ބިރު ދެއްކި ނަމަވެސް ސަރުކާރު ޒިންމާދާރުކުރުވަން ކުރާ މަސައްކަތް ހުއްޓައިނުލާނަން: ޝުޖާއު
ގާނޫނީ ޒިންމާ އަދާކޮށް ސަރުކާރު ޒިންމާދާރު ކުރުވަން ކުރާ މަސައްކަތުގެ ސަބަބުން އަންނަ އިންޒާރަކުން އަދި އިދާރާއަކަށް ހާޒިރުކުރުވާ ކުރުވުމަކުން ބިރު ގަނެ ފަހަތަށް ނުޖެހޭނެކަމަށް މާލެ ސިޓީ ހުޅުމާލެ ދާއިރާގެ ކައުންސިލަރ އިބްރާހިމު ޝުޖާއު ވިދާޅުވެއްޖެއެވެ.
ދައުލަތުގެ ބެލުމުގެ ދަށުގައި ތިބޭ ކުދިން ބަލަހައްޓަން ހުޅުމާލޭގައި ގާއިމު ކޮށްފައި ހުރި ފިޔަވަތީގައި ދިރިއުޅޭ ކުދިން ހުކުރު ދުވަހުން ފެށިގެން ބޮޑެތި ހަމަ ނުޖެހުންތައް ހިންގާފައިވާއިރު، އެ ދުވަހު ޝުޖާޢު އެތަނަށް ވަތްކަމަށް ބުނެ އޭނާއާ މެދު ފިޔަވަޅު އެޅުމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީއިން ލޯކަލް ގަވަންމަންޓު އޮތޯރިޓީން އެލްޖީއޭއަށް ހުށަހެޅުމަށް ވަނީ ނިންމައިފައެވެ.
މިކަމާ ގުޅިގެން "ދެން"އަށް މައުލޫމާތު ދެއްވަމުން ޝުޖާއު ވިދާޅުވީ މަޖިލީހުން މަސައްކަތްކުރަނީ އޭނާގެ ގާނޫނީ ޒިންމާ އަދާކުރުމަށް ހުރަސް އެޅުމަށް ކަމަށާއި އަދި ދައުލަތް އަޑީގައި އޮވެގެން ހިންގުވާ އެ ޖަރީމާއަކީ ދައުލަތުގެ ހުރި ނުކުޅެދުންތެރިކަން ރައްޔިތުންނަށް ހާމަވަމުންދާތީ އެކަން ހުއްޓުވުމަށް ކުރާކަމެއް ކަމަށެވެ.
"ޖަވާބުދާރީވާން ޖެހޭ ހުރިހާ އިދާރާއަކަށް ޖަވާބުދާރީވާނަން. އަޅުގަނޑު ހާޒިރުކޮށްފި ނަމަ މުޅި ޖެންޑަރގެ ސޯޓު ބޭލޭނެ. ކޮންމެ ތަނަކަށް ހާޒިރުކުރިއަށް ގާނޫނީ ޒިންމާ އަދާކުރުމުގައި އަޅުގަނޑު ފަސް ނުޖެހޭނެކަން. ހަމަ ގައިމުވެސް ޖެންޑަރ މިނިސްޓްރީ މިކަމުގައި ވަނީ ފެއިލްވެފައި. ހަމަ ޔަގީނުން ވެސް އަޅުގަނޑަށް އެތަނަށް ގަދަކަމުން ނުވަދެވޭނެ ދެއްތޯ. މިއީ ހަމަ ސީދާ ސަރުކާރު ޖަވާބުދާރީ ކުރުވަން ކުރާ މަސައްކަތް ބިރު ދައްކައިގެން ހުރަސް އެޅުމަށް ކުރާ ވަރަށް ދަށު ދަރަޖައިގެ އަމަލެއް" ޝުޖާއު ވިދާޅުވިއެވެ.
ޝުޖާއު ވިދާޅުވީ މިއީ ދައުލަތުގެ ނުކުޅެދުންތެރިކަން ހާމަވަމުންދާތީ ސަރުކާރުން ކުރާކަމެއް ކަމަށެވެ.
ފިޔަވައްޗަށް ވަތް މައްސަލައިގައި ޝުޖާއުގެ މައްސަލަ އެލްޖީއޭއަށް ހުށަހަޅަން ނިންމައިވާއިރު ވެސް އަދިވެސް އެތަނުގެ ހާލަތު ކޮންޓްރޯލެއް ނުވެއެވެ.
