ނައިބު ރައީސް ކަމުން ޑރ.ޖަމީލް ވަކި ކުރި މައްސަލަ ފުރަތަމަ ހުށަހަޅަން ޖެހޭނީ ސިވިލް ކޯޓަށް
ޑރ. މުހައްމަދު ޖަމީލް އަހްމަދު ނައިބު ރައީސްކަމުގެ މަގާމުން ދުރުކުރި މައްސަލަ ފުރަތަމަ ސްޕްރީމް ކޯޓަށް ހުށަނޭޅޭނެ ކަމަށް އެ ކޯޓުން ނިންމައިފިއެވެ.
ސްޕްރީމް ކޯޓުން ވިދާޅުވީ، މިމައްސަލަ ސިވިލް ކޯޓަށް ހުށަހަޅައިގެން ކުރިޔަށް ގެންދެވިދާނެ ކަމަށެވެ.
2019 ވަނަ އަަހަރު ޑރ.ޖަމީލް ހުށަހަޅުއްވައިފައިވާ މި މައްސަލަ ބައްލަވައިފައި ވަނީ ސްޕްރީމް ކޯޓުގެ ފަސް ފަނޑިޔާރުންގެ ބެންޗަކުންނެވެ. އެއީ އުއްތަމަ ފަނޑިޔާރު އަހުމަދު މުއުތަސިމް އަދުނާނާއި ފަނޑިޔާރު އަޒްމިރަލްދާ ޒާހިރާއި ފަނޑިޔާރު އަލީ ރަޝީދު ހުސައިނާއި ފަނޑިޔާރު ޑރ. މުހައްމަދު އިބްރާހިމްގެ އަދި ފަނޑިޔާރު އައިޝާ ޝުޖޫން މުހައްމަދެވެ.
ޑރ. ޖަމީލް ނައިބު ރައީސްގެ މަޤާމުން ވަކިކޮށްފައި ވަނީ އޭރުގެ އިދިކޮޮޅު ފަރާތްތަކާ ގުޅިގެން ޖަމީލް މަސައްކަތް ކުރެއްވި ކަމަށް ތުހުމަތުކޮށް ޕީޕީއެމްގެ އަޣުލަބިއްޔަތު އޮތް މަޖިލީހުން ނެގި އިތުބާރު ނެތް ކަމުގެ ވޯޓަކުންނެވެ. ނައިބު ރައީސް ކަމުން ވަކި ކުރެވުމުން ޖަމީލު ވަނީ އިނގިރޭސިވިލާތުގައި ހުންނަވައިގެން ރައީސް ޞާލިޙް ވެރިކަމަށް ގެނައުމަށް މަސައްކަތް ކުރައްވައިފައެވެ. އެހެން ނަމަވެސް ފަހުން އެމަނިކުފާނު ވަނީ އަލުން ޕީޕީއެމްއާ ގުޅިވަޑައިގެންފައެވެ.
ޖަމީލް މަގާމުން ވަކިކުރުމަށް މަޖިލީހަށް ހުށަހެޅުމުން އޭނާ އެ މަގާމުން ވަކިކުރަން ފެނިވަޑައިނުގަންނަވާ ކަމަށް ވޯޓު ދެއްވީ މިހާރުގެ ޔޫތު މިނިސްޓަރު އަދި އޭރު ގަލޮޅު ދެކުނު ދާއިރާގެ މެންބަރު އަހްމަދު މަހްލޫފާއި ކެންދޫ ދާއިރާގެ މެންބަރު އަލީ ހުސައިންއެވެ. ޖަމީލް މަގާމުން ވަކިކުރަން ފެންނަ ކަމަށް 78 މެންބަރުން ވޯޓު ދެއްވިއެވެ.
މިއަދު ސުޕްރީމް ކޯޓުގައި އޮތް އެ މައްސަލައިގެ އަޑުއެހުމެއްގައި ސުޕްރީމް ކޯޓުން ވަނީ އެ މައްސަލަ އެންމެ ފުރަތަމަ ހުށަހައަޅަން ޖެހޭނީ ދުސްތޫރީ މައްސަލައެއްގެ ގޮތުގައި ސިވިލް ކޯޓަށް ކަމަށާއި އެ މައްސަލަ ބެލުމުގެ އިހްތިޔާރު ސިވިލް ކޯޓަށް ލިބިގެންވާކަމަށް ވިދާޅުވެފައެވެ.
