އެމްއެންޕީ ތަފާތު ވާނެ، މިއީ އެހެން ޕާޓީތައް ހޭލައްވައިލާނެ ޕާޓީއެއް: ރިޔާޒު
މޯލްޑިވްސް ނޭޝަނަލް ޕާޓީ (އެމްއެންޕީ) ވާނީ ވަރަށް ތަފާތު ޕާޓީއަކަށް ކަމަށާއި އެ ޕާޓީ ވާނީ އެހެން ސިޔާސީ ޕާޓީތައް ހޭލައްވާނެ ޕާޓީއަކަށް ކަމަށް ޕާޓީ އުފެއްދުމުގައި އިސްކޮށް އުޅުއްވާ ތިމަރަފުށީ ދާއިރާގެ މެމްބަރު އަދި ކުރީގެ ކޮމިޝަނާ އޮފް ޕޮލިސް އަބްދުﷲ ރިޔާޒު ވިދާޅުވެއްޖެއެވެ.
ރިޔާޒު މިފަދައިން ވިދާޅުވީ ސަންގު ޓީވީގެ "ހަބަރަށް ފަހު" ޕްރޮގުރާމްގައި ވާހަކަ ދައްކަވަމުންނެވެ. ރިޔާޒް ވިދާޅުވީ އެމްއެންޕީއަކީ ވަކި މީހެއްގެ ފަހަތުން އެނބުރޭ ޕާޓިއަކަށް ނުވާނެ ކަމަށެވެ. އަދި އެމްއެންޕީ ވަރަށް ތަފާތު ވާނެ ކަމަށާއި ރާއްޖޭގައި މިހާރު ތިބި ހުރިހާ ސިޔާސީ ޕާޓީތައް “ހޭލައްވައިލާނެ” ކަމަށެވެ.
މީގެ އިތުރުން ރިޔާޒް ވިދާޅުވީ އެމްއެންޕީއަކީ ސިޔާސީ ގޮތުން ކުރިޔަށް ދާން ބޭނުންވާ އަދި ސިޔާސީ ގޮތުން ކުރިމަގެއް ބޭނުންވާ ކޮންމެ މީހަކަށް ވެސް އުންމީދު އޮތް ޕާޓީއެއް ކަމަށެވެ. އަދި މީހެއްގެ ހަރު މުދަލެއްގެ ގޮތުގަ އެމްއެންޕީ ނުވާނެ ކަަމަށާއި އެންމެ އެކަށީގެންވާ ގޮތުގައި ރައްޔިތުންނަށް ހިދުމަތް ކޮށްދޭނެ ޕާޓިއަކަށް އެމްއެންޕީ ވެގެންދާނެ ކަމަށެވެ.
“ އެންމެ އެކަށީގެންވާ ގޮތުގައި ރައްޔިތުންނަށް ހިދުމަތް ކޮށްދެވޭނީ އާ ޕާޓީއެއް އުފައްދައިގެން. އެމްއެންޕީ ވަރަށް ތަފާތުވާނެ. އެމްއެންޕީއަކީ މުޅިން ތަފާތު، މުޅިން އާ ބްރޭންޑެއް. އެމްއެންޕީ ރާއްޖޭގެ ސިޔާސީ މަސްރަހުގައި ތިބި ހުރިހާ ޕާޓީތަކެއް ހޭލައްވާލާނެ. މި ޕާޓީ ތަފާތުވާ އެއް ސަބަބަކީ އެންމެ މީހެއްގެ ވަށައިގެން ޕާޓީ ނޭނބުރޭނެ. ގައުމީ ފިކުރަކީ މި ޕާޓީ. ގައުމީ މަސްރަހުގެ ހުރިހާ ކަމެއްގައި މޯލިވްސް ފަސްޓް. މި ސްލޯގަންގައި އަޅުގަނޑުމެން ހުރިހާ މަސައްކަތެއް ކުރާނީ. ތަފާތުވާ އަނެއް ކަމަކީ މި ޕާޓީގެ އެންމެ އިސް މަގާމުގައި ހުންނަ ބޭފުޅަކަށް ހުރެވޭނީ އެންމެ ގިނަވެގެން 5 އަހަރުގެ ދެ ޓާމް. މެކްސިމަމް. އެހެންވީމަ މީހެއްގެ ފަހަތުން އެނބުރޭ އެއްޗެއް ނުވާނެ. ސިޔާސީ ގޮތުން ކުރިޔަށް ދާން ބޭނުންވާ ކޮންމެ، ސިޔާސީ ގޮތުން ކުރިމަގެއް ބޭނުންވާ ކޮންމެ މީހަކަށް ވެސް އުންމީދު އޮތް ޕާޓީއެއް މީ. މީހެއްގެ ހަރު މުދަލެއްގެ ގޮތުގަ އެމްއެންޕީ ނުވާނެ” ރިޔާޒް ވިދާޅުވިއެވެ.
ޕާޓީގެ އެންމެ އިސް މަގާމުތަކުގައި ތިބެވޭނީ ގިނަ ވެގެން ފަސް އަހަރުގެ ދެ ދައުރުގައި ކަމަށާއި ޕާޓީގެ މަގާމުތަކަށް އިންތިހާބު ކުރާ މެމްބަރުން ޕާޓީގެ ސުލޫކީ ކޮމިޓީން ވަކިނުކުރެވޭނެ ކަމަށް ވެސް އޭނާ ވިދާޅުވިއެވެ. މީގެ އިތުރުން ހުރިހާ ރައްޔިތުންނަށް ވެސް އެމްއެންޕީއާ ގުޅުމުގެ ފުރުސަތު އޮންނާނެ ކަމަށް ރިޔާޒް ވިދާޅުވިއެވެ.
