މީސް މީޑިއާގައި ބަރަހަނާ ފޮޓޯތަކެއް ލީކު ކުރި ކަމުގެ ތުހުމަތުގައި މީހެއްގެ މައްޗަށް 11 ދައުވާ

ޓެލެގްރާމާއި މީސް މީޑިއާގެ އެހެން މަންސަތަކެއްގައި ބަރަހަނާ ފޮޓޯތަކެއް ލީކުކުރި ކަމުގެ ތުހުމަތުގައި މީހެއްގެ މައްޗަށް 11 ދައުވާއެއް ކޮށްފިއެވެ.

Ads by Sosun Fihaara

ޕްރޮސެކިއުޓާ ޖެނެރަލް (ޕީޖީ) އޮފީހުން ބުނި ގޮތުގައި، މިއަދު އެ 11 ދައުވާ ކޮށްފައި ވަނީ މއ. އިސްޕަންޖުގޭ މުހައްމަދު މަސާއިދު ބިން ސަމީއު (36އ.) ގެ މައްޗަށެވެ.

މަސާއިދުގެ މައްޗަށް ދައުވާ ކޮށްފައިވަނީ، އެކި މީހުންގެ މީސް މީޑިއާ އެކައުންޓްތަކާއި ޒާތީ މުއާމަލާތް ހިމެނޭ އެހެން އެކައުންޓުތައް ހެކްކުރުމަށް ފަހު އެކި މީހުންގެ ޒާތީ މައުލޫމާތާއި އެ މީހުންގެ ބަރަހަނާ މަންޒަރު ދައްކުވައިދޭ ފޮޓޯ އަދި ވީޑިއޯ ނެގުމަށްފަހު ޓެލެގްރާމްއާއި އެހެނިހެން މީސް މީޑިއާ މަންސަތަކުގައި ހާމަކޮށްފައިވާ މައްސަލައިގައެވެ.

މަސާއިދުގެ މައްޗަށް ކޮށްފައިވާ ދައުވާތައް:

▪︎ އޮރިޔާން ކާޑު ގެންގުޅުމުގެ ކުށުގެ ތިން ދައުވާ
▪︎ އޮރިޔާން ކާޑު ފެތުރުމުގެ ކުށުގެ ތިން ދައުވާ
▪︎ އެނގިހުރެ ހުއްދަނޫން ގޮތުގައި މައުލޫމާތު ހޯދުމުގެ ދައުވާ
▪︎ އެނގިހުރެ ހުއްދަނޫން ގޮތުގައި މައުލޫމާތު ހޯދަން އުޅުމުގެ ކުށުގެ ދައުވާ
▪︎ އަދުލުއިންސާފު ގާއިމުކުރުމަށް ހުރަސްއެޅުމުގެ ދައުވާ
▪︎ އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރުހިންގުމުގެ ދައުވާ
▪︎ އެނގިހުރެ ހުއްދަނޫން ތަނަކަށް ވަނުމުގެ ދައުވާ

އެނގިފައިވާ ގޮތުގައި މިފަދަ މައްސަލައެއްގެ ތުހުމަތުގައި އޭނާ ވަނީ ހައްޔަރު ވެސް ކޮށްފައެވެ. އެގޮތުން، މަސާއިދުގެ ބަންދުގެ މުއްދަތު ހަމަވާތީ ކޯޓަށް ހާޒިރުކުރުމުން ފުލުހުން ވިދާޅުވެފައި ވަނީ އޭނާ ގެންގުޅުނު ހާޑުޑްރައިވަކުން މިލިއަނެއްހާ ފޮޓޯ ފެނިފައިވާ ކަމަށާއި އެއީ ގެއިން ފެނުނު ހަތް ހާޑްޑްރައިވާއި އޮފީހުގައި ބޭނުންކުރި ސިސްޓަމުގެ ހާޑް ޑްރައިވާއި އޮފީހުގެ ވަތްގަނޑަކުން ފެނުނު ދެ ހާޑް ޑްރައިވް ކަމަށެވެ.