މެންބަރުން އިތުރު ކުރުމަށް އިދިކޮޅުގެ އިސްވެރިން ދެކުނަށް!
އިދިކޮޅު ޕްރޮގްރެސިވް ކޯލިޝަނަށް މެމްބަރުން އިތުރުކުރުމަށް އެ ކޯލިޝަންގެ ދެ ޓީމެއް ދެކުނުގެ ބައެއް ރަށްރަށަށް މިއަދު ދަތުރެއް ފައްޓަވައިފިއެވެ.
ޕްރޮގްރެސިވް ކޯލިޝަންގެ ލީޑަރޝިޕްގެ ގިނަ ބޭފުޅުން ވެސް ހިމެނިވަޑައިގަންނަވާ ގޮތަށް ކޯލިޝަންގެ ވަފުދުތައް މިއަދު ދަތުރު ފެއްޓެވީ ގދ. އަތޮޅަށާއި އައްޑޫ ސިޓީ އަށެވެ.
ޕްރޮގްރެސިވް ކޯލިޝަންގެ ތަރުޖަމާނު ހީނާ ވަލީދު ވިދާޅުވީ، މި ދަތުރުގެ ބޭނުމަކީ "މަވެސް ޕީޕީއެމް" ޝިއާރުގެ ދަށުން ޕީޕީއެމަށް މެމްބަރުން އިތުރުކުރުމާއި އެ ދެ އަތޮޅުގެ ރައްޔިތުންނަށް ބައްދަލުކުރުން ކަމަށެވެ.
އެ ރަށްރަށަށް ފުރުމުގެ ކުރިން އެއާޕޯޓުގައި ހުންނަވައި، ޕީޕީއެމްގެ ނައިބު ރައީސް އަދި ނަައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ، މިދިޔަ ލޯކަލް ކައުންސިލްތަކުގެ އިންތިހާބުގެ ނަތީޖާ ދެއްކި ގޮތުން އެނގެނީ ވެރިކަން ކުރާ އެމްޑީޕީއާ މެދު ރައްޔިތުން ދެކެމުން އައި ގޮތް ވަރަށް ބޮޑަށް ބަދަލުވެފައިވާކަން ކަމަށާއި އެކަން ހަމައެކަނި މާލޭ ސިޓީ ކައުންސިލްގެ ނަތީޖާއިން ވެސް އެކަން ސާފުވާ ކަމަށެވެ.
ޝިޔާމް ވިދާޅުވީ، އެމްޑީޕީގެ އަޣުލަބިއްޔަތު އޮތް ތަންތަނުން ވެސް އެ ޕާޓީއަށް އަޣުލަބިއްޔަތު ގެއްލުނީ ކުރީގެ ރައީސް އަބްދުﷲ ޔާމީން ޢަބްދުލްޤައްޔޫމަށް ދައުލަތުން ކުރާ އަނިޔާތަކުގެ ސަބަބުންނެވެ. ރައީސް ޔާމީނަށް ސަރުކާރުން އަނިޔާ ދެމުންދާ ކަމަށާއި އެއީ ރައްޔިތުން ވަރަށް ކަންބޮޑުވާ ކަމެއް ކަމަށް ޝިޔާމް ވިދާޅުވިއެވެ.
