"އޮޅިގެން" ބޮޑު އަދަދުތައް ޖަމާ ކުރެވުނީ އަދަދުތައް އިސްފަސްވުމުން: ފިނޭންސް
އަތޮޅު ތެރޭގައި މަސައްކަތްކުރާ ސިއްހީ ހިދުމަތްތެރީންގެ ތެރެއިން ބައެއް ފަރާތްތަކުގެ މުސާރައިގެ ގޮތުގައި އޮޅިގެން ބޮޑެތި އަދަދުތައް ޖަމާ ކުރެވިފައި ވަނީ މުސާރަ ޝީޓްގެ އަދަދުތައް އިސްފަސްވުމުގެ ސަބަބުން ކަމަށް ފިނޭންސް މިނިސްޓްރީން ވިދާޅުވެއްޖެއެވެ.
ފިނޭންސް މިނިސްޓްރީން ވިދާޅުވިގޮތުގައި ސިއްހީ ދާއިރާގައި މަސައްކަތް ކުރާ 1796 މުވައްޒަފުންނަށް މުސާރައިގެ އުނި އިތުރު އައިސްފައިވާކަން ފާހަގަ ކުރެވިފައިވެއެވެ. މިގޮތުން ބައެއް މުއައްޒަފުންނަށް ބޮޑެތި އަދަދުތަކުން މުސާރަ ޖަމާކުރެވިފައިވާއިރު އަނެއްބައި މުއައްޒަފުންނަށް މުސާރަ ޖަމާކުރެވިފައި ވަނީ މަދުންނެވެ.
މިނިސްޓްރީން ވިދާޅުވި ގޮތުގައި މުސާރައިގެ މައްސަލަތައް އެ މިނިސްޓްރީގެ ސަމާލުކަމަށް އައިސްފައި ވަނީ ރޭ 7:45 ގައެވެ. އަދި މިކަންް ފާހަގަ ވުމާއެކު އެފައިސާ އަނބުރާ ހޯދުމުގެ މަސައްކަތް ފަށައިފައިވާކަމަށް ވެސް މިނިސްޓްރީން ވިދާޅުވިއެވެ. މީގެ އިތުރުން މަދުން މުސާރަ ޖަމާކޮށްދެވުނު ފަރާތްތަކަށް އުނިވެފައިވާ އަދަދަށް ފައިސާ ދިނުމުގެ މަސައްކަތް ވެސް މިހާރު ދަނީ ކުރިއަށްކަމަށް ފިނޭންސް މިނިސްޓްރީން ވިދާޅުވިއެވެ.
މައުލޫމާތު ލިބިފައިވާ ގޮތުގައި އޮޅިގެން ބައެއް މުވައްޒަފުންނަށް 70,000 ރުފިޔާ މުސާރައިގެ ގޮތުގައި ވަނީ ޖަމާކުރެވިފައެވެ. އަދި އަސްލު މުސާރައަށް ވުރެ އިތުރަށް ޖަމާކުރެވިފައިވާ ބައި ބޭނުން ނުކުރުމަށް ފިނޭންސް މިނިސްޓްރީން ވަނީ އެ މުވައްޒަފުންނަށް އަންގައިފައެވެ.
އޮޅިފޮޅި ސަރުކާރު