ބައިނަލްއަގުވާމީ ވާދަވެރިކަމުގެ ތެރެއަށް ރާއްޖެ ވެއްދުމަކީ ނުރައްކާތެރިކަމެއް: ރައީސް ވަހީދު

ބައިނަލްއަގުވާމީ ވާދަވެރިކަމުގެ ތެރެއަށް ދިވެހިރާއްޖެ ވެއްދުމަކީ ނުރައްކާތެރި ކަމެއް ކަމުގައި ރާއްޖޭގެ ކުރީގެ ރައީސް ޑރ. މުޙައްމަދު ވަހީދު ހަސަން މަނިކު ވިދާޅުވެއްޖެއެވެ.

Ads by MWSC

"ޑިފެންޑް މޯލްޑިވްސް"ގެ ނަމުގައި މިރޭ ކްލަބް ހައުސްގައި ކުރިއަށް ގެންދިޔަ ބައްދަލުވުމެއްގައި ވާހަކަދައްކަވަމުން، ޑރ. ވަހީދު ވިދާޅުވީ ދިވެހިރާއްޖެއަކީ ޒަމާނުއްސުރެ ވަކި އަތަކަށް ނުޖެހުމުގެ ސިޔާސަތެއް ގެންގުޅެމުން އަންނަ ޤައުމެއް ކަމަށާއި ބޮޑެތި ޤައުމުތަކުގެ ސިޔާސަތުތަކުގެ ތެރެއަށް ނުވަދެ ވަކި އަތަކަށް ނުޖެހި އޮތް ޤައުމެއްް ކަމުގައި ވެސް އެ މަނިކުފާނު ފާހަގަކުރެއްވިއެވެ. އެހެން ނަމަވެސް މިހާރު ފެންނަނީ ރާއްޖޭގެ ޞުލްޙަވެރިކަން ގެއްލެމުންދާތަން ކަމަށާއި، ބޭރުގެ ޤައުމުތަކުގެ މެދުގައި އޮތް ވާދަވެރިކަމުގެ ތެރެއަށް ރާއްޖެ ވަންނަމުންދާ މަންޒަރުކަމުގައި ވެސް ޑރ.ވަޙީދު ފާހަގަކުރެއްވިއެވެ. އެގޮތުން އެ ވާދަވެރިކަމުގައި ރާއްޖެއަކީ ޕްރޮކްސީއަކަށް ވަމުންދާކަމުގައި ޑރ.ވަޙީދު ވިދާޅުވިއެވެ. ހަމައެހެންމެ ރާއްޖެއަކީ ބައިނަލްއަޤުވާމީ ޓެރަރިޒަމާ ގުޅިފައިވާ ޤައުމެއް ކަމުގައި ތަސައްވުރުކޮށްދެމުން އަންނަ ކަމަށް ވެސް ރައީސް ވަހީދު ވިދާޅުވިއެވެ.

ރޭ ކްލަބް ހައުސްގައި އޮތް ޑިފެންޑް މޯލްޑިވްސް ފޯރަމްގައި ގިނަ ބަޔަކު ވަނީ ޝުޢޫރު ފާޅު ކުރައްވައިފައެވެ. އެ ގޮތުން އިންޑިއާގެ އަސްކަރީން ރާއްޖޭގައި ތިބޭ ތިބުމާ މެދު ގިނަ ބަޔަކު ވަނީ ކަންބޮޑުވުން ފާޅުކޮށް ވާހަކަ ދައްކައިފައެވެ.