ޖިއާންގެ މަރުގެ މައްސަލަ: ޑަބްލިޔު ކޮންސްޓްރަކްޝަނުން 4.5 މިލިއަން ރުފިޔާ ދޭން ހުކުމް ކޮށްފި
ޑަބްލިއު ކޮންސްޓްރަކްޝަނުން އިމާރާތްކުރަމުން ދިޔަ ތަނަކުން ސިމެންތި ބަސްތާއެއް ވެއްޓި، ބަނގްލާދޭޝްގެ ރައުޝާން ޖިއާން ނިޔާވި ހާދިސާއާ ގުޅިގެން ލިބުނު ގެއްލުމުގެ ބަދަލެއްގެ ގޮތުގައި 4.5 މިލިއަން ރުފިޔާ ދިނުމަށް ސިވިލް ކޯޓުން އިއްޔެ އެ ކުންފުންޏަށް ހުކުމްކޮށްފިއެވެ.
އުމުރުން 7 އަހަރުގެ ޖިއާން ނިޔާވީ 2018 ވަނަ އަހަރުގެ ޑިސެމްބަރު މަހުގެ 16ވަނަ ދުވަހު ހެނދުނުގެ ވަގުތެއްގައި މ. ނަލަހިޔާ މަންޒިލްގެ ކޮންސްޓްރަކްޝަން ސައިޓުން ސިމެންތި ބަސްތާއެއް ވެއްޓި ލިބުނު ޒަހަމްތަކަށް ފަރުވާ ދެމުން ދަނިކޮށް، އެ ދުވަހު މެންދުރު 12:40ހާއިރު އައިޖީއެމްއެޗްގެ އައިސީޔޫގައެވެ. އެންމެ ފަހު ވަގުތާ ޖެހެންދެން ވެސް އެކުއްޖާގެ ފުރާނަ ސަލާމަތް ކުރެވޭތޯ އެ ހޮސްޕިޓަލުން ވަރަށް މަސައްކަތް ކުރި ކަމަށް އާއިލާއިން ވަނީ ކުރީން ފާހަގަ ކޮށްފައެވެ.
ޖިއާން ނިޔާވި މައްސަލައިގައި އޭނާގެ މައިންބަފައިން ވަނީ، ލިބުނު ގެއްލުމުގެ ބަދަލެއްގެ ގޮތުގައި 17.4 މިލިއަން ރުފިޔާ ނަގައިދިނުމަށް އެދި 2019 ވަނަ އަހަރު ސިވިލް ކޯޓަށް މައްސަލަ ހުށަހަޅައިފައެވެ. އާއިލާގެ ފަރާތުން މި މައްސަލައިގައި ވަކާލާތުކުރީ ޕަބްލިކް އިންޓްރެސްޓް ލޯ ސެންޓަރު (ޕީއައިއެލްސީ) އިންނެވެ.
މި މައްސަލައާ ގުޅިގެން ޕީއައިއެލްސީން ރޭގައި ނެރުނު ބަޔާނެއްގައި ބުނެފައި ވަނީ، ޖިއާން ނިޔާވެފައި ވަނީ ޑަބްލިއު ކޮންސްޓްރަކްޝަންގެ މުވައްޒަފުންތަކެއް އެ ކުންފުނީގެ ރަސްމީ މަސައްކަތުގެ ތެރެއިން ފަރުވާ ކުޑަ އަމަލުތަކެއްގެ ހިންގުމުން ކަމަށް ޝަރީއަތަށް ސާބިތުވެފައިވާކަން ކޯޓުން ކަނޑައަޅައިފައިވާ ކަމަށެވެ. އެހެންވެ، އެ އަމަލުތަކުގެ ސަބަބުން ޖިއާންގެ މައިންބަފައިންނަށް ލިބިފައިވާ ގެއްލުމުގެ މަދަނީ މަސްއޫލިއްޔަތު ވައިކޭރިއަސް ލައިބިލިޓީގެ ދަށުން ޑަބްލިއު ކޮންސްޓްރަކްޝަނުން އުފުލަން ޖެހޭކަމަށް މަދަނީ މިންގަނޑުން ސާބިތުވާ ކަމަށް ދަށު ކޯޓުން އަންގައިފައިވާ ކަމަށް ވެސް ބުނެފައިވެއެވެ.
ޖިއާންގެ މަރުގެ ބަދަލުގެ ގޮތުގައި އޭނާގެ މައިންބަފައިން 17.4 މިލިއަން ރުފިޔާ ނަގައިދޭން އެދިފައިވީ ނަމަވެސް، ކޯޓުން ހުކުމް ކޮށްފައިވަނީ މި ގެއްލުމުގައި ނަގައިދެވޭނީ 4.5 މިލިއަން ރުފިޔާ ކަމަށެވެ.
ހަދަމުން ދިޔަ އެ އިމާރާތުގެ ފަސްވަނަ ފަންގިފިލާއަށް އަރުވަން އުޅުނު ސިމެންތި ބަސްތާއެއް ކަނޑައިގެން ވެއްޓި ޖިއާން ނިޔާވި މައްސަލައިގައި 2019 ވަނަ އަހަރު ހަ މީހަކަށް ދައުވާކުރިއެވެ. އެއީ، ޑަބްލިއު ކޮންސްޓްރަކްޝަންގެ މެނޭޖިން ޑިރެކްޓަރު ދަފްތަރު ނަމްބަރު 7198 އާދަމް ޝަފީގާއި އެ ކުންފުނީގެ ސުޕަވައިޒަރު ދަފްތަރު ނަމްބަރު 8424 މޫސާ ހަސަން އަދި އިންޑިއާގެ ހަތަރު މީހެކެވެ.
އެމީހުންގެ ތެރެއިން ޝަފީގް ފިޔަވައި، އެހެން އެންމެންގެ މައްޗަށް ކުށް ސާބިތުވާ ކަމަށް ކްރިމިނަލް ކޯޓުން ވަނީ ހުކުމްކޮށްފައެވެ. ނަމަވެސް ކުށް ސާބިތުވި މީހުންގެ ތެރެއިން ޖަލަށްލީ ދެ ބިދޭސީ އެކެވެ.
ދެން ތިބި މީހުންގެ ތެރެއިން މޫސަގެ މައްޗަށް 115،200ރ. ގެ ޖޫރިމަނާގެ އަދަބެއް އިއްވިއިރު، ދެ ބިދޭސީންނަށް އިއްވީ 7،200ރ. ގެ ޖޫރިމަނާގެ އަދަބެކެވެ.
