ޝިލްޕާ ޝެޓީގެ ވީޑިއޯއެއް އާންމުވުމުން ބެލުންތެރިން ރުޅިގަދަ ވެއްޖެ
ބޮލީވުޑްގެ ތަރިންނަށް ބަލާއިރު، ފަހަކަށް އައިސް އަމިއްލަ ދިރިއުޅުމުގައި އެންމެ ގިނަ މައްސަލަތަކާ ކުރިމަތިވެފައިވާ އެއް ތަރިއަކީ ޝިލްޕާ ޝެޓީ ކުންދްރާއެވެ.
ބަރަހަނާ މަންޒަރުތައް އެކުލެވޭ ވީޑިއޯ އުފައްދައިގެން، ފިރިމީހާ ރާޖް ކުންދްރާ މިދިޔަ ޖުލައި މަހު ހައްޔަރު ކުރި ފަހުން، ޝިލްޕާއަށް ވަނީ އެތައް ބައެއްގެ އެކި ކަހަލަ ފާޑު ކިޔުންތަކާ ކުރިމަތިލާން ޖެހިފައެވެ. ބައެއް މީހުން ޝިލްޕާއަށް ހިތްވަރުދީ ވާހަކަ ދެއްކި ނަމަވެސް، އޭނާއާ ދިމާލަށް ނުރުހުމުގެ ބަސްތައް ބުނި މީހުން ވެސް މަދެއް ނޫނެވެ.
މީޑިއާއާ އާންމުންގެ ކުރިމަތިން ދުވަސްކޮޅެއް ވަންދެން ގެއްލުމެއް ފަހުން ޝިލްޕާ ޝެޓީގެ ވީޑިއޯއެއް ވަނީ އާންމުވެފައެވެ.
އޭގެން ފެންނަނީ ޝިލްޕާ ހުށަހަޅައިދޭ ޝޯއެއްގައި އޭނާ ވަރަށް ބޮޑަށް ހީ ސަމާސާ ކުރާތަނެވެ. ފަހުން ގޮސް އޭނާ ނަށާތަން ވެސް ފެނެއެވެ.
މި ވީޑިއޯ އާންމުވުމާ އެކު ޝިލްޕާ ދެކެ ރުޅި އައިސްގެން ވަރަށް ގިނަ ބަޔަކު ވަނީ އެކި ބަސްތައް ބުނެފައެވެ. ފިރިމީހާ އެފަދަ މައްސަލައެއްގައި ހައްޔަރު ކޮށްފައި ހުއްޓާ ވެސް، ޝިލްޕާ މަޖާ ކުރަނީ ކަމަށް ބުނެ ވަރަށް ބޮޑަށް މީހުން އޭނާއަަށް ނުރުހުމުގެ ބަސްތައް ބުންޏެވެ.
ފާޑު ކިޔުންތަކަށް ރައްދު ދެމުން އެ ޝޯގެ ޕްރޮޑިއުސަރުން ބުނީ އެއީ ޖުލައި މަހު ކުރީކޮޅު ނަގައިފައިވާ ވީޑިއޯއެއްގެ މަންޒަރު ކޮޅެއް ކަމަށާއި އެއިރު އެ މައްސަލަ ނުޖެހޭ ކަމަށެވެ. އަދި ޝިލްޕާއަށް ވެސް ހީ ސަމާސާ ކުރުމާ އުފަލުގައި ހުރުމުގެ ހައްޤު ލިބިގެންވާ ކަމަށް ވެސް ޕްރޮޑިއުސަރުން ބުނެފައިވެއެވެ.
