ނޯ ވޯކިން ޑޭއާ އެކީ ބައެއް މުއައްސަސާތަކުގެ މަސައްކަތް ހުއްޓުމަކަށް: ސަރުކާރުން ދިނީ ފިނި ޖަވާބެއް!
ދަށް ފަންތީގެ މުވައްޒަފުންގެ މުސާރަ ބޮޑުކުރުމާއި މިނިމަމް ވޭޖު ކަނޑައެޅުން އަވަސް ކުރަން ސަރުކާރަށް ޕްރެޝާ ކުރުމަށް ސިވިލް ސާވަންޓުން ފަށައިފައިވާ ހިމޭން އިހްތިޖާޖްގައި މިއަދު މަސައްކަތް ނުކުރާ ދުވަހެއްގެ ގޮތުގައި ކަނޑައެޅުމުން އާންމުންނަށް ލިބެން ޖެހޭ ޚިދުމަތްތަކަށް ބުރޫ އަރައިފިއެވެ.
ސިވިލް ސަރވަންޓުންގެ ޑިމާންޑްގެ ތެރޭގައި ލިވިން އެލަވަންސް ލިބޭނެ ގޮތް ހަމަޖައްސައިދިނުމާއި ހުރިހާ މަގާމުތަކަށް ސެޓްފިކެޓުގެ ކުރިއެރުން ލިބޭނެ ގޮތް ހަމަޖައްސައިދިނުން ހިމެނެއެވެ. އޭގެ އިތުރުން ސްކޫލްތަކުގެ އިދާރީ މުވައްޒަފުންނަށް އިތުރު އެލަވަންސެއް ހަމަޖައްސައިދިނުމަށް ވެސް ސިވިލް ސަރވަންޓުން ދަނީ ގޮވާލަމުންނެވެ.
މި ގޮވާލުންތަކާ އެކީ އިއްޔެ ސިވިލް ސާވެންޓުން މަސައްކަތަށް ނުކުތީ ކަޅު ހެދުމުގައެވެ. އަދި ޑިމާންޑްތަކަށް ހައްލު ނުލިބޭ ނަމަ މިއަދު ނޯ ވޯކިން ޑޭގެ ގޮތުގައި ކަނޑައަޅާނެ ކަމަށް ދިން އިންޒާރު އެ މުވައްޒަފުން މިއަދު ދަނީ ތަންފީޒު ކުރަމުންނެވެ. އެގޮތުން ނޭޝަނަލް ރެޖިސްޓްރޭޝަންއާއި ގިނަ ކައުންސިލްތަކުން މިއަދު ވަނީ އާންމުންނަށް ޚިދުމަތް ދިނުން ހުއްޓައިލައިފައެވެ.
މިކަމާ ގުޅިގެން ސަރުކާރުން ވިދާޅުވީ ކޯވިޑް-19ގެ ދަތި ހާލަތުގައި ވެސް ސިވިލް ސަރވިސްގެ ގިނަ މުވައްޒަފުންގެ މުސާރަ ކުޑަނުކޮށް މުސާރަ ދީފައިވާ ކަމަށެވެ. މީގެ އިތުރުން މިނިމަމް ވޭޖެއް ކަނޑައަޅައި މިއަހަރުގެ ތެރޭގައި އިޢުލާނު ކުރާނެކަމަށާއި މިނިމަމް ވޭޖް ކަނޑައެޅުމުން ސިވިލް ސަރވިސްގައި ހިމެނޭ އެންމެ ދަށް ފަންތީގެ މުވައްޒަފުންނަށް ލިބޭ ޢިނާޔަތްތަކަށް ހެޔޮ ބަދަލުތަކެއް އަންނާނެކަމަށް ވެސް ސަރުކާރުން ނެރުނު ބަޔާނުގައި ވިދާޅުވިއެވެ.
ސަރުކާރުން ވިދާޅުވީ ދައުލަތުގެ ހުރިހާ ފަންނުތަކެއް ހިމެނޭގޮތަށް ނޭޝަނަލް ޕޭ ކޮމިޝަނުން އެކުލަވައިލާ އެއްހަމަ ޕޭ ފްރޭމްވަރކްގެ މަސައްކަތް މިހާރު ވަނީ އެންމެ ފަހުގެ މަރުހަލާގައި ކަމަށާއި އެ މަސައްކަތް މިއަހަރުގެ ތެރޭގައި އެއްކޮށް ނިމޭނެކަމަށެވެ. އަދި މި އައު ޕޭ ފްރޭމްވަރކްގެ ސަބަބުން ދައުލަތުގެ އިދާރާތަކުގެ މެދުގައި ހުރި މުސާރައިގެ ފަރަގުތައް ނައްތައިލެވި، އެއްހަމަ މިންގަނޑަކުން މުސާރައާއި ޢިނާޔަތްތައް ކަނޑައެޅިގެންދާނެކަމަށް ވެސް ވިދާޅުވިއެވެ.
އެ ޕޭ ފްރޭމްވަރކްގައި ދައުލަތުގެ އިދާރާތަކަށް ބޭނުންވާ ހުރިހާ ފަންނުތަކުގެ ގިންތިތަކާއި ފަންތިތައް ކަނޑައަޅައި، ކޮންމެ ފަންނަކަށް ވެސް އެކަށޭނަ މުސާރައާއި ޢިނާޔަތްތައް
ކަނޑައެޅިގެންދާނެކަމަށް ބުނެ ބަޔާނުގައި ބުނެފައި ވަނީ އެގޮތުން ކަނޑައަޅާ މުސާރައާއި ޢިނާޔަތްތަކަކީ މަޤާމުގެ މަސްޢޫލިއްޔަތު އަދާކުރުމަށް ބޭނުންވާނެ ޢިލްމީ ޤާބިލުކަމާއި ފަންނުވެރިކަމާއި، މަޤާމުގެ މަސްޢޫލިއްޔަތާއި ޒިންމާތަކުގެ ބުރަކަމާއި ، ކުރިމަތިވެދާނެ ތަފާތު ވައްތަރުގެ ހިރާސްތަކާއި، މަސައްކަތުގެ މާޙައުލުގައި ކުރިމަތިލާންޖެހޭނެ ޖިސްމާނީ ބުރަތަކަށް ރިޢާޔަތްކޮށްގެން ކަނޑައެޅޭނެ މުސާރައާއި ޢިނާޔަތްތަކެއް ކަމުގައިވާނެކަމަށް ވެސް ބަޔާނުގައި ވިދާޅުވެފައި ވެއެވެ.
ސަރުކާރުގެ އަމާޒަކީ އަންނަ އަހަރުން ފެށިގެން މި އައު ޕޭ ފްރޭމްވަރކަށް މުވައްޒަފުން ބަދަލުވުމުގެ މަސައްކަތް ފެށުން ކަމަށާއި މި އައު ޕޭ ފްރޭމްވަރކްގެ ސަބަބުން ސިވިލް ސަރވިސްގެ މުވައްޒަފުންގެ މެދުގައި މުސާރައާ މެދު ހުރި ގިނަ ކަންބޮޑުވުންތަކަށް ހައްލުތަކެއް ލިބިގެންދާނެކަމަށް އެ ފިނި ބަޔާނުގައި ހާމަކޮށްފައިވެއެވެ.
އަދި ރަނގަޅެއްވާނެ ކޮޅުމައްޗެއް ނުފެންނާނެ