މަޙްލޫފް މައްސަލައިގައި އިތުރު ހެކިން ހޯދަން މަސައްކަތެއް ނުކުރަން: ފުލުހުން
ޔޫތު މިނިސްޓަރު އަހްމަދު މަހްލޫފާ ދެކޮޅަށް ދައުވާ ކޮށްދިނުމަށް އެދި ޕްރޮސެކިއުޓާ ޖެނެރަލް (ޕީޖީ) އޮފީހަށް ފޮނުވައިފައިވާ މައްސަަލައިގައި އިތުރު ހެކި ހޯދުމުގެ މަސައްކަތެއް ކުރަމުން ނުގެންދާ ކަމަށް ފުލުހުން މިރޭ ވިދާޅުވެއްޖެއެވެ.
ނޫސްވެރިއަކު ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ، މަޙްލޫފަށް ތުހުމަތު ކުރެވޭ މައްސަލައިގެ އިތުރު ހެކި ހޯދުމުގެ މަސައްކަތް ފުލުހުން ކުރަމުން ނުގެންދާ ކަމަށާއި ނަމަވެސް ކުރިން ހޯދައިފައިިވާ ހެކިތަކާ ބެހޭ ބައެއް ކަންތައްތައް ޕީޖީ އޮފީހަށް ސާފުކޮށްދިނުން ކުރިއަށް ގެންދާ ކަމަށެވެ.
"ނަމަވެސް ޕީޖީގެ އެދުމުގެ މަތިން ތަހުގީގުގައި ކުރިން ވެސް ހޯދައިފައި ހުރި ބައެއް ހެކިތަކާ ގުޅޭ ބައެއް ކަންކަން އިތުރަށް ސާފުކޮށްދޭން ޕީޖީން އެދިފައިވާތީ އެކަން ފުލުހުން ކުރިއަށް އެބަ ގެންދަން" މީޑިއާ އޮފިޝަލު ވިދާޅުވިއެވެ.
އެމްއެމްޕީއާރުސީގެ ބޮޑު ހިޔާނާތުގެ ފައިސާ އެސްއޯއެފުން ޔޫތު މިނިސްޓަރ މަހުލޫފުގެ އެކައުންޓަށް ޖަމާކުރި މައްސަލައިގައި އޭނާގެ މައްޗަށް ދައުވާ ކޮށްދޭން އެދި ޕީޖީ އޮފީހަށް ފޮނުވިތާ ދެ މަހަށް ވުރެ ގިނަ ދުވަސްވެފައިވެއެވެ. އަދި މި މައްސަލައާ ގުޅިގެން މަޙްލޫފު މި ވަގުތު ހުންނެވީ މިނިސްޓަރުކަމުން ސަސްޕެންޑް ވެސް ކޮށްފައެވެ.
Ads by STO
