ފިޔަވަތީގެ ކުދީންނަށް ކެއަރ ޕްލޭނެއް ހަމަޖެއްސުމަށް މިދަނީ މަސައްކަތްކުރަމުން: ޖެންޑަރ މިނިސްޓްރީ

ދައުލަތުގެ ބެލުމުގެ ދަށުގައި ތިބޭ އުމުރުން 11 އަހަރު ނުފުރޭ ކުދިންނަށް ހާއްސަކޮށްގެން ހުޅުމާލޭގައި ގާއިމުކޮށްފައި ހުންނަ ފިޔަވަތީގައި ހުކުރު ދުވަހުން ފެށިގެން ހަމަނުޖެހުންތަކެއް ހިނގައިފައިވާއިރު އެކަން ކޮންޓްރޯލުކޮށް ކުދިންނަށް ބޭނުންވާ އެކި ކަންކަން ހަމަ ޖެއްސުމުގެ މަސައްކަތްކުރަމުން ގެންދާކަމަށް ޖެންޑަރ މިނިސްޓްރީން ހާމަކޮށްފިއެވެ. 

Ads by Sosun Fihaara

ޖެންޑަރ މިނިސްޓްރީން ބުނެފައި ވަނީ އެފަދަ ޙާދިސާތައް މެދުވެރިވާން ދިމާވަނީ އެތަނުގައި ދިރިއުޅޭ ކުދިންނަކީ އުމުރުގެ ތަފާތު އެކި މަރުޙަލާތަކުގައި އުމުރާ ނުގުޅޭ އެތައް ކަމެއް ތަޙައްމަލުކުރަން ޖެހި އަދި މިހާރު އެކި ސަބަބުތަކަކާ ގުޅިގެން މައިބައިންފައިންނާއި ދުރުގައި ދިރިއުޅޭ ކުދިންނަށްވުމުން ކުދިންގެ ހެދި ބޮޑުވުމުގައި އެކުދިންގެ ވިސްނުމަށް އަންނަ ބަދަލުތަކުގެ ސަބަބުން ކަމަށެވެ. 

އެކަންކަން ހައްލުކޮށް ކުދިންނަށް ރައްކާތެރި މާހައުލެއް ގާއިމުކުރެވިފައިވާ ކަމަށާއި އަދި މިހާރު ދަނީ އެކި ކުދިންނަށް ބޭނުންވާ އެކި ކަންކަން ކެއަރ ޕްލޭންތަކުގެ ތެރެއިން ހަމަ ޖައްސަމުން ކަމަށެވެ.  

"ތަނުގައި ތިބި ކުދިންގެ ތެރެއިން ފުރާވަރުގެ އުމުރު ކަޑައްތު ކުރަމުންދާ ކުދިންނާއި ޚާއްޞަ އަޅާލުމާއި އެކިބާވަތުގެ ތެރެޕީ ބޭނުންވާ ކުދިން ފާހަގަކޮށް އެކުދިންގެ ހެދިބޮޑުވުމުގެ މަރުހަލާއަށް ބޭނުންވާ ކަންކަމަށް ޚާއްޞަ އިސްކަމެއްދީގެން މަސައްކަތްކުރެވޭނެ އިންތިޒާމް ކެއަރ ޕްލޭނެއްގެ ތެރެއިން ހަމަޖެއްސުމާއި ފިޔަވަތީގައި ދިރިއުޅެމުންދާ ކުދިންނާ އެކު އިތުރަށް ވަގުތު ހޭދަކޮށް އެކުދިންގެ އުދާސްތަކާއި ޝުޢޫރުތައް އަޑުއަހައި އެކަންކަމަށް ހައްލު ހޯދުމަށް މަސައްކަތް ކޮށް، ފިޔަވަތީގައި ތިބި ކުދިންގެ ތެރެއިން ޢާއިލީ ވެއްޓަކަށް ރުޖޫޢަކުރުމުގެ ފުރުޞަތު އޮތް ކުދިން ދެނެގަނެ އެ މަސައްކަތުގެ ސްޕީޑް އަވަސް ކުރެވޭނެ އިންތިޒާމް ހަމަޖައްސާ، ކުދިންގެ ހިތުގެ އުދާސްތަށް އެކިގޮތްގޮތަށް ބޭރުކުރާ ކުދިންނަށް ކައުންސިލިންގެ އިތުރަށް އެކުދިންގެ ހެދިބޮޑުވުމުގެ މަރުހަލާތަކަށް ބަލައި އުމުރު ފުރައާ އެއްގޮތަށް އެކުދިންގެ ހުނަރު ތަރައްޤީކުރުމަށް ބޭނުންވާ ޕްރޮގްރާމްތައް ހިންގުމަކީ ބޭނުންތެރިކަމަކަށް ވުމުން އެކަން ފިޔަވަތި ތެރެއިން ފަހިކުރެވި ދެމެހެއްޓެނިވި ގޮތެއްގައި ގެންދެވޭނެ އިންތިޒާމް ވަނީ ތަރުތީބު ކުރެވިފައި" ޖެންޑަރއިން ބުނެފައިވެއެވެ.  

މީގެ އިތުރުން މާޒީގައި އަނިޔާ ތަހައްމަލުކޮށްފައިވާ ކުދިން އެކުދިން ތަހައްމަލު ކުރަމުންދާ "ޓްރޯމާ"އަށް ބޭނުން ވަނީ އެންމެންގެ ލޯތްބާއި އަޅައިލުމާއި އޯގާތެރިކަން ފާހަގަކޮށް ޖެންޑަރއިން ބުނެފައި ވަނީ އެކި ކުދިން އެ ލޯތްބާއި އަޅައިލުން އަދި އޯގާތެރިކަން ހޯދާނީ އެކި ގޮތްގޮތަށް ކަމަށްވުމުން އެކުދިންގެ އުޅުމާއި ސުލޫކުން ދައްކުވައިދޭ އަމަލެއްގެ މައްޗަށް ބިނާކޮށް މަސައްކަތްކުރަނީ އެފަދަ ޓްރޯމާ ތަހައްމަލް ކުރަމުންދާ ކުދިންނާ އެކު މަސައްކަތް ކުރައްވާ މުވައްޒަފުން މިކަންކަމަށް އަހުލުވެރިކޮށް ކުދިންގެ ބޭނުންތައް ދެނެގަނެ ވަށައި ޖެހޭ އެޕްރޯޗެއްގެ ދަށުން ކުދިންނާއެކު މަސައްކަތް ކުރުން ކަމަށެވެ. 

ޖެންޑަރ މިނިސްޓްރީން މިހެން ހާމަކޮށްފައިވީ ނަމަވެސް "ދެން"އަށް މައުލޫމާތު ލިބިފައިވާ ގޮތުގައި އަދިވެސް އެއްކޮށް އެ މައްސަލަ ހައްލު ނުކުރެވޭ ކަމަށާއި މުވައްޒަފުންގެ ވެސް ހިތްހަމަ ނުޖެހުންތަކެއް ވެސް އަދިވެސް އެބަހުރި ކަމަށެވެ.