އެމްޑީޕީގެ ދާއިރާ އިންތިހާބުގައި ވޯޓު ފޮއްޓާ ހަވާލުވުމުގެ ފުރުސަތު މެންބަރުން ނޫން މީހުންނަށް ވެސް ހުޅުވައިލައިފި
ވެރިކަން ކުރާ އެމްޑީޕީގެ ދާއިރާ އިންތިހާބުގައި ވޯޓު ފޮށިތަކާ ހަވާލުވުމުގެ ފުރުސަތު އެ ޕާޓީގެ މެންބަރުން ނޫން މީހުންނަށް ވެސް ހުޅުވައިލައިފިއެވެ.
މިކަމާ ގުޅޭގޮތުން އެމްޑީޕީގެ ރައީސް މުޙައްމަދު ނަޝީދުގެ ކޮއްކޯފުޅު އަދި އެ ޕާޓީގެ ދާއިރާ އިންތިހާބު ކޮމިޓީގައި ވެސް ހިމެނި ވަޑައިގަންނަވާ ނާޒިމް ސައްތާރު މިއަދު ކުރެއްވި ޓްވީޓެއްގައި ވިދާޅުވީ، އެމްޑީޕީގެ ދާއިރާ އިންތިހާބުގައި ވޯޓު ފޮށިތަކާ ހަވާލުވުމުގެ ފުރުސަތު، ޝައުޤުވެރިވާ ފަރާތްތަކަށް ހުޅުވައިލައިފައިވާ ކަމަށެވެ.
އެކަމާ ގުޅޭގޮތުން "ދެން"އަށް އިތުރު މައުލޫމާތު ދެއްވަމުން ނާޒިމް ވިދާޅުވީ، އިންތިހާބުގެ ވޯޓު ފޮއްޓަކާ ހަވާލުވާން އެމްޑީޕީގެ މެންބަރަކަށް ވާން ނުޖެހޭ ކަމަށެވެ.
ނަމަވެސް ދާއިރާ އިންތިހާބުގެ ވޯޓު ފޮއްޓާ ހަވާލުވާން އެދޭ ފަރާތަކީ، ދާއިރާ އިންތިހާބުގައި ވާދަ ކުރާ ކެންޑިޑޭޓަކަށް ވެގެން ނުވާނެ ކަމަށާއި އެމީހަކީ ދާއިރާ އިންތިހާބުގައި ވާދަ ކުރާ ކެންޑިޑޭޓެއްގެ ކެމްޕޭނުގައި އަމަލީ ގޮތުން އުޅޭ ފަރާތެއް ކަމުގައި ވެސް ވެގެން ނުވާނެ ކަމަށް ނާޒިމް ވިދާޅުވިއެވެ.
އެމްޑީޕީގެ ދާއިރާ އިންތިހާބުގައި ފޯޓު ފޮއްޓާ ހަވާލުވާން އެދޭ ފަރާތްތަކުން މި ފޯމު ފުރިހަމަ ކުރުމަށް އެ ޕާޓީން އެދެއެވެ.
އެމްޑީޕީގެ ދާއިރާތަކުގެ އިންތިހާބަށް 700 އަށް ވުރެ ގިނަ ކެންޑިޑޭޓުން ކުރިމަތިލައިފައިވާ ކަމަށް އެ ޕާޓީގެ ޗެއާޕާސަން ހަސަން ލަތީފް ވަނީ މީގެ ކުރިން ވިދާޅުވެފައެވެ.
މި އިންތިހާބު ބޭއްވުމަށް ހަމަޖެހިފައި ވަނީ އަންނަ މަހުގެ 25 ވަނަ ދުވަހުގައެވެ.
މި އިންތިހާބު ބޭއްވުމަށް މިފަހަރު ގާތްގަނޑަކަށް 900 އޮފިޝަލުން ބޭނުންވާނެ ކަމަށް ވެސް ހަސަން ލަތީފު ވިދާޅުވިއެވެ. ރާއްޖޭގެ އެކި ދާއިރާތަކުގައި ގާތްގަނޑަކަށް 300 ވޯޓު ފޮށި ބަހައްޓާނެ ކަމަށާއި އެމްޑީޕީގެ ދަފްތަރުގައި މިވަގުތު ތިބީ 93،0354 މެމްބަރުން ކަމަށް ވެސް އެ ޕާޓީން ވަނީ މައުލޫމާތު ދީފައެވެ. އަދި ފައިނަލް ވޯޓާސް ލިސްޓް ވެސް އާންމުކުރަން ވަނީ ނިންމައިފައެވެ.
