު. ގިނަ ދުވަހު ޚިދުމަތުގައި ތިބި ބަޔަކު ވަކިކުރަނީ ޙައްޤުތައް ރައްކާތެރިކަން ކުރަންބާ؟ މިއީ ކޮރަޕްޝަނާއި މުޑުދާރު އަމަލުތައް ބަލާފާނެތީ ދޭ އަދަބު." ޑރ. ޖަމީލް ކުރެއްވި ޓްވީޓެއްގައި ވިދާޅުވިއެވެ.
ފުލުހުންގެ ހިދުމަތް އިސްލާހުކުރަން އިސް އޮފިސަރުންތަކެއް މަގާމުން ވަކިކުރުމަށް ފުލުހުންގެ ބޯޑުން ނިންމި ނިންމުމާ ގުޅިގެން ގިނަ ބައެއްގެ ފާޑުކިޔުން އަމާޒުވެފައިވާ މިދަނޑިވަޅުގައި ފުލުހުންގެ ޚިދުމަތް އިސްލާހުކުރަން އިސް އޮފިސަރުންތަކެއް މަގާމުން ވަކިކުރުމަށް ފުލުހުންގެ ބޯޑުން ނިންމި ނިންމުން ދިރާސާ ކުރައްވަން ފައްޓަވައިފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވަނީ މިއަދު ވިދާޅުވެފައެވެ.
ޕޮލިސް ބޯޑުން ރޭ ނެރުނު ބަޔާނެއްގައި ވަނީ ގާނޫނުން ޕޮލިސް ބޯޑާ ހަވާލުކޮށްފައިވާ އެއް މަސްއޫލިއްޔަތަކީ ކޮމިޝަންޑް އޮފިސަރުންގެ ތެރެއިން ކޮމިޝަނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުންނަކީ މަގާމަށް އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާއާއި ނަޒާހަތްތެރިކަން ހުރި އޮފިސަރުންކަމާ މެދު ގޮތެއް ކަނޑައެޅުން ކަމަށެވެ.
އެގޮތުން އޮފިސަރުންގެ ގާބިލުކަން ވަޒަން ކުރުމަށް ކުރި މަސައްކަތަށް ކަނޑައެޅިފައިވާ ތާރީޚަށް މަސައްކަތް ނިންމުމަށް ފަހު، ގާނޫނުގައިވާ ގޮތުގެ މަތީން އެކަން ތަންފީޒު ކުރުމަށް ސީޕީ ހަމީދަށް ހުށަހަޅައިފައިވާ ކަމަށް ބަޔާނުގައި ވެއެވެ.
