ޚިޔާނާތުގެ ފައިސާ ހޯދުމުގައި އެއްބާރުލުން ބޭނުންވާކަމަށް ބުނެ އެސްއޯއެފްގެ މީހުންނަށް ދައުވާއެއް ނުކުރި
މޯލްޑިވްސް މާކެޓިން އެންޑް ޕަބްލިކް ރިލޭޝަން (އެމްއެމްޕީއާރްސީ)ގެ ޚިޔާނާތުގައި ފައިސާ ބަހަން ބޭނުން ކުރި ކުންފުނި އެސްއޯއެފްގެ މީހުންގެ މައްޗަށް ދައުވާ ނުކުރަން ޕްރޮސެކިއުޓަރ ޖެނެރަލްގެ އޮފީހުން ނިންމައިފައިވާ ކަަމަށް ދައުލަތުން މިއަދު ސްޕްރީމް ކޯޓުގައި ހާމަކޮށްފިއެވެ.
ދައުލަތުން މިިހެން ވިދާޅުވީ، މިއަދު އޮތް ރައީސް ޔާމީންގެ އިސްތިއުފާނީ މައްސަލައިގައެވެ. މަނީ ލޯންޑަރިންގެ ކުށް ސާބިތުވެ ކްރިމިނަލް ކޯޓުން ކުރި 5 އަހަރުގެ ހުކުމް ހައި ކޯޓުން ދަހަަމައްޓައިފައި ވަނިކޮށް، ހުކުމް އިސްތިއުނާފް ކުރަން ސްޕްރީމް ކޯޓަށް ވަނީ ހުށަހަޅައިފައެވެ. ސްޕްރީމް ކޯޓުގައި މިއަދު ކުރިޔަށް ދިޔަ މިމައްސަލައިގައި ފަނޑިޔާރުން ވަނީ އެސްއޯއެފްއާ ދެކޮޅަށް ދައުވާ ކުރާނެތޯ ސުވާލުކޮށްފައެވެ.
ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު ޑރ. އަޒްމިރަލްދާ ޒާހިރު މިއަދުގެ އަޑުއެހުމުގައި އެސްއޯއެފާ ގުޅޭ ގޮތުން ތަހުގީގެއް ހިންގުނުތޯއާއި އެ ކުންފުންޏާއި އެ ކުންފުނީގައި ޝާމިލުވާ ފަރާތްތަކުގެ މައްޗަށް ދައުވާކޮށްފައިވޭތޯ ސުވާލު ކުރައްވައިފައެވެ. އެ ސުވާލުގެ ޖަވާބު ދެއްވަމުން ދައުލަތުގެ ވަކީލު އަހުމަދު ނައުފަލް ވިދާޅުވީ، އެމްއެންޕީއާރުސީގެ ޚިޔާނާތުގެ ފައިސާތައް ހޯދުމަކީ މުހިންމު ކަމަކަށް ވާއިރު، އެ ފައިސާތައް ހޯދެން އޮތީ އެސްއޯއެފްގެ މީހުން ދޭ ހެކިބަހުގެ މައްޗަށް ކަމަށްވާތީ އެ މީހުންގެ މައްޗަށް ދައުވާ ނުކުރަން ނިންމައިފައިވާ ކަމަށެވެ. އަދި ވިދާޅުވީ، އެސްއޯއެފްއަކީ އެމްއެމްޕީއާރުސީގެ ފައިސާ ލޯންޑާކުރަން ބޭނުންކުރި ވެހިކަލެއް ކަމަށެވެ.
އެމީހުންގެ މައްޗަށް ތަޙްޤީޤެއް ހިންގުނުތޯ ކުރިމަތި ކުރި ސުވާލަށް ޖަވާބު ދެއްވަމުން ދައުލަތުން ވިދާޅުވީ، މައްސަލައިގެ ތަހުގީގު ފެށުނުއިރު އެ ކުންފުނީގައި ޝާމިލުވާ ފަރާތްތައް ރާއްޖޭގައި ނެތުމުން އެ ފަރާތްތަކާ އެއިރު ތަހުގީގުގައި ސުވާލުކުރެވިފައި ނުވާ ކަމަށެވެ. ނަމަވެސް ފަހުން އެފަރާތްތަކުގެ އެއްބާރުލުން ބޭނުންވާތީ ސުވާލު ކުރެވުނު ކަމަށް ވެސް ވިދާޅުވިއެވެ.
އެސްއޯއެފްގައި އިސްކޮށް ހަރަކާތްތެރިވި ތިން ފަރާތެއް ހޯދުމަށް މީގެ ކުރިން ވަނީ ރެޑް ނޯޓިސް ވެސް ނެރެފައެވެ. އެހެން ނަމަވެސް ފަހުން ވަނީ އެ ނޯޓިސް ބާތިލްކޮށްފައެވެ. ރެޑް ނޯޓިސް ނެރެފައި ވަނީ، މުޙައްމަދު އައްލާމް ލަތީފާއި އަޙްމަދު އިސްފާޙް އަލީ އަދި މުޙައްމަދު ހުސެއިން (އޮއިއްޓޭގެ މައްޗަށެވެ. މި މީހުން އަދިވެސް ދިރިއުޅެމުންދަނީ ރާއްޖެއިން ބޭރުގައެވެ.
