މަތި ދެކުނު ޕްރޮވިސްގެ ރައީސަކަށް އަމްރު!
މަތި ދެކުނު ޕްރޮވިސްގެ މޯލްޑިވްސް ޑިމޮކްރަޓިކް ޕާޓީ (އެމްޑީޕީ)ގެ ރައީސްކަމަށް ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ ހުސައިން އަމްރު މުހައްމަދު ރަޝާދު ހޮވިއްޖެއެވެ.
ގއ އަދި ގދ އަތޮޅުގެ ރަށްތައް ހިމެނޭ މި ޕްރޮވިންސްގެ ރައީސް ކަމަށް ރައީސް ޞާލިޙް ތާޢީދު ކުރެއްވި އަމްރު ހޮވިފައި ވަނީ، ތައުފީޤް އަބްދުﷲއާ ވާދަކޮށެވެ.
މެއި ހަވަނަ ދުވަހު ރައީސް ނަޝީދަށް ދިން ހަމަލާއާ ގުޅިގެން ފަސް ކުރެވުނު މި އިންތިޚާބު ވާދަވެރިވެ އެމްޑީޕީގެ ދަފުތަރުގައި އޮންނަ ގިނަ ބަޔަކު ވޯޓްލައިފައި ވެއެވެ. އިންތިޚާބުގެ ވާދަވެރިކަން އިތުރުވެގެން ދިޔައީ ރައީސް ޞާލިޙާއި ރައީސް ނަޝީދާ ދެމެދު އުފެދިގެން ދިޔަ ނުތަނަވަސްކަމުގެ ސަބަބުންނެވެ. އެކަމުގެ ސަބަބުން ދެ ރައީސުންގެ ކެނޑިޑޭޓުން ވަނީ އިންތިޚާބުގައި ވާދަކޮށްފައެވެ. ނަމަވެސް މި އިންތިޚާބުގައި ކުރި ހޯދަމުން ދަނީ ރައީސް ޞާލިޙަށް ތާއީދު ކުރައްވާ ކެނޑިޑޭޓުންނެވެ.
