ރައީސް ޔާމީން މައްސަލައިގައި ނުފޫޒު ފޯރުވި ކަމަށް ބުނާ އޯޑިއޯގެ މައްސަލަ ބަލަން ފަށައިފި
ގާޒީންގެ ލީކުވެފައިވާ އޯޑިއޯތަކުގެ މައްސަލަ ޖުޑިޝަލް ސާވިސް ކޮމިޝަން (ޖޭއެސްސީ)އިން ތަހުގީގު ކުރަން ނިންމައިފިއެވެ.
ޖޭއެސްސީއިން ނެރުނު ބަޔާނެއްގައި ވިދާޅުވެފައި ވަނީ، ކްރިމިނަލް ކޯޓުން ބެއްލެވި މައްސަލައިގައި ހުކުމް ކުރެއްވުމުގައި ބައިވެރިވަޑައިގެންނެވި ބައެއް ފަނޑިޔާރުންނަށް އެ މައްސަލަ ވަކި ގޮތަކަށް ނިންމެވުމަށް ނުފޫޒު ފޯރުވިކަމަށް އެ ފަނޑިޔާރުން ވިދާޅުވާކަމަށް ބުނެ އޯޑިއޯތަކެއް މީޑިއާގައި ފެތުރެމުން އަންނަ ކަމަށެވެ.
އަދި ފަނޑިޔާރުންނަކީ ވަކި ފަރާތަކަށް ބުރަ ނުވެ، ވަކި ފަރާތަކުން ދައްކާފާނެ ބިރަކަށް ޖެހިލުން ނުވެ، ތައައްސުބުން އެއްކިބާވެ ގާނޫނު އަސާސީއާއި ގާނޫނާ އެއްގޮތަށް ކަންތައްތައް ނިންމުންމަތީ ދެމިތިބެން ޖެހޭ ބައެއް ކަމަށާއި އަމިއްލަ ފަރުދަކު ވިއަސް، ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިއަސް، ފަނޑިޔާރުންގެ މަސައްކަތާ ބެހި ނުފޫޒު ފޯރުވާ ކަމަށް ކުރެވޭ ތުހުމަތުތަކަކީ ފަނޑިޔާރު ގޭގެ އިތުބާރު ނެގެހެއްޓުމާއި ފަނޑިޔާރު ގޭގެ މިނިވަންކަމާއި އިންސާފުވެރިކަން ކަށަވަރުކޮށް ދެމެހެއްޓުމަށް ޓަކައި ވަކިން ހާއްސަ ސަމާލުކަމަށް ދީގެން ކޮމިޝަނުން ބަލައި ތަހުގީގު ކުރާނެ ކަމެއް ކަމަށެވެ.
ޖޭއެސްސީން މިފަދައިން ވިދާޅުވެފައި ވަނީ ކުރީގެ ރައީސުލްޖުމްހޫރިއްޔާ އަދި އިދިކޮޅު އިއްތިހާދުގެ ލީޑަރު ރައީސް ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ކުރިމިނަލް ކޯޓުން 2019ވަނަ އަހަރުގެ ސެޕްޓެންބަރު މަހުގައި އިއްވައިފައިވާ ހުކުމް އިއްވުމުގެ ކުރިން ރައީސް އޮފީހުގެ ޗީފް އޮފް ސްޓާފް އަލީ ޒާހިރު އެ މައްސަލައިގައި ހުކުމްކުރި ބެންޗުގައި ހިމެނިވަޑައިގަންނަވާ ޤާޟީއަކާ ބައްދަލުކުރައްވައި އިރުޝާދު ދެއްވިކަމަށް ބުނާ އޯޑިއޯއެއް މީސްމީޑީއާގައި ލީކުވުމާ ގުޅިގެންނެވެ.
