ޤައުމު އަނބުރާ ހޯދަން ކުރަންޖެހޭ މަސައްކަތުގައި ފަރުވާ ކުޑަ ނުކުރާތި: ރައީސް ޔާމީންގެ މެސެޖު
ޤައުމު އަނބުރާ ހޯދުމަށް ކުރަންޖެހިފައިވާ މަސައްކަތްތަކުގައި އެއްވެސް މިންވަރަކަށް ފަރުވާ ކުޑަނުކުރުމަށް، ކުރީގެ ރައީސް އަދި މިހާރުގެ އިދިކޮޅު ލީޑަރު ޢަބްދުﷲ ޔާމީން ޢަބްދުލްޤައްޔޫމް އިލްތިމާސްކުރެއްވި ކަމަށް، ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަދި ޕީޕީއެމްގެ ނައިބުރައީސް އަޙްމަދު ޝިޔާމް ވިދާޅުވެއްޖެއެވެ.
ކްލަބްހައުސް މެދުވެރިކޮށް އޮންލައިން ނޫސް "ވަގުތު"އިން ކުރިއަށް ގެންދިޔަ ޕްރޮގްރާމެއްގައި ވާހަކަ ދައްކަވަމުން މެންބަރު ޝިޔާމު ވިދާޅުވީ ރައީސް ޔާމީނުގެ މެސެޖަކީ އެ މަނިކުފާނު ވެރިކަމުގައި ހުންނެވިއިރު ވެސް ރައްޔިތުންނަށް ދެއްވި ވަޠަނީ ޤައުމީ މެސެޖު ކަމަށެވެ.
މަނީ ލޯންޑަރިންގެ ކުށް ސާބިތުވެ ފަސް އަހަރު ދުވަހުގެ ޖަލު ހުކުމެއް އިއްވައި، މިވަގުތު ގޭ ބަންދުގައި ހުންނެވި ކަމުގައި ވިޔަސް، އެމަނިކުފާނު އިލްތިމާސްކުރައްވަނީ އެ މަނިކުފާނަށް ވުރެ ޤައުމު އިސްކޮށް، ޤައުމުގެ މައްސަލަތައް ހައްލުކުރުމުގައި ފަރުވާ ކުޑަ ނުކުރުމަށް ކަމުގައި ވެސް ޝިޔާމު ވިދާޅުވިއެވެ.
މީގެ އިތުރުން ޝިޔާމް ވިދާޅުވީ ރައީސް ޔާމީން އެއިރު ވެސް މިހާރު ވެސް އިސް ކުރައްވަނީ ޤައުމު ކަމަށާއި، ވަކި ފަރުދަކަށް ވުރެ އަދި ސިޔާސީ ޕާޓީއަކަށް ވުރެ ޤައުމު ބޮޑުވާނެ ކަމުގައި ރައީސް ޔާމީން ވިދާޅުވާ ކަމަށް ވެސް ޝިޔާމު ވިދާޅުވިއެވެ.
ދިވެހިންގެ އަތް ދަށަށް ޤައުމު އަނބުރާ ގެންނަން ޖެހޭ ކަމަށާއި އެ މަސައްކަތުގައި ކުރަން ޖެހޭ ކަންކަން ކުރުމަށް ފަރުވާ ކުޑަ ނުކުރުމަށް ވެސް ރައީސް ޔާމީން އެދިލެއްވި ކަމަށް މެންބަރު ޝިޔާމް ވިދާޅުވިއެވެ.
Ads by STO
