ޝުޖާއު ރައީސް ޞާލިޙަށް: ގަޓެއް ހުރިއްޔާ އިންތިޚާބުގައި ރައީސް ޔާމީނާ އެކު ވާދަ ކުރައްވާ

ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ގަޓެއް ހުރިކަން އެނގޭނީ 2023ވަނަ އަހަރު އޮންނަ ރިޔާސީ އިންތިޚާބުގައި ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުލްޤައްޔޫމަށް ވާދަކުރުމުންކަމަށް ޕީއެންސީގެ ނައިބު ރައީސް އިބްރާހިމް ޝުޖާއު ވިދާޅުވެއްޖެއެވެ.

Ads by Sosun Fihaara

ޕްރޮގްރެސިވް ކޯލިޝަނުން މިރޭ "އައްޑަނަ" ބޭއްވި ޖަލްސާގައި ވާހަކަފުޅު ދައްވަކަމުން ޝުޖާއު ވިދާޅުވީ، ރައީސް ޔާމީންނަށް ނުހައްގުން އިއްވާފައިވާ ހުކުމް މިހާރުން މިހާރަށް ބާތިލްކޮށްދިނުމަށް ގޮވައިލާ ކަމަށާއި އަދި ރައީސް ޞާލިޙްގެ ގަޓް ހުރިކަން އެނގޭނީ އިންތިޚާބުގައި ރައީސް ޔާމީނާ އެކު ވާދަ ކުރެއްވުމުން ކަމަށެވެ.

"ރައީސް ޔާމީނަށް އިއްވައިފައިވާ ޙަރާމް ހުކުމް މަނިކުފާނު މިހާރުން މިހާރަށް ބާތިލްކޮށްދެއްވާށޭ. މަނިކުފާނުގެ ގަޓު ހުރި ކަމަކަށް ވާނީ ރައީސް ޔާމީނާއެކުގައި 2023ގައި ވާދަކޮށްލަން ކެރުމޭ. މި ނޫން އެއްވެސް ޝަރުތެއް ދިވެހި ރާއްޖޭގެ ވާދަވެރި ސިޔާސީ ޕާޓީތަކުން ޤަބޫލު ކުރާކަށެއް ނޫން މިތިބީ." ޝުޖާއު ވިދާޅުވިއެވެ.

ރައީސް ޞާލިހާ އެކު މަސައްކަތް ކުރައްވާ ބޭފުޅުންނަށް ފާޑު ވިދާޅުވަމުން ޝުޖާއުގެ ވާހަކަފުޅުގައި ވިދާޅުވީ، ރައީސް ޞާލިޙް ކައިރީގައި އުޅެނީ ހުސް ވަގުން ކަމަށާއި ރައީސް ޞާލިޙް އެންމެ ބޭނުންވާ ވަގުތު އެ އެންމެން ރައީސް ޞާލިޙް ދޫކުރައްވާ ވަޑައިގަންނަވާނެ ކަމަށެވެ.

"މަނިކުފާނު އެންމެ ބޭނުންވާ ވަގުތު ފަހަތް ބަލާލާ ވަގުތު އެކަކު ވެސް ނުހުންނާނެ. ކައިރީގައި ތި ތިބީ ބޮޑެތި ވަގުން. މަނިކުފާނު ވެސް ހިމެނޭ ވެސް ގޮތަށް" ޝުޖާއު ވިދާޅުވިއެވެ.

މީގެ އިތުރުން ޝުޖާގެ ވާހަކަފުޅުގައި ވިދާޅުވީ 2023 ވަނަ އަހަރު ދިވެހިރާއްޖޭގައި ޤާއިމުކުރާނީ ޕީޕީއެމްގެ ސަރުކާރެއް ކަމަށާއި އަދި ރައީސް ޔާމީނުގެ މައްޗަށް ހުކުމްކުރެއްވި ފަނޑިޔާރުންގެ މައްސަލަތައް އެ ސަރުކާރުން ބަލާނެ ކަމަށެވެ.

"ހައިކޯޓުގެ މަގާމެއް ނޫން އަޅުގަނޑުމެން ދޭނީކީ. ޒައްގޫމް ކާންދޭނީ. ހަރާމް ހުކުމްކޮށްފައި ސަލާމަތަކުން ނުތިބެވޭނެ. އިރާދަކުރެއްވިއްޔާ މިއަންނަނީ އެނބުރި ވެރިކަމަށް." ޝުޖާއު ވިދާޅުވީ، ރައީސް ޔާމީންގެ މައްސަލަ ބެއްލެވި ބެންޗްގެ އިސް ފަނޑިޔާރު އަލީ ރަޝީދު ޕީޕީއެމްގެ ވެރިކަމެއްގައި އޮންނަވާނީ ޖަލުގައި ކަމަށެވެ.