ހޯމަ ދުވަހުން ފެށިގެން އެޗްއެސްސީ އިމްތިޙާންގެ ނަތީޖާ ދޫކުރަން ފަށަނީ
މިއަހަރު އެޗްއެސްސީ އިމްތިހާނު ހެދި ދަރިވަރުންގެ ނަތީޖާ އަންނަ ހަފްތާގެ ހޯމަ ދުވަހުން ފެށިގެން ދޫކުރަން ނިންމައިފިއެވެ.
ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ)އިން ވިދާޅުވީ ޖޫން މަހު ބޭއްވުނު އެޗް.އެސްސީ އިމްތިހާނު ހެދި ދަރިވަރުންގެ ތެރެއިން މި ހިނގާ ސެޕްޓެންބަރު މަހު ނަތީޖާ ދޫކުރުމަށް ހަމަޖެހިފައި ވަނީ، ޖޫން މަހު ޓީޗަރ ބޭސްޑް އެސެސްމެންޓް ހެދި ދަރިވަރުންނަށް އެކަނި ކަމަށެވެ. އަދި އިމްތިހާނު ހެދި އެހެން ދަރިވަރުންގެ ތެރެއިން ނަތީޖާ ބޭނުންވާ ދަރިވަރުން، އެ ދަރިވަރަކު އިމްތިހާނު ހެދި ސެންޓަރެއް މެދުވެރިކޮށް އެ ޑިޕާޓްމަންޓަށް އެދި ހުށަހެޅުމުން އެ ދަރިވަރުގެ ނަތީޖާ ސެންޓަރަށް ފޮނުވާނެ ކަމަށް ވިދާޅުވިއެވެ.
ޑީޕީއީން ވިދާޅުވީ އެ ޑިޕާޓްމަންޓު މެދުވެރިކޮށް އަމިއްލަގޮތުން އެޗް.އެސް.ސީ އިމްތިހާނު ހެދި ދަރިވަރުންގެ ނަތީޖާ 2021 ސެޕްޓެންބަރު 27 ވަނަ ދުވަހުން ފެށިގެން އެ ޑިޕާޓްމަންޓުގެ ކައުންޓަރުން ހެނދުނު 0830 އިން 1330އަށް ދޫކުރާނެކަމަށެވެ.
ސެންޓަރުތަކަށް އެޗްއެސްސީގެ ނަތީޖާ ދޫކުރުމަށް ހަމަޖެހިފައި ވަނީ 2021 އޮކްޓޫބަރު 31 ވާ އާދީއްތަ ދުވަހުއެވެ. މިއަހަރުގެ އެޗްއެސްސީ އިމްތިޙާން 1000އަށްވުރެ ގިނަ ދަރިވަރުންނާ އެކު ކުރިއަށް ގެންދިޔައީ ޖޫން މަހުގެ 13އިން 17ގެ ނިޔަލަށެވެ.
Ads by STO
