މަޙްލޫފްގެ ރައްދު: ރައީސުލްޖުމްހޫރިއްޔާކަމާއި މަޖިލިސް މެމްބަރުކަމަށް ވެސް އަޅުގަނޑުގެ ޝަރުތު ހަމަވޭ!
އެެމްޑީޕީގެ ޤައުމީ މަޖިލީހުގެ އިންތިހާބުގައި ޔޫތު މިނިސްޓަރ އަޙްމަދު މަޙްލޫފަށް ވާދަަ ނުކުރެވޭނެ ކަމަށް އެ ޕާޓީން އެންގި އެންގުމަށް އެމަނިކުފާނު ރައްދު ދެއްވައިފިއެވެ.
މިކަމާ ގުޅޭގޮތުން މިނިސްޓަރ މަޙްލޫފް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ ކަމާއި މަޖިލިސް މެމްބަރުކަމުގެ އިތުރުން ކައުންސިލް އިންތިޚާބަށް ވެސް އެމަނިކުފާނުގެ ޝަރުތު ހަމަވާ ކަމަށެވެ.
އެމްއެމްޕީއާރްސީގެ ޚިޔާނާތުގައި ބައިވެރިވިކަމުގެ ތުހުމަތުކޮށް މި ވަގުތު ޔޫތު މިނިސްޓަރުކަމުން ސަސްޕެންޑު ކޮށްފައިވާ މަޙްލޫފް ވިދާޅުވީ މިނިސްޓަރެއްގެ ހައިސިއްޔަތުން އެމްޑީޕީގެ ގައުމީ މަޖިލީހުގައި އިނދެވިފައި، އެ ޕާޓީގެ ގައުމީ މަޖިލީހުގެ އިންތިޚާބުގައި ވާދަނުކުރެވުން "ހަމަނުޖެހޭ" ކަމަށެވެ.
"ޖިނާއީ ކުށެއް ސާބިތު ނުވާހާ ހިނދަކު ވާދަކުރެވެން ވާނެ. މިހައްޤު ހޯދަން އަޅުގަނޑު މަސައްކަތް ކުރާނަން. މިއީ އެމްޑީޕީއިން އަބަދު ވަކާލާތުކުރި، އިންތިޚާބުތަކުގައި ވާދަކުރުމުގެ ހައްޤާއި ދިމާ އިދިކޮޅު އަދި ޑިމޮކްރެސީގެ ރޫހާ ވެސް ޚިލާފު ނިންމުމެއް." މަޙްލޫފް ވިދާޅުވެފައިވެއެވެ.
މިނިސްޓަރ މަޙްލޫފް އިތުރަށް ވިދާޅުވީ އެމަނިކުފާނު އެމްޑީޕީގެ ރައީސް، ނައިބު ރައީސް، ޗެއަރޕަރސަން އަދި ޕްރައިމަރީތަކަށް ވެސް ޝަރުތު ހަމަވާ ކަމަށެވެ.
"އަޅުގަނޑާ ދެކޮޅަށް މިދުވަސްވަރު ފަތުއަޑު ކިޔާފައި މިހިނގާ ކަންކަމަކީ އެމްއެމްޕީއާރްސީއާ ގުޅޭ ކަމެެއްނޫން، މިއީ ސިޔާސީ ކަމެއް. އެކަމަކު މިބޭފުޅުންނަށް ޓަކައި އެތައް ޤުރުބާނީއެއްވެދީ އަދި މިހާރު ވެސް ސަރުކާރުގައި ވަރަށް ރަނގަޅު ނަތީޖާ ނެރެދީފައިވާއިރު، ވެގެން މިއުޅޭ ގޮތް އެއްގޮތަކަށް ވެސް ނުވިސްނޭ." މިނިސްޓަރ މަޙްލޫފް ވިދާޅުވެފައިވެއެވެ.
އެމްޑީޕީގެ ސެކްރެޓަރީ ޖެނެރަލް ޝާޒްލީ ޝަފީގު ސޮއި ކުރައްވައި މިނިސްޓަރ މަޙްލޫފަށް ރޭގައި ފޮނުވި ސިޓީއެއްގައި ވިދާޅުވެފައި ވަނީ އެ ޕާޓީގެ ގައުމީ މަޖިލިސް އިންތިހާބުގައި މެދު އުތުރު ޕްރޮވިންސް (ކ، އއ، އދ، އަދި ވ)ގެ ރައީސް ކަމަށް ވާދަކުރެއްވުމަށް މަަޙްލޫފްގެ ޝަރުތު ހަމަނުވާ ކަމަށެވެ. އަދި މަޙްލޫފްގެ ޝަރުތު ހަމަނުވަނީ އެންޓި ކޮރަޕްޝަން ކޮމިޝަން (އޭސީސީ)އިން މަހުލޫފްގެ މައްސަލައެއް އޮތްކަމަށް އެ ކޮމިޝަނުން އެމްޑީޕީއަށް އަންގައިފައިވާތީ ކަމަށް ވެސް އެ ސިޓީގައިވެއެވެ.
އަނެއްކާ އަނެއް ވާހަކަ.. މިސަރުކާރުގަ ރައީސް، މަޖިލިސް މެމްބަރުން، މިނިސްޓަރުންގެ ތެރޭގައި ނެތް ތަންދޮރު ދަންނަ އެކަކުވެސް.. އާދައިގެ އޮފީހެއްގެ ރިސެޕްޝަންގަ ވެސް ތިބޭނެ ތިޔަށްވުރެ ފެންވަރު ރަނގަޅު މީހުން..ކަންމަތީ ފިހާރައިގެ ސޭޓަކަށް އިންނަ މީހާވެސް ތިޔަށްވުރެ ރަނގަޅުވާނެ..