ޖުލައި މަހު ދައުލަތަށް އާމްދަނީގެ ގޮތުގައި 624 މިލިއަން ރުފިޔާ
ފާއިތުވި ޖުލައި މަހު ދައުލަތަށް އާމްދަނީގެ ގޮތުގައި ލިބުނީ 624.07 މިލިއަން ރުފިޔާކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)ގެ ހިސާބުތަކުން ދައްކައިފިއެވެ.
މީރާއިން އާއްމުކޮށްފައިވާ ތަފާސް ހިސާބުތައް ދައްކާ ގޮތުން ނިމިދިޔަ ޖުލައިމަހު އާމްދަނީގެ ގޮތުގައި ބަލައިގެންފައި ވަނީ 624.07 މިލިއަން ރުފިޔާއެވެ. މީގެ ތެރޭގައި 21.10 މިލިއަން އެމެރިކާ ޑޮލަރު ހިމެނެއެވެ. މީރާއިން މައުލޫމާތު ދޭ ގޮތުގައި، މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށް ވުރެ 6.2 އިންސައްތަ ދަށް އަދަދެކެވެ.
ވަކިވަކި ބައިތަކަށް ބަލާއިރު އާމްދަނީގެ އެންމެ ބޮޑު ބައެއް ލިބިފައި ވަނީ ޖީ.އެސް.ޓީއިންނެވެ. އެއީ 291.59 މިލިއަން ރުފިޔާއެވެ. ދެން އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓުންނެވެ. އެއީ 111.90 މިލިއަން ރުފިޔާއެވެ.
މީގެ އިތުރުން، އިންކަމް ޓެކްސްގެ ގޮތުގައި 109.64 މިލިއަން ރުފިޔާ ލިބިފައިވާއިރު ގްރީން ޓެކްސްގެ ގޮތުގައި ލިބިފައިވަނީ 28.19 މިލިއަން ރުފިޔާއެވެ. އަދި ވޯކް ޕަރމިޓް ފީގެ ގޮތުގައި 25.92 މިލިއަން ރުފިޔާ ލިބިފައިވާއިރު އެހެނިހެން ޓެކުހާއި ފީގެ ގޮތުގައި 56.82 މިލިއަން ރުފިޔާ ވަނީ ލިބިފައެވެ.
