ދައްޕަރު ބޭރުގެ ބަޔަކަށް ވިއްކާލައިގެން ނާޖާއިޒް ފައިދާ ނުހޯދަން އިދިކޮޅުން ގޮވައިލައިފި
ހއ. ދައްޕަރު ބޭރުގެ ބަޔަކަށް ވިއްކާލައިގެން ނާޖާއިޒް ފައިދާ ނުހޯދުމަށް އިދިކޮޅު ޕްރޮގްރެސިވް ކޯލިޝަނުން ގޮވައިލައިފިއެވެ.
އެނގިފައިވާ ގޮތުގައި ދައްޕަރަކީ އެ އަތޮޅު ފިއްލަދޫ ކައުންސިލްގެ އިހްތިސާސްގެ ތެރޭގައި އޮތް ތަނެކެވެ. އަދި އެއީ ފިއްލަދޫއާ އެއް ފަސްގަނޑަކަށް އޮންނަ ރަށެކެވެ.
ނަމަވެސް ދައްޕަރަކީ ރިސޯޓެއްކަމަށް ކަނޑައަޅުއްވައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ގަރާރަކުން އިއްޔެ ވަނީ އެތަން ފިއްލަދޫގެ އިހްތިސާސްއިން ބޭރުކޮށްފައެވެ. އެހެން ނަމަވެސް އެތަން އަދި މިހާތަނަށް ރިސޯޓެއްގެ ގޮތުގައި ތަރައްގީކުރަން އަދި އެއްވެސް ބަޔަކާ ހަވާލުކޮށްފައެއް ނުވެއެވެ.
މިކަމާ ގުޅިގެން ޕްރޮގްރެސިވް ކޯލިޝަނުން މިއަދު ނެރުނު ބަޔާނެއްގައި ބުނެފައި ވަނީ ފިއްލަދޫ ކައުންސިލްގެ އިހްތިސާސްއިން ދައްޕަރު ބޭރުކުރަން ރައީސް ޞާލިޙް ނިންމެވި ނިންމެވުމަކީ ވަރަށް ހުދުމުހުތާރު އަދި ލާމަރުކަޒީ ޤާނޫނާއި ލާމަރުކަޒު ކުރުމުގެ މަފްހޫމާ މުޅިން ދެކޮޅު ކަމެއް ކަމަށެވެ.
މީގެ އިތުރުން އެ ބަޔާނުގައި ބުނެފައި ވަނީ، ދައްޕަރަކީ ޒަމާނުއްސުރެއް ފިއްލަދޫ ރައްޔިތުންނަށް މަންފާ ލިބޭ ރަށެއްގެ ގޮތުގައި އަދި ފިއްލަދޫގެ ބައެއްގެ ގޮތުގައި ރައްޔިތުން ބަލަމުންދާ ރަށަކަށްވެފައި، ލާމަރުކަޒީ ޤާނޫނަށް ގެނެވުނު އިސްލާހާ އެކު ފިއްލަދޫ ކައުންސިލްގެ އިޚްތިޞާޞްގެ ތެރޭގައި ހިމެނި، އެ ރަށުގެ ތަރައްޤީގެ ޕްލޭން ތައްޔާރުކޮށް ކައުންސިލަށް އާމްދަނީ ލިބޭނެ މުހިއްމު ވަސީލަތެއްގެ ގޮތުގައި ދައްޕަރު ވެފައިވަނިކޮށް ކައުންސިލާއި އަދި ރައްޔިތުންނާއި އެއްވެސް މަޝްވަރާއެއް ކުރުމެއް ނެތި ރައީސުލްޖުމްހޫރިއްޔާގެ ޤަރާރަކުން ދައްޕަރު ވަކިކޮށްލުމަކީ ފިއްލަދޫގެ ރައްޔިތުންނަށް ދެވޭ ވަރަށް ބޮޑު އަނިޔާއެއް ކަމަށެވެ.
ތިޔަ ރަށް ގަންނަ ފަރާތަށް ވެސް އިދިކޮޅުން އަންގަވާ ފަހުން ތިޔަ މުޢާމަލާތް އުވާލާނެކަން.