ޕީޕީއެމްއާ އެކު މަސައްކަތް ކުރުމަކީ އެންމެ ރަނގަޅު ގޮތެއް ނޫން: ރައީސް ޞާލިޙް
އިދިކޮޅު ޕީޕީއެމްއާ ގުޅިގެން އެމްޑީޕީއިން މަސައްކަތް ކުރުމަކީ އެންމެ ރަނގަޅު ގޮތް ނޫން ކަމަށް ރައީސުލް ޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ވިދާޅުވެއްޖެއެވެ.
މިހާރު ކުރިޔަށްދާ ނޫސްވެރިންގެ ބައްދަލުވުމެއްގައި ރައީސް ޞާލިޙް ވިދާޅުވީ، އެމްޑީޕީއިން ޕީޕީއެމްއާ އެކު މަސައްކަތް ކުރުމަކީ މަލްޓިޕާޓީ ސިސްޓަމްއާ މުޅިން ޚިލާފު ކަމެއް ކަމަށެވެ. އަދި ޕީޕީއެމްއާއި އެމްޑީޕީއަކީ ދެ ފިކުރެއް ކަމަށާއި އެންމެ ރަނގަޅު ގޮތަކީ ދެ ޕާޓީ ވާދަވެރިކޮށް މަސައްކަތް ކުރުން ކަމަށެވެ.
"އަޅުގަނޑަކީ މަލްޓިޕާޓީ ނިޒާމަށް ތާއިދުކުރާ މީހެއް. މި ރާއްޖޭގައި ބޮޑުކޮށް މިއޮތީ ދެ ފިކުރެއް. އެމްޑީޕީއާ ޕީޕީއެމް. އަޅުގަނޑަކަށް ގަބޫލެއް ނުކުރެވޭ އެމްޑީޕީއާ ޕީޕީއެމް ކޯލިޝަނެއް ހެދުމަކީ މަލްޓިޕާޓީ ނިޒާމަށް އޮތް އެންމެ ރަނގަޅު ގޮތް ކަމަކަށެއް." ރައީސް ޞާލިޙް ވިދާޅުވީ ޕީޕީއެމްއާއި އެމްޑީޕީ މަސައްކަތް ކުރަން އެންމެ ރަނގަޅު ގޮތަކީ ދެ ފަރާތުގައި ތިބެގެން ކަމަށެވެ.
ރައީސް ޞާލިޙްގެ ވާހަކަފުޅުގައި ވިދާޅުވީ، އެމްޑީޕީ އަދި ޕީޕީއެމް އެކުވެއްޖެ ނަމަ ރާއްޖޭގައި މިހާރު އޮތް މަލްޓި ޕާޓީ ސިސްޓަމް ނިމުމަކަށް އަންނާނެ ކަމަށާއި އެއީ ސިޔާސީ ގޮތުން އެންމެ ފައިދާ ހުރި ގޮތް ނޫން ކަމަށެވެ. އަދި ވިދާޅުވީ، އެއްބަޔަކު ކުރާ މަސައްކަތަށް ފާޑު ކިޔާނެ ބަޔަކު ތިބެން ޖެހޭނެ ކަމަށެވެ.
