ހިލަވެލި ބަރުކޮށްގެން ދިޔަ ދޯންޏެއް ބަންޑުން ޖަހައިލައިފި

ކ. ތިލަފުށިން ހިލަވެލި ބަރުކޮށްގެން ދިޔަ ދޯންޏެއް ބަންޑުން ޖަހައިލައިފިއެވެ.

Ads by MWSC

އެމްއެންޑީއެފުން ވިދާޅުވީ “ރާޔާ” ނަމަކަށް ކިޔާ މި ދޯނި ބަންޑުން ޖަހައިލައިފައި ވަނީ މިއަދު ހެނދުނު 10:30 ހާއިރު ކަމަށެވެ. ތިލަފުށިން ދަނގަޑާއި ހިލަވެލި ބަރުކޮށްގެން އެ ދޯނި ފުރައިފައި ވަނީ ފަތިހު 04:30ގައެވެ.

އެ ދޯނީގައި ދިވެއްސަކު ހިމެނޭހެން 3 ފަޅުވެރިން ތިބި ކަމަށް އެމްއެންޑީއެފުން ވިދާޅުވެއެވެ. އެ ދޯނި ބަނޑުން ޖަހައިލައިފައި ވަނީ ފިހާޅޮހި ރިސޯޓާ ގާތްގަޑަކަށް 6.5 ނޯޓިކަލް ބޭރުންނެވެ.

މީގެ އިތުރުން އެމްއެންޑީއެފުން ވިދާޅުވީ ހާދިސާ ހިނގި ސަރަހައްދަށް “ދިރުން” ނަމަކަށް ކިޔާ ދޯންޏެއް ދިޔަ ކަމަށާއި އެ ދޯނީގެ އެހީތެރިކަމާ އެކު ފަޅުވެރިން ސަލާމަތްކޮށް ކޯސްޓް ގާޑުން އެ ދޯނި ހުޅުމާލެއަށް ގެނެވިފައިވާ ކަމަށެވެ.