އަފްގާނިސްތާނުގެ ޖަލުގައި ހައްޔަރުކޮށްފައިވާ ދިވެހި އާއިލާ މިނިވަންކޮށްފި
އަފްގާނިސްތާނުގެ ޖަލެއްގައި ހައްޔަރުކޮށްފައިވާ ޢަލީ ޝާފިޢުއާއި އޭނާގެ އާއިލާ މިނިވަންކޮށްފައިވާ ކަމަށް ޝާފިއުގެ އާއިލާއިން ބުނެފިއެވެ.
"ދެން"އަށް މަައުލޫމާތު ދެމުން އަލީ ޝާފިއުގެ ބޭބެ ހުސައިން ޝާހިދު ބުނީ ޝާފިއުގެ އާއިލާ ދޫކޮށްލިކަން އެނގުނީ މިއަދުގެ ވަގުތެއްގައި ކަމަށާއި ޝާފިއުގެ އާއިލާ ރާއްޖެ ގެނައުމަށް މާދަމާ އާއިލާގެ ފަރާތުން ސަރުކާރަށް ސިޓީއެއް ހުށައަޅާނެކަމަށެވެ.
"މިއަދު މި އެނގުނީ ދޫކޮށްލިކަން. އެއީ ތާލިބާނުންގެ ކޯޓެއްގައި ޝާފިއުއާއި އޭނާގެ އާއިލާގެ މައްސަލަ ބަލައި އެމީހުންގެ މައްޗަށް ކުށް ސާބިތު ނުވާކަމަށް ހުކުމް ކޮށްފައިވާކަމަށް މައުލޫމާތު ލިބުނީ. މާދަމާ އާއިލާގެ ފަރާތުން ސަރުކާރަށް ސިޓީއެއް ލާނަން. ޝާފިއުއާއި އޭނާގެ އާއިލާ ވީ އެންމެ އަވަހަކަށް ރާއްޖެއަށް ގެނައުމަށް" ޝާހިދު ބުންޏެވެ.
ޝާހިދު ބުނީ ޝާފިއުގެ އާއިލާ ރާއްޖެ ގެނައުމަށް ދަތިތަކެއް ހުރިކަމަށެވެ. އެގޮތުން މިވަގުތު އަފްގާނިސްތާނުގެ ބޯޑަރުތައް ބަންދު ކޮށްފައިވުމަކީ ވެސް އެ އާއިލާ ރާއްޖެއަށް ގެނައުމަށް ހުރި ވަރަށް ބޮޑު ގޮންޖެހުމަކަށް ވާނެކަމަށް ވެސް އޭނާ ވިދާޅުވިއެވެ.
އޭނާ ބުނި ގޮތުގައި ޝާފިއުގެ އާއިލާގެ ހާލަތު މިވަގުތު ރަނގަޅުކަމަށް ޚަބަރު ލިބޭ ކަމަށާއި އެހެން ނަމަވެސް އެހާ ގިނަ ދުވަހު ޖަލުގައި ހޭދަކުރުމުން ފައިސާ ނެތުމުން ކާބޯތަކެތި ހޯދުމަށް ދަތިވާނެކަން އެނގޭ ކަމަށެވެ.
"އެހާ ދުވަހު ޖަލުގައި ތިބީމައި ނުހުންނާނެތާ ފައިސާއެއް ވެސް. އެހެންވީމަ ކާބޯތަކެތި ހޯދަން ދަތިވާނެ. އެކަމަކު ވެސް އަޅުގަނޑުމެން މި ހޯޕް ކުރަނީ މިހާރު ޝެލްޓާއެއް ހޯދައިފައިވާނެކަމަށް" ޝާހިދު ބުންޏެވެ.
ޝާފިއުއާއި އޭނާގެ އާއިލާ އަފްގާނިސްތާނުގެ ޖަލެއްގައި ހައްޔަރުކޮށް ލާއިންސާނީ އަނިޔާތަކެއް ދެމުންދާތީ އާއިލާއިން މީގެ ކުރިން ވަނީ ޝޯޝަލް މީޑިޔާގައި ކެމްޕޭނެއް ކުރިއަށް ގެންގޮސްފައެވެ. އެގޮތުން އޭރު ޝާފިއުގެ ބޭބެ ހުސައިން ޝާހިދު ބުނީ އާއިލާއިން އެދެނީ ޝާފިއުއާއި ޝާފިއުގެ އަނބިމީހާއާއި ދަރިން ރާއްޖެ ގެނައުމަށް ކަމަށާއި އެއަށް ފަހު ދޭ އަދަބެއް ދިނަސް މައްސަލައެއް ނެތް ކަމަށެވެ. މިމައްސަލައިގައި 3 އަހަރު ވަންދެން ކެތްކޮށްގެން ތިބި ކަމަށާއި އެހެން ނަމަވެސް ކުޑަ 4 ކުދިންގެ ހައްގުގައި ސޯޝަލްް ޕްލެޓްފޯމަށް ނުކުންނަށް މަޖުބޫރުވީކަމަށް ވެސް އޭރު ޝާހިދު ބުންޏެވެ.
