ދައުވާކުރާނެ ހެއްކެއް ނެތްކަމަށް ބުނާ ވާހަކަ މިއަދު ޔަގީންވެއްޖެ: މަހުލޫފް
އެމްއެމްޕީއާރްސީގެ ޚިޔާނާތުގެ މައްސަލައާ ގުޅިގެން، ހިޔާނާތުގެ ތުހުމަތު ކުރެވޭ މައްސަލައިގައި ހެއްކެއް ނެތްކަމަށް މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަހުލޫފް ވިދާޅުވާ ވިދާޅުވުން މިއަދު ޔަގީންވެއްޖެ ކަމަށް މަހުލޫފު ވިދާޅުވެއްޖެއެވެ.
މަހުލޫފު ކުރެއްވި ޓްވީޓެއްގައި މިފަދައިން ވިދާޅުވީ ޕީޖީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި މަހުލޫފަށް ދައުވާ ކުރުމާ މެދު ހޯދެން ހުރި ހުރިހާ ހެއްކެއް ނުހޯދެނީސް އެކަމުގައި ގޮތެއް ނުނިންމަވާނެ ކަމަށް ޕްރޮސެކިއުޓާ ޖެނެރަލް ހުސައިން ޝަމީމް ވިދާޅުވުމާ ގުޅިގެންނެވެ.
މަހުލޫފް ވިދާޅުވީ ދައުވާކުރާނެ ހެއްކެއް ނެތްކަމަށް ތަކުރާރުކޮށް މަހުލޫފު ވިދާޅުވާ ވިދާޅުވުން މިއަދު އިތުރަށް ޔަގީންވެފައި ވާކަމަށެވެ. އަދި 2 އަހަރު ވަންދެން އެސެޓް ރިކަވަރީ ކޮމިޝަނާއި ފުލުހުންނާއި އޭސީސީން ހޯދި އެއްޗެއް ހޯދައިފައި، ދައުވާ ކުރަން ފޮނުވާ އަދިވެސް ހެކި ހޯދަނީތޯ މަހުލޫފު ވަނީ ސުވާލު ކުރައްވައިފައެވެ.
ޕީޖަި އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބުދެއްވަމުން ޝަމީމް ވިދާޅުވީ މަހުލޫފްގެ މައްޗަށް ދައުވާ ކުރުމާ މެދު ގޮތެއް ނިންމޭނެ ތާރީހެއް ބުނަން އަދިވެސް އޭނާއަށް ދަތި ކަމަށެވެ. އެމައްސަލައަކީ މުއްދަތު ނުހިނގާ މައްސަލައަކަށް ވުމުން ދައުވާ ކުރުމާ މެދު ގޮތެއް ނިންމާނީ ލިބެން ހުރި ހުރިހާ ހެކިތަކެއް ހޯދުމަށް ފަހުގައި ކަމަށް ޕީޖީ ވިދާޅުވިއެވެ.
