ދައްޕަރުގެ މައްސަލައިގައި އިހުތިޖާޖުކޮށް މެންބަރު އިބްރާހިމް ޝަރީފު ފިއްލަދޫން ބާލައިފި
ހއ. ކެލާ ދާއިރާގެ މެންބަރު އިބްރާހިމް ޝަރީފު އެ އަތޮޅު ފިއްލަދޫއަށް އެރުމުން، ދައްޕަރުގެ މައްސަލައިގައި ޒުވާނުންތަކެއް އިހުތިޖާޖުކޮށް އެމަނިކުފާނު އެ ރަށުން ފައިބާވަޑައިގަތުމަށް މަޖުބޫރު ކޮށްފިއެވެ.
"ދެން"އަށް މައުލޫމާތު ދެއްވަމުން އެ ރަށު ކައުންސިލު މެންބަރ މުޙައްމަދު ރަޒީފް ވިދާޅުވީ، މެންބަރު އިބްރާހިމް ޝަރީފު އެ ރަށަށް ވަޑައިގެންނެވީ އެމްޑީޕީގެ އެތެރޭގެ އިންތިހާބުގެ ކެމްޕޭނު ދަތުރެއްގައި ކަމަށެވެ.
"އެމްޕީއާއި ފެނަކައިގެ ޑީއެމްޑީއާ އެކު އެމްޑީޕީގެ ކެމްޕޭނު ދަތުރުފުޅަކަށް ވަޑައިގެންނެވީ. އަމިއްލަފުޅު ދަތުރެއްވީމަ ކައުންސިލަށް އަންގައިފައެއް ވެސް ނެތް ވަޑައިގަންނަވާ ވާހަކަ. މައުލޫމާތު ލިބިފައިވަނީ އެމްޕީ އިބްރާހިމް ޝަރީފު، ކެފޭއަށް ދިޔަ ވަގުތު ޒުވާނުންގެ ތެރެއިން ބަޔަކު ނުކުމެ ހިތްހަމަ ނުޖެހުމުގެ ޝުއޫރުތަކެއް ފާޅުކުރިކަން ދައްޕަރު ކަންތަކުގައި. އެއީ އެމަނިކުފާނުގެ ޚަބަރެއް ނުވާތީ ކަންކަމުގައި." ރަޒީފް ވިދާޅުވިއެވެ.
ރަޒީފް އިތުރަށް ވިދާޅުވީ، ޒުވާނުންގެ ކަންބޮޑުވުންތައް ފާޅުކޮށް އަޑުގަދަ ކުރުމުން، އެމްޕީ އިބްރާހިމް ޝަރީފު ކެފޭއިން ނުކުތް ގޮތަށް ލޯންޗަށް އަރައިވަޑައިގެން އެ ރަށުން ފައިބާވަޑައިގަތީ ކަމަށެވެ.
އެނގިފައިވާ ގޮތުގައި ފިއްލަދޫއާ ގުޅިފައިވާ ދައްޕަރު އެރަށުގެ އިހްތިސާސުން ވަކިކުރުމާ ގުޅިގެން ރުޅި އައިސްފައިވާ ރައްޔިތުން ވަނީ ރުޅިވެރި ބަސްތަކުން މެންބަރު އިބްރާހިމް ޝަރީފަށް އެއްޗެހި ގޮވައިފައެވެ. ފިއްލަދޫގެ އިހްތިސާސުން ދައްޕަރު ވަކިކޮށްލުމުގައި ޝަރީފްގެ ބައިވެރިވުން އޮތް ކަމަށްވެސް ފިއްލަދޫގެ ބައެއް ރައްޔިތުން ތުހުމަތުކުރެއެވެ.
Ads by STO
